ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បុរសដែលត្រូវបានធ្វើរោគវិនិច្ឆ័យរកឃើញថា មានបញ្ហាសុខភាពផ្លូវចិត្ត អាចរំពឹងថា នឹងមានអាយុសង្ឃឹមរស់តិចជាងអ្នកដែលមានសុខភាពផ្លូវចិត្តល្អ ១០ ឆ្នាំ។ នេះបើយោងតាមការស្រាវជ្រាវរបស់ The Lancet Psychiatry ហើយគម្លាតអាយុសង្ឃឹមរស់សម្រាប់ស្ត្រីដែលមានបញ្ហាផ្លូវចិត្ត គឺតិចជាងអ្នកដែលមិនមានបញ្ហាផ្លូវចិត្តចំនួន ៧ ឆ្នាំ។
ទោះបីជាអ្នកវិទ្យាសាស្ត្រប្រឹងប្រែងដោះស្រាយបញ្ហានេះក៏ដោយ ប៉ុន្តែគម្លាតនេះនៅតែបន្តជាង ២ទសវត្សរ៍មកហើយ។ យ៉ាងណាមិញ មូលហេតុនៃការស្លាប់របស់អ្នកជំងឺបានផ្លាស់ប្ដូរ ទៅជាស្លាប់ដោយសាររបួស ឬធ្វើអត្តឃាតបានថយចុះ ខណៈអ្នកស្លាប់មុនអាយុដោយសារជំងឺមហារីក និងជំងឺបេះដូងបានកើនឡើងទ្វេដង។
តាមការសិក្សារបស់លោក Annette Erlangsen អ្នកជំនាញផ្នែកសុខភាពផ្លូវចិត្ត នៃសាកលវិទ្យាល័យជាតិអូស្ដា្រលី បានបង្ហាញថា មនុស្សដែលមានបញ្ហាសុខភាពផ្លូវចិត្ត ភាគច្រើនមានទម្លាប់រស់នៅ ដែលនាំឱ្យប៉ះពាល់ដល់សុខភាពរាងកាយ ដូចជា ការទទួលទានគ្រឿងស្រវឹង ការទទួលទានអាហារមិនត្រឹមត្រូវ ការជក់បារី និងមិនធ្វើលំហាត់ប្រាណជាដើម។ មានមនុស្សមួយចំនួនទៀត ការប្រើប្រាស់ថ្នាំដើម្បីប្រឆាំងនឹងបញ្ហាផ្លូវចិត្ត ប៉ុន្តែថ្នាំនោះអាចបង្ករឱ្យមានផលប៉ះពាល់ជាច្រើនដូចជា ការឡើងទម្ងន់ ការកន្ត្រាក់សាច់ដុំ និងបញ្ហាសុខភាពរាងកាយជាច្រើនទៀត ដែលអាចបង្ករគ្រោះថ្នាក់ដល់ជីវិត។
ពេលខ្លះអ្នកដែលមានបញ្ហាផ្លូវចិត្ត មិនត្រូវបានគេយកចិត្តទុកដាក់ព្យាបាលសុខភាពរាងកាយរបស់គាត់នោះទេ។ ជាក់ស្ដែង អ្នកដែលមានជំងឺវិកលចរិត ទំនងជាមិនត្រូវបានយកគេចិត្តទុកដាក់ព្យាបាលសុខភាពរាងកាយរបស់គាត់ ហើយជាលទ្ធផល គាត់ត្រូវស្លាប់ដោយសារជំងឺបេះដូង។
អ្នកជំនាញខាងលើបានផ្ដល់អនុសាសន៍ថា គ្លីនិកត្រូវផ្តោតក្នុងការព្យាបាលបញ្ហាសុខភាពផ្លូវចិត្ត ប៉ុន្តែក៏ត្រូវយកចិត្តទុកដាក់បន្ថែមទៅលើសុខភាពរាងកាយរបស់គាត់ផងដែរ។ យើងត្រូវដោះស្រាយគម្លាតអាយុសង្ឃឹមរស់ របស់អ្នកដែលប្រឈមមុខនឹងបញ្ហាសុខភាពផ្លូវចិត្ត។ ចំណែកប្រព័ន្ធសុខាភិបាល មិនអាចគ្រាន់តែចេញវេជ្ជបញ្ជា ហើយមិនតាមដានស្ថានភាពអ្នកជំងឺឱ្យបានជាប់លាប់នោះទេ៕
