បច្ចុប្បន្ន ការសិក្សាបែបវិទ្យាសាស្ត្រនៅតែមិនច្បាស់អំពីមូលហេតុ ដែលនាំឱ្យមនុស្សគេងច្រើនលើសកំណត់ ឬគេងទ្រមួកនោះទេ។ ប៉ុន្តែការសិក្សាបានបង្ហាញថា មានកត្តារួមចំណែកជាច្រើន ដែលធ្វើឱ្យមនុស្សម្នាក់ គេងលើសកំណត់ ហើយទម្លាប់នេះក៏បង្ករឱ្យមានផលប៉ះពាល់ច្រើនផងដែរ។ ប៉ុន្តែប្រសិនបើសួរថា បញ្ហាមួយណា ដែលបានកើតមុន ? គេនៅតែមិនអាចកំណត់បានថា មួយណាជាមូលហេតុ និងមួយណាជាផលប៉ះពាល់នៃការគេងច្រើន។

យោងតាម BetterUp មានកត្តារួមផ្សំសំខាន់ៗចំនួន ៧ ដែលបណ្ដាលមនុស្សម្នាក់គេងច្រើនលើសកំណត់៖

១. វិបត្តិដំណេក ៖ នៅក្នុងវិបត្តិដំណេកមានលក្ខខណ្ឌជាច្រើនដូចជា ជំងឺដង្ហើមដើរមិនទៀងទាត់ពេលគេង (Sleep Apnea) ជំងឺដេកមិនលក់ (Insomnia) និងជំងឺងងុយដេកខ្លាំង (narcolepsy) ដោយលក្ខខណ្ឌទាំងនេះ ប៉ះពាល់ដល់រយៈពេលដែលអ្នកត្រូវគេងពេលយប់ និងអារម្មណ៍នឿយហត់នៅពេលថ្ងៃ។

២. ជំងឺធ្លាក់ទឹកចិត្ត និងការថប់បារម្ភ ៖ ភាពមិនប្រក្រតីផ្នែកអារម្មណ៍ ដូចជា ជំងឺធ្លាក់ទឹកចិត្ត ធ្វើឱ្យអ្នកជួបវិបត្តិងងុយគេងចាប់ពី ៣ ទៅ១២ដងឯណោះ។ ចំណែក ការថប់បារម្ភក៏ជាប់ទាក់ទងទៅនឹងវិបត្តិដំណេកដែរ អាការនេះធ្វើឱ្យអ្នកជួបបញ្ហាពិបាកគេង បន្ទាប់មកអាចបង្កើនហានិភ័យ នៃការគងលើសកំណត់នៅពេលក្រោយ។

៣. បញ្ហាធាត់ ៖ យោងតាមការសិក្សាបានបង្ហាញថា នៅពេលដែលមនុស្សម្នាក់មានម៉ាសរាងកាយធំខ្លាំងពេក អាចប៉ះពាលដល់ចង្វាក់បេះដូងរបស់គេ ព្រមទាំងប៉ះពាល់ដល់គុណភាពនៃការគេង។ បន្ទាប់មក ធ្វើឱ្យមានអារម្មណ៍អស់កម្លាំងនៅពេលថ្ងៃ។

៤. ជំងឺទឹកនោមផ្អែម ​៖ ផលរំខានទូទៅនៃជំងឺទឹកនោមផ្អែមប្រភេទទី២ មានដូចជា បញ្ហាស្ពឹកជើង (restless leg syndrome) និងការផ្លាស់ប្ដូរកម្រិតជាតិស្ករក្នុងឈាមយ៉ាងឆាប់រហ័ស ដែលអាចបណ្ដាល​ឱ្យគេងមិនលក់ ។ លក្ខខណ្ឌនេះបណ្ដាលឱ្យមានអារម្មណ៍នឿយហត់នៅពេលថ្ងៃ និងបន្តគេងច្រើនជាបន្តបន្ទាប់។

៥. ការឈឺចាប់រ៉ាំរ៉ៃ ៖ អារម្មណ៍មិនស្រួលខ្លួន និងឈឺចាប់ ធ្វើឱ្យអ្នកពិបាកគេងលក់ស្កប់ស្កល់ ហើយនៅពេលដែលវារួមបញ្ចូលគ្នាជាមួយនឹងជំងឺធ្លាក់ទឹកចិត្ត វាអាចបណ្ដាលឱ្យអ្នកងងុយគេងខ្លាំង ក្រោយពេលភ្ញាក់ពីគេង។

៦. ជំងឺក្រពេញទីរ៉ូអ៊ីត (Hypothyroidism) ៖ ការថយចុះ នៃការផលិតអរម៉ូននៅក្នុងក្រពេញទីរ៉ូអ៊ីត រួមជាមួយនឹងបញ្ហាដំណេក អាចបង្កើនអារម្មណ៍ងងុយគេខ្លាំងនាពេលថ្ងៃ។

៧. ការប្រើប្រាស់ថ្នាំ ៖ ការប្រើប្រាស់ថ្នាំរួមបញ្ចូលទាំងថ្នាំងងុយគេង ក៏អាចបណ្ដាលឱ្យគេងលើសកំណត់ផងដែរ ។ ការប្រើប្រាស់ថ្នាំអាចធ្វើឱ្យអ្នកកាន់តែគេងមិនលក់លើសដើម។

យ៉ាងណាមិញ អ្នកក៏គួរតែកត់ចំណាំផងដែរថា ការគេងច្រើន ត្រឹមមួយថ្ងៃ ឬពីរថ្ងៃគឺមិនមែនជាបញ្ហាចោទនោះទេ ។ ជាពិសេស នៅពេលដែលអ្នកបានគេងចន្លោះពី ៧ ទៅ៨ម៉ោង ជាទៀងទាត់។ ចំណែកការគេងលើសម៉ោងយូរៗម្ដងនៅចុងសប្ដាហ៍ក៏មិនមែនជាបញ្ហាចោទនោះដែរ។ ប៉ុន្តែការគេងច្រើន ជាប់ជាប្រចាំ គឺជាបញ្ហាប្រឈមមួយដែលត្រូវដោះស្រាយ ព្រោះវាអាចប៉ះពាល់ដល់ជីវភាពរស់នៅប្រចាំថ្ងៃរបស់អ្នក៕