ត្បិតថានៅក្នុងជីវភាពរស់នៅប្រចាំថ្ងៃ មានមនុស្សពូកែៗច្រើន ប៉ុន្តែមនុស្សដែលមានទម្លាប់គិត Outside the box គឺមិនសូវមាននោះទេ ឬអាចនិយាយបានថា ពួកគេជាប្រភេទមនុស្សកម្រ។ តើអ្នកអាចស្ថិតក្នុងចំណោមមនុស្សប្រភេទនេះដែរទេ? ខាងក្រោមនេះជាសញ្ញាចំនួន ៦ ដែលបង្ហាញថា បុគ្គលម្នាក់ជាមនុស្សមានទម្លាប់គិត Outside the box ។

១. ផ្តោតលើដំណោះស្រាយ ជាជាងអង្គុយពិបាកចិត្ត (ពេលជួបបញ្ហា)៖ ជារឿយៗ យើងគ្រប់គ្នាតែងតែឮអ្នកដទៃនិយាយថា អ្នកត្រូវផ្ដោតលើដំណោះស្រាយនៅពេលមានបញ្ហា និងមិនត្រូវមានអារម្មណ៍តានតឹង ឬព្រួយបារម្ភខ្លាំងឡើយ ។ ប៉ុន្តែនៅពេលអនុវត្តក្នុងការរស់នៅជាក់ស្ដែង វាមិនដូច្នេះទេ យើងនៅតែពិបាកផ្ចង់អារម្មណ៍ និងធ្វើចិត្តឱ្យស្ងប់នៅពេលជួបបញ្ហា ។ ទន្ទឹមនឹងនេះ មនុស្សមានអត្តចរិតគិត Outside the box គឺចំណាយពេលពិ​បាកចិត្តមិនយូរនោះទេ ផ្ទុយទៅវិញ គេចំណាយពេលស្វែងយល់ពីដើមចមនៃបញ្ហា បន្ទាប់មកផ្ដោតរកដំណោះស្រាយ និងវិធីរំដោះខ្លួនចេញពីបញ្ហានោះឱ្យបានលឿនតាមដែលអាចធ្វើបាន។

២. ពូកែឆ្ងល់ និងចោទសំណួរ “ហេតុអ្វី?” ៖ ចំណុចពិសេសមួយទៀត ដែលបញ្ជាក់ថា អ្នកជា Outside the box thinker គឺអ្នកពូកែសួរសំណួរហេតុអ្វី? ​និយាយឱ្យស្រួលស្ដាប់ទៅ អ្នកជាមនុស្សដែលឆ្ងល់អំពីរឿងរ៉ាវគ្រប់យ៉ាង។នេះគឺជាលក្ខណៈពិសេសមួយ ដែលមិនមែនមនុស្សគ្រប់គ្នាសុទ្ធតែមាននោះទេ។ ជាក់ស្ដែង បើទោះជាអ្នកបានសម្រេចគោលដៅ ឬផែនការអ្វីមួយហើយក៏ដោយ អ្នកនៅតែបង្កើតចំណោទសំណួរថ្មី សម្រាប់គោលដៅបន្ទាប់ទៀតជានិច្ច។

៣. តែងតែមានគំនិតប្រឆាំងនឹងខ្លួនឯង ៖ ការមានទម្លាប់ជជែកដេញដោលជាមួយខ្លួនឯង មិនមែនមានន័យថាអ្នកមានបញ្ហា Schizoid personality disorder នោះទេ ប៉ុន្តែសញ្ញានេះបង្ហាញថា អ្នកជាមនុស្សមានសមត្ថភាពថ្លឹងថ្លែងខ្ពស់ លើការសម្រេចចិត្តធ្វើកិច្ចការអ្វីមួយ។ លើសពីនេះ វាគឺជាសញ្ញាបញ្ជាក់ថា អ្នកគឺជាមនុស្សដែលមានភាពច្នៃប្រឌិត​ និងអាចដោះស្រាយបញ្ហាស្មុគស្មាញបានល្អ។

៤. បើកចិត្តស្ដាប់គំនិតអ្នកដទៃ ទោះមិនយល់ស្រប ៖ ទម្លាប់ពិសេសមួយទៀត ដែលបង្ហាញថា អ្នកជាមនុស្ស Outside the box thinker គឺអ្នកមានឆន្ទៈក្នុងការស្ដាប់គំនិតអ្នកដទៃ បើទោះជាអ្នករកឃើញថា គំនិតនោះមិនសំខាន់ ឬមិនត្រឹមត្រូវក៏ដោយ។ ប៉ុន្តែ អ្នកជាបុគ្គលដែលឱ្យតម្លៃចំពោះគំនិតអ្នកដទៃ ព្រោះអ្នកគិតថា ការជំនាស់ដាច់ខាតចំពោះគំនិតនរណាម្នាក់ មិនមែនមានន័យថា ត្រូវបង្ហាញអាក្បកិរិយាមិនអើពើចំពោះការបង្ហាញគំនិតរបស់គេនោះទេ។ ព្រោះជួនកាលនៅក្នុងគំនិតដែលអ្នកបដិសេដនោះ ក៏អាចមានចំណុចគួរឱ្យចាប់អារម្មណ៍ផងដែរ។

៥. រៀនសូត្រពីកំហុសអ្នកដទៃ៖ បុគ្គលដែលជា Outside the box thinker ជាទូទៅមានទម្លា​ប់សង្កេត និងសិក្សាអំពីរបៀបអ្នកដទៃដោះស្រាយបញ្ហាក្នុងជីវិតពួកគេ។ សកម្មភាពនេះ អាចផ្ដល់នូវមេរៀនជីវិតសំខាន់ៗ ដែលគេមិនបានរៀននៅក្នុងសាលា។ ដូច្នេះ វាអាចជាចម្លើយ ឬការបំផុសគំនិត ដែលនាំឱ្យគេអាចដោះស្រាយនៅក្នុងជីវិតខ្លួនឯងបានល្អ។ ទម្លាប់នេះ ផ្ដល់ឱ្យគេនូវមេរៀន និងបទពិសោធជាច្រើន ហើយវាក៏ជាដើមទន់ ដើម្បីសម្រេចភាពជោគជ័យក្នុងជីវិតផងដែរ។

៦. មានគោលដៅជីវិតជាក់លាក់ ៖ ជាទូទៅ Outside the box thinker ជាបុគ្គលដែលមានគោលដៅជីវិតជាក់លាក់។ ពួកគេមានទម្លាប់កំណត់គោលដៅដែលខ្លួនចង់សម្រេចបាន បន្ទាប់មកគិតអំពីសកម្មភាព និងយុទ្ធសាស្ត្រ ដើម្បីសម្រេចគោលដៅនោះឱ្យបានក្នុងពេលវេលា ឬកាលកំណត់ជាក់លាក់ណាមួយ។ ឧទាហរណ៍ បច្ចុប្បន្នគេមានអាយុ ១៨ឆ្នាំ ហើយគេកំណត់ថា នៅអាយុ ៣៥ឆ្នាំ គេត្រូវមានគ្រួសារមួយដ៏មានសុភមង្គល និងប្រភពចំណូលមួយសមរម្យ។ បន្ទាប់មក គេចាប់ផ្ដើមគិតពីសកម្មភាពដែលគេត្រូវធ្វើ ដោយបង្កើតឱ្យមានផែនការប្រចាំសបា្ដហ៍ ប្រចាំខែ និងប្រចាំឆ្នាំ ហើយគេនឹងអនុវត្តតាមផែនការដែលគេបានរៀបចំរហូតទាល់តែសម្រេចគោលដៅបាន៕