ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កីឡា គឺជាផ្នែកមួយដ៏ចាំបាច់ក្នុងទិដ្ឋភាពជីវិតមនុស្ស។ ការចូលរួមសកម្មភាពកីឡា អាចជួយឱ្យមនុស្សមានឱកាសបានរៀនអំពីរឿងរ៉ាវថ្មីៗ ជួបមនុស្សថ្មីៗ ព្រមទាំងជួយឱ្យរាងកាយមាំមួន រហ័សរហួន និងសមសួនទៀតផង។ បច្ចុប្បន្ន មានប្រភេទកីឡាជាច្រើន ដែលយើងអាចជ្រើសរើសលេងបាន ដោយមិនចាំបាច់គិតពីអាយុ។ ទន្ទឹមនឹងនេះ បើយោងតាមសារព័ត៌មាន IRAN FRONT PAGE បានបង្ហាញថា ការលេងកីឡា មានឥទ្ធិពលវិជ្ជមានចំនួន ៥ចំពោះសង្គម៖
១. លើកកម្ពស់សុខុមាលភាពសង្គម ៖ យោងតាមអ្នកវិទ្យាសាស្ត្រជាច្រើនរូបបានបង្ហាញថា ការហាត់កីឡាផ្ដល់នូវអត្ថប្រយោជន៍ជាច្រើនចំពោះរាងកាយ និងសរីរាង្គរបស់មនុស្ស។ វាជំរុញឱ្យរាងកាយបញ្ចេញនូវសារធាតុគីមីម្យ៉ាងដែលមានឈ្មោះថា អង់ដូហ្វីន ដែលជួយបំបាត់ភាពតានតឹង ការឈឺចាប់ និងលើកកម្ពស់អារម្មណ៍វិជ្ជមាន។ លើសពីនេះ ការហាត់ប្រាណជួយពង្រឹងទំហំសាច់ដុំ ភាពធន់ និងធ្វើឱ្យសាច់ដុំកាន់តែរឹងមាំ។ ជាពិសេស ជួយកាត់បន្ថយបញ្ហាស្រក និងលើសទម្ងន់ ការឡើងឈាម ជំងឺគាំងបេះដូង ជំងឺដាច់សរសៃឈាមខួរក្បាល និងបញ្ហាស្ត្រេស។
២. បង្កើនសាមគ្គីភាព៖ លក្ខណៈពិសេសរបស់កីឡា គឺបង្កើតឱ្យមានសាមគ្គីភាព ការរួបរួមគ្នា និងភាពស្និទ្ធស្នាលរវាងគ្នានឹងគ្នា ដោយមិនប្រកាន់ជាតិសាសន៍ ពណ៌សម្បុរ ឬភេទ។ ជាក់ស្ដែង កីឡាជាច្រើនប្រភេទ ដូចជាបាល់ទាត់ជាដើម បាននាំឱ្យមនុស្ស ដែលមានសាវតា សាសនា ជាតិសាសន៍ និងពណ៌សម្បុរខុសគ្នា រួបរួមសហការគ្នា នៅពេលដែលពួកគេលេងក្នុងក្រុមតែមួយ ឬគាំទ្រក្រុមដែលពួកគេចូលចិត្ត។
៣. បង្កើតការងារ៖ កីឡាករ កីឡាការនី ដែលបំពេញការងារក្នុងឧស្សាហកម្មកីឡា ភាគច្រើនគឺទទួលបានប្រាក់កម្រៃខ្ពស់ រហូតដល់រាប់លានដុល្លារក្នុងមួយឆ្នាំក៏មាន។ លើសពីនេះ កីឡាមិនត្រឹមតែបង្កើតការងារសម្រាប់អត្តពលិកប៉ុណ្ណោះទេ អាជីពជាច្រើនក៏ត្រូវការជាចាំបាច់សម្រាប់បម្រើដល់វិស័យនេះដែរ ជាពិសេសគឺ វេជ្ជបណ្ឌិត អ្នកសារព័ត៌មាន និងអ្នកជំនាញផ្នែកអាហារូបត្ថម្ភ។ ជាមួយគ្នានេះ មានឱកាសអាជីវកម្មជាច្រើនត្រូវបានបង្កើតឡើងដោយសារកីឡា ដូចជា អ្នកលក់អាហារក្នុងកីឡដ្ឋាន ក្រុមហ៊ុនលក់សម្ភារកីឡា និងក្រុមហ៊ុនភ្នាល់ជាដើម។ វាគឺជាឧស្សាហកម្មដ៏ធំមួយដែលផ្ដល់ឱកាសឱ្យមនុស្សជាច្រើន។
៤. នាំឱ្យមានការអភិវឌ្ឍក្នុងសហគមន៍ ៖ តាមរយៈសកម្មភាពកីឡា នាំឱ្យកីឡាករយល់អំពីអត្ថប្រយោជន៍នៃការធ្វើការងារជាក្រុម។ ពិសេស នៅជីវិតជាក់ស្ដែង កីឡាករអាចយកស្មារតីបំពេញការងារជាក្រុមរបស់ខ្លួន ដើម្បីចូលរួមអភិវឌ្ឍសហគមន៍ និងស្ថាប័ន ដែលគាត់បំពេញការងារ។ តាមរយៈសកម្មភាពនេះ ពួកគេអាចក្លាយជាចំណែកមួយនៃការអភិវឌ្ឍសង្គមមួយឱ្យមានអរិយធម៌កាន់តែខ្ពង់ខ្ពស់ ដែលជំរុញឱ្យសង្គមមានការរីកចម្រើនផ្នែកសេដ្ឋកិច្ច និងសង្គមកិច្ច។
៥. កាត់បន្ថយបញ្ហាសង្គម៖ នៅពេលដែលយុវជនងាកមកចាប់អារម្មណ៍នឹងការលេងកីឡាក្នុងពេលទំនេរ នេះគឺជាជោគជ័យដ៏ធំមួយក្នុងការកាត់បន្ថយវិបត្តិសង្គម។ ព្រោះយុវជននឹងមិនចាប់អារម្មណ៍ការសេពគ្រឿងញៀន និងអំពើអបាយមុខផ្សេងៗ។ ចំណុចនេះ ជះឥទ្ធិពលវិជ្ជមានយ៉ាងធំសម្រាប់សង្គមជាតិ ព្រមទាំងអាចកាត់បន្ថយបញ្ហាអន្តិសុខផ្សេងៗផងដែរ៕
