បន្ទាប់ពីចំណាយពេលរៀននៅវិទ្យាល័យជាច្រើនឆ្នាំមក នោះឆ្នាំចុងក្រោយអាចជាពេលភ័យផងអរផង។ យ៉ាងណាមិញ មុននឹងឈានជើងចាកចេញពីកម្រិតថ្នាក់វិទ្យាល័យ ក្រៅពីការផ្តោតលើមេរៀន សិស្សគួរមានសកម្មភាពមួយចំនួនដែល​ត្រូវ​ផ្តល់តម្លៃអំឡុងពេលសិក្សា។ ដូច្នេះ តើ​សិស្សានុសិស្ស​ដែល​កំពុងរៀនថ្នាក់វិទ្យាល័យ គួរធ្វើអ្វីខ្លះដើម្បីបង្កើនផលិតភាព និងការចងចាំល្អៗ?

តាមរយៈ គេហទំព័រ University of WATERLOO បាន​ប្រាប់​នូវ​សកម្មភាពមួយ​ចំនួន ដូចជាការចូលរួមជាសកម្មភាពក្នុងសាលា បង្កើតមិត្តភាពល្អៗ ចូលរួមជាមួយក្លឹបសិក្សានានា និងការបង្កើតអនុស្សាវរីយ៍ជាមួយមិត្ត គ្រូ ឬបុគ្គលគ្រប់ផ្នែកនៅក្នុងសាលាតាមដែលអាចធ្វើបាន។

១. ការចូលរួមសកម្មភាព ៖ មិនថាជាសកម្មភាពកីឡា ការធ្វើហត្ថកម្ម ការលេងកម្សាន្តពេលចុងម៉ោង ចូលរួមការងារស្ម័គ្រចិត្ត កិច្ចការសហគមន៍ ឬការរាំលេងជាក្រុមពេលមានកម្មវិធីនោះទេ អំឡុងពេលសិក្សាវិទ្យាល័យ គឺជាពេលមួយដែលមានឱកាសជួបគ្នាច្រើន មិនទាន់មានសម្ពាធអំពីការបង្កើតគ្រួសារ ដែលកត្តាទាំងនេះហើយសុទ្ធសឹងតែជាចំណែកផ្តល់ភាពងាយស្រួលក្នុងការបង្កើតអនុស្សាវរីយ៍ និងមានភាពសប្បាយរីករាយក្នុងនាមជាសិស្ស។

២. បង្កើតមិត្តភាពដែលផ្តល់អត្ថន័យ ៖ ត្បិតថាវ័យ ដែលនៅវិទ្យាល័យ សម្បូរមិត្តច្រើន រហូតដល់ចាំមុខមិនអស់ក្ដី ឆ្លៀតពេលជាមួយគ្នានោះ គួរសង្កេតអំពីមិត្តភាពប្រភេទណាដែលអាចបន្តដំណើទៅមុខជាមួយគ្នាបានយូរ ការបង្កើតមិត្តជិតស្និទមិនគួរផ្តោតលើបរិមាណពេកទេ ប៉ុន្តែបើមានច្រើនចាត់ទុកថាជាគុណសម្បត្តិមួយ។ យ៉ាងណាការបង្កើតមិត្តភាព ដែលផ្តល់អត្ថន័យទៅបាន គឺផ្តោតលើគុណភាព ឬគោលដៅរួម ដូចជាបំណងទៅសិក្សាបន្ត ឬការចូលរួមប្រឡងប្រជែងនានា។

៣. ចូលរួមជាមួយក្លឹប ៖ ការចូលរួមជាមួយក្លឹបសិក្សាក្ដី ក្លឹបការងារក្ដី សុទ្ធសឹងតែជាចំណែកជំរុញឱ្យបង្កើតបាននូវឱកាសថ្មីៗ ឬការសាកល្បងសកម្មភាពថ្មីៗដែលពុំធ្លាប់អនុវត្តន៍កន្លងមក។ ការចូលរួមក្នុងកម្មវិធីសិក្សា ឬការធ្វើការស្ម័គ្រចិត្តទៀតសោត ជាពេលមួយនាំសិស្សឱ្យជួបជាមួយមនុស្សដែលមានចំណូលចិត្តដូចគ្នា ឬប្រហែលគ្នា ឬក៏មានសក្តានុពលស្រដៀងគ្នា ដែលវានឹងផ្តល់ផលវិជ្ជមាននៅពេលត្រូវការប្រមូលផ្តុំអ្នកសិក្សានៅពេលក្រោយៗ៕