យុវជនជាច្រើន​ដែល​ត្រូវ​បានធ្វើសម្ភាសន៍ សុទ្ធសឹងតែលើកឡើងដូចៗគ្នាថា ការ​ចូលរួមក្នុងពិព័រណ៍​ការងារ និងផលិតភាពជាតិ ឆ្នាំ២០២៤នេះ ពួកគេ​មក​ស្វែងរកបទពិសោធន៍ថ្មីអំពីការរើសជំនាញសិក្សា ក៏ដូចជាការត្រៀមខ្លួនសម្រាប់ឱកាសការងារដែលកំពុងមានតម្រូវការទីផ្សារការងារ។

យុវតី ភន សៀវម៉ី ជាសិស្សទើបប្រឡងចប់ថ្នាក់ទី១២ នៃវិទ្យាល័យប៊ុនរ៉ានីហ៊ុនសែនពាមរាំង និយាយថា នេះជាលើកទីមួយហើយ ដែលនាងបានចូលរួមក្នុងកម្មវិធីពិព័រណ៍ការងារ និងផលិតភាពជាតិ ឆ្នាំ២០២៤ ដើម្បីស្វែងរកបទពិសោធន៍មួយចំនួនអំពីការជ្រើសរើសជំនាញនៅសាកលវិទ្យា និងរបៀបដាក់ពាក្យស្វែងរកការងារធ្វើ។

យុវតីមកពីខេត្តកណ្ដាល រូបនេះ បន្ថែមថា រូបគេដឹងព័ត៌មាននៃកម្មវិធីនេះ តាមរយៈហ្វេសប៊ុក ហើយក៏បបួលមិត្តភក្តិមកចូលរួម។ សៀវម៉ី បន្តថា កម្មវិធីពិព័រណ៍ការងារនេះពិតជាល្អ ព្រោះបានផ្ដល់ឱកាសដល់សិស្សានុសិស្ស និងយុវជនជាច្រើន មកស្វែងរកបទពិសោធន៍ថ្មីៗ និងឱកាសការងារ។

យុវជន ទ្រី ម៉េងហ៊ី សិស្សទី១០ នៃសាលារៀនវ៉េស ឡាញន៍ និយាយថា នេះជាលើកទីមួយ ដែលរូបគេចូលរួមក្នុងពិព័រណ៍ការងារតាមរយៈសាលារៀនផ្ទាល់ ។ ម៉េងហ៊ី ប្រាប់ថា រូបគេទទួលបានអារម្មណ៍ថ្មីប្លែក និងឃើញស្ដង់តាំងបង្ហាញជាច្រើន។

សិស្សទី១០ នៃសាលារៀនវ៉េស ឡាញន៍ គិតថា កម្មវិធីពិព័រណ៍ការងារនេះ គឺល្អដែលអាចផ្ដល់ឱកាសដល់សិស្សនុសិស្ស និងក្រុមហ៊ុន បានជួបជុំគ្នា និងផ្ដល់ព័ត៌មាន និងបទពិសោធន៍ការងារមួយចំនួន។

យុវតី រស់ ណារ៉ុង ជាសិស្សទើបប្រឡងចប់ថ្នាក់ទី១២ នៃវិទ្យាល័យពងទឹក លើកឡើងដែរថា រូបគេចូលរួមកម្មវិធីពិព័រការងារ ព្រោះចង់ទទួលបានបទពិសោធន៍ថ្មីៗទាក់ទងនឹងមុខជំនាញបន្តការសិក្សានៅសាកលវិទ្យាល័យ ក៏ដូចជាស្វែករកបទពិសោធន៍មួយចំនួនអំពីរបៀបដាក់ពាក្យធ្វើការងារនៅតាមស្តង់មួយចំនួន។

សិស្សទើបប្រឡងចប់ថ្នាក់ទី១២ នៃវិទ្យាល័យពងទឹក រូបនេះ  បន្ថែមថា បន្ទាប់ពីដឹងលទ្ធផលប្រឡងបាក់ឌុប រូបគេមានបំណងចង់បន្តការសិក្សានៅឧត្តមសិក្សាផ្នែកលក់ និងធ្វើទីផ្សារ ដោយសាររូបនាងមានសមត្ថភាពផ្នែកទំនាក់ទំនងជាមួយមនុស្សល្អប្រសើរ។ ណារ៉ុង បន្តថា កម្មវិធីនេះ ផ្ដល់ឱកាសជាច្រើនសម្រាប់នាងក្នុងការស្វែងរកបទពិសោធន៍ថ្មីៗ ជួបមនុស្សថ្មី ជាពិសេស ដឹងអំពីតម្រូវការទីផ្សារការងារ។

គួរជម្រាបជូនថា ពិព័រណ៍ការងារ និងផលិតភាពជាតិឆ្នាំ២០២៤ រៀបចំរយៈពេលពីរថ្ងៃ គឺថ្ងៃទី២៦-២៧ ខែតុលា ឆ្នាំ២០២៤ ដែលមានក្រុមហ៊ុនធំៗចំនួន ១៥០ នឹងផ្តល់ឱកាសការងារសរុបជាង ៣ម៉ឺនកន្លែង៕