ពិព័រណ៍​ការងារ និង​ផលិតភាពជាតិ ដែលកំពុង​ប្រព្រឹត្ត​ធ្វើ​រយៈពេល​២ថ្ងៃ​ (២៦-២៧ តុលា) នៅសាលពិព័រណ៍​កោះពេជ្រ មិនត្រឹម​តែផ្តល់​ឱកាស​ដល់អ្នកស្វែង​រក​ការងារ និង​អ្នកផ្តល់ការងារ​បានជួបគ្នា ក៏​ដូចជា​ប្រមូលផ្តុំ​នូវ​ព័ត៌មានទីផ្សារការងារ​ប៉ុណ្ណោះទេ ប៉ុន្តែក៏​ជា​វេទិកា​មួយ​សម្រាប់​ប្អូនៗ​សិស្សានុសិស្ស​ដែលទើបប្រឡង​សញ្ញាបត្រមធ្យមសិក្សា​ទុតិយភូមិ ឬបាក់ឌុបរួច អាច​ស្វែងយល់ពីទីផ្សារ​ការងារ ងាយស្រួលក្នុងការសម្រេចចិត្តជ្រើសរើស​ជំនាញ​ណាមួយដែលនឹងត្រូវរៀនបន្ត​សម្រាប់អនាគត។

ឯកឧត្តម ហេង សួរ រដ្ឋមន្រ្តីក្រសួងការងារ និង​បណ្តុះបណ្តាល​វិជ្ជាជីវៈ បានលើកឡើង​ក្នុងពិធីបើកពិព័រណ៍​ការងារ និងផលិតភាពជាតិ​ ឆ្នាំ២០២៤ ថា នៅសប្តាហ៍ក្រោយនេះ ជាពិសេស​ប្អូនៗ​ដែលទើបបញ្ចប់សញ្ញាបត្រមធ្យមសិក្សា​ទុតិយភូមិ នឹង​ដឹងលទ្ធផលរបស់ខ្លួន, តាមរយៈវេទិកាការងារនៅថ្ងៃនេះ ទោះបីលទ្ធផលប្រឡងបាក់ឌុបមិនទាន់ចេញ ប៉ុន្តែក្មួយៗទាំងអស់អាចមកកាន់ពិព័រណ៌ការងារដើម្បីស្តាប់នូវបទបង្ហាញ ហើយអាចសួរទៅអ្នកជំនាញ នៃទីភ្នាក់ងារជាតិមុខរបរ និង​ការងារអំពីចក្ខុវិស័យ នៃទីផ្សារ​ការងារ នៅក្នុងរយៈពេល​២ឆ្នាំទៀត ឬ៤ឆ្នាំទៀត ។ ឯកឧត្តម​បញ្ជាក់ថា ដូច្នេះវេទិកានេះ វានឹងក្លាយទៅជាមូលដ្ឋានសម្រាប់ក្មួយៗដែលប្រឡង​បាក់ឌុបរួច អាច​សម្រេចចិត្ត​បានថា តើគួរ​រើសជំនាញមួយណា?

ឯកឧត្តមរដ្ឋមន្រ្តីបន្តថា ជាការពិតណាស់ ពេលខ្លះ​ក្រោយ​ប្រឡងបាក់ឌុប​ ការសម្រេចចិត្ត​ក្នុងការ​ជ្រើសរើស​ជំនាញអាច​ទៅតាមមិត្តភក្តិ អាច​ទៅតាម​ស្ថានភាពគ្រួសារ ប៉ុន្តែប្រហែលជាមិនបានទទួលព័ត៌មានមួយ​ដែលពិតប្រាកដថា តើអាជីវកម្មអ្វីដែលនឹង​មានការ​ប្រែប្រួល​ក្នុងពេលខាងមុខ តើការងារអ្វីដែលនឹងមានការប្រែប្រួលនៅពេលខាងមុខ? ការ​សម្រេច​ចិត្ត​ជ្រើសរើស​ជំនាញតាម​ឪពុកម្តាយផ្តល់មកខ្លះ ផ្អែក​ទៅលើមិត្តភក្តិខ្លះ គឺជាការសម្រេច​ចិត្ត​កាលពី១០ ទៅ២០ឆ្នាំមុន ប៉ុន្តែបច្ចុប្បន្ននេះ យើងចង់​ឱ្យ​ការ​សម្រេចចិត្តជ្រើសរើស​ជំនាញណាមួយ​របស់យុវជន ត្រូវផ្អែក​ទៅលើចក្ខុវិស័យ ផ្អែក​ទៅលើព័ត៌មានមួយ​ឱ្យ​មានភាពប្រាកដប្រជាជាងមុន ដើម្បីធ្វើយ៉ាងណាឱ្យ​ការចំណាយពេលវេលា​ក្នុងការ​អប់រំបណ្តុះបណ្តាល​មានផលិតភាព។

“ផលិតភាពមានន័យច្រើន ៤ឆ្នាំដូចគ្នា ចង់មហាវិទ្យាល័យបានបរិញ្ញាបត្រ ប៉ុន្តែមួយ​ចេញមកបានប្រាក់ខែខ្ពស់ មួយ​ទៀតចេញមកបានប្រាក់ខែមិនទាន់ខ្ពស់ អញ្ចឹងវានឹងបញ្ជាក់ពីផលិតភាព ។ …គេ​ជ្រើសរើស​ជំនាញត្រូវ ធ្វើ​ឱ្យ​ខ្លួនគេ​មានផលិតភាពជាងមុនដែរ…”

ពាក់ព័ន្ធនឹងការជ្រើសរើស​ជំនាញ​នេះដែរ លោកជំទាវ តិមា វិច្ឆិការ អនុប្រធាន​សហភាពសហព័ន្ធយុវជន​កម្ពុជា​រាជធានីភ្នំពេញ បានស្នើទៅដល់​សិស្សានុសិស្ស​ទាំងអស់ ដែលកំពុងត្រៀមខ្លួន​បន្ត​ការសិក្សា​ទៅកម្រិត​ឧត្តមសិក្សា ឬក៏​បណ្តុះបណ្តាល​បច្ចេកទេស ខិតខំ​ស្វែង​យល់ពី​តម្រូវការ​ការងារ ទាំងបច្ចុប្បន្ន និងការ​ប្រមើល​មើល​ទៅអនាគត ដើម្បីត្រៀមខ្លួន​សម្រេចចិត្ត​ឱ្យបានត្រឹម​ត្រូវល្អប្រសើរ​សម្រាប់អនាគត​ខ្លួន។ «ការ​យល់ដឹងពីទីផ្សារ​ការងារ គឺជួយប្អូនៗ និង​ក្រុមគ្រួសារប្អូនៗបានច្រើន សន្សំសំចៃពេលវេលា មិនចំណាយថវិកាច្រើន ចៀសវាងការរៀនតាមគ្នា រៀនគ្មានគោលដៅច្បាស់លាស់»។

ជាមួយគ្នានេះ លោកជំទាវ​ក៏​ស្នើ​ដល់​ប្អូនៗដែល​ទើបបញ្ចប់ថ្នាក់ទី១២ ឬប្រឡងបាក់ឌុបរួច កុំមើលស្រាលការងារ​ជំនាញដែលរៀន​រយៈពេលខ្លី ដោយថា ការងារ​ខ្លះសញ្ញាបត្រ​មិនខ្ពស់ តែ​អាច​រៀនឆាប់ចប់ ហើយ​អាច​ទទួល​បានការងារ​ដែលមានប្រាក់ចំណូលខ្ពស់ ដែលនេះ​អាច​ជាដំណាក់កាលដំបូង​ដែលយុវជន​អាច​ចាប់ផ្តើម​ការងារ​បានលឿន ហើយ​អាច​មាន​ប្រាក់ចំណូល។

សូមបញ្ជាក់ថា ពិព័រណ៌ការងារ និងផលិតភាពជាតិ ឆ្នាំ២០២៤នេះ ប្រព្រឹត្តទៅរយៈពេល២ថ្ងៃ គឺថ្ងៃសៅរ៍ អាទិត្យ ទី២៦-២៧ ខែតុលា ឆ្នាំ២០២៤ នៅ​សាល​ពាណិជ្ជកម្ម និង​ពិព័រណ៌កោះពេជ្រ រាជធានីភ្នំពេញ ដោយមានក្រុមហ៊ុន​ សហគ្រាស គ្រឹះស្ថាន​អប់រំ​ អង្គការ​ជាតិ-អន្តរជាតិ ព្រមទាំង​ក្រសួង ស្ថាប័ន​រដ្ឋាភិបាល ជាង១៥០ ចូល​រួមដាក់តាំងបង្ហាញអំពី​តម្រូវការ​ជ្រើសរើស​កម្លាំងពលកម្ម​ប្រមាណជាង៣ម៉ឺនកន្លែង។ ទន្ទឹមនឹងនេះ ពិព័រណ៍​ការងារថ្នាក់ជាតិ ក៏​មាន​បញ្ចូលសិក្ខាសាលាលើក​កម្ពស់​ផលិតភាពការងារ ក្នុងគោល​បំណង​ដើម្បី​លើក​កម្ពស់​ការ​យល់ដឹង និងបំផុស​គំនិតទាក់ទងនឹង​ផលិតភាព​ការងារ តាមរយៈ​ការ​ចែក​រំលែកចំណេះដឹង បទពិសោធន៍ល្អៗ និងគន្លឹះសំខាន់ៗ​ពីសំណាក់វាគ្មិនជំនាញៗ៕