អ្នកជំនាញ​សេដ្ឋកិច្ច នៃរាជបណ្ឌិតសភាកម្ពុជា លោកបណ្ឌិត គី​ សេរីវឌ្ឍន៍ បានសម្តែង​ការ​ព្រួយបារម្ភចំពោះ​អត្រាមិនថមថយរបស់អ្នកជក់បារីនៅកម្ពុជា ហើយ​លោក​បានស្នើ​ឱ្យ​មានការ​អនុវត្ត​ឱ្យ​បានម៉ឺងម៉ាត់ក្នុងការ​គ្រប់គ្រង​ការ​នាំចូល ការផលិត និង​ការបង់ពន្ធ​ឱ្យ​បានត្រឹមត្រូវ​ ពោលគឺធ្វើ​ឱ្យ​ថ្លៃបារី​កាន់តែខ្ពស់ ដែលវា​អាច​ជួយ​កាត់បន្ថយ​អ្នក​ជក់បារី ជួយ​បន្ទុកសុខាភិបាល​កាន់តែថយចុះ។

បើតាម​លោកបណ្ឌិត គី សេរីវឌ្ឍន៍ បរិយាកាសនៃការប្រើប្រាស់បារីនិងផលិតផលថ្នាំជក់ នៅតែពិបាកក្នុងការទប់ស្កាត់ ដែលអាចនឹងជះផលអវិជ្ជមានទៅដល់ចំណោមយុវជន លើសុខភាពរបស់គាត់ និងរួមចំណែកក្នុងរារាំងដល់ការរីកចម្រើននៃអាយុសង្ឃឹមរស់ ឬហៅថាអាយុមធ្យមរបស់ប្រជាពលរដ្ឋ។

លោកបណ្ឌិតបញ្ជាក់ថា ពាក់ព័ន្ធនឹងការជំរុញកាត់បន្ថយការប្រើប្រាស់ផលិតផលថ្នាំជក់នៅកម្ពុជា វិធានការហាមជក់តាមទីសាធារណៈ និងកន្លែងធ្វើការ ការអនុវត្តក៏នៅមានកម្រិត ដែលក្នុងនោះ មានត្រឹមតែ៥១% នៃកន្លែងធ្វើការប៉ុណ្ណោះដែលអាចអនុវត្តបានពេញលេញតាមការកំណត់នៃអនុក្រឹត្យស្តីពី វិធានការហាមការជក់ឬបង្ហុយផ្សែងផលិតផលថ្នាំជក់នៅកន្លែងធ្វើការឬទីសាធារណៈ ហើយមានតែ ៨៥%នៃកន្លែងធ្វើការ ដែលបានបិទស្លាកហាមជក់បារី។

សម្រាប់លោកបណ្ឌិតយល់ថា វិធានការដំឡើងពន្ធលើបារី ដែលអាចធ្វើឱ្យថ្លៃបារីកើនដល់ ៧០% អាច​ជាវិធានការមួយ​ទៀតរួមចំណែកកាត់បន្ថយការប្រើប្រាស់បារីរបស់យុវជន និង ប្រជាពលរដ្ឋដែលមានចំណូលទាប។ វិធានការនេះ ត្រូវបានលើកមកពិភាក្សា ពីរដងរួចមកហើយ នៅក្នុងកិច្ចពិភាក្សាតុមូល និង វេទិការយុវជនស្តីពីវិធានការពន្ធលើថ្នាំជក់ ដោយបានលើកបង្ហាញថា ភាពរសើបនៃការប្រើប្រាស់បារីនិងផលិតផលថ្នាំជក់ជាមធ្យម -0.5 ដែលមានន័យថា បើសិនជាតម្លើងពន្ធលើបារីដល់ ៧០% អាចនឹងធ្វើឱ្យកាត់បន្ថយការជក់បារីបានដល់ទៅ ៣៥%។

វេជ្ជបណ្ឌិត មុំ គង់ នាយកប្រតិបត្តិនៃអង្គការចលនាដើម្បីសុខភាពកម្ពុជា (CMH) មានប្រសាសន៍ថា បច្ចុប្បន្ន អ្នកប្រើថ្នាំជក់នៅកម្ពុជាអាយុ១៥ឆ្នាំឡើងទៅ គឺមានចំនួនជាង ២លាននាក់ ដែលពួកគេនឹងជួបហានិភ័យ​ខ្ពស់ នៃជំងឺស្លាប់មុនអាយុជាច្រើនដូចជា ជំងឺដាច់សរសៃឈាម​ខួរក្បាល ស្ទះសរសៃឈាមបេះដូង ជំងឺ​ឆ្លង​ផ្លូវ​ដង្ហើម​ផ្នែក​ខាងក្រោម ត្បៀតទងសួតរ៉ាំរ៉ៃ មហារីកសួត ទងសួត និង​បំពង់ខ្យល់ជាដើម។

នាយកប្រតិបត្តិនៃអង្គការ CMH បញ្ជាក់ថា តាមរបាយការណ៍ប្រជាពលរដ្ឋកម្ពុជាប្រមាណ ១៥ ០០០នាក់បានស្លាប់ជារៀងរាល់ឆ្នាំដែល​បណ្តាលមកពីជំងឺដែលបង្កដោយការប្រើប្រាស់ថ្នាំជក់។ ក្នុងនោះ​ ៣៣% នៃអ្នកស្លាប់ទាំងអស់កើតឡើងចំពោះប្រជាពលរដ្ឋដែលមានប្រាក់ចំណូលទាបបំផុត។

សម្រាប់​លោកវេជ្ជបណ្ឌិត មុំ គង់ វិធានការក្នុងការចូលរួមកាត់បន្ថយការប្រើប្រាស់ថ្នាំជក់នៅកម្ពុជា គឺរួមមាន៖ ១. ដំឡើងពន្ធលើផលិតផលថ្នាំជក់ ២. ពង្រឹងការហាមជក់បារីនៅកន្លែងធ្វើការនិងកន្លែងសាធារណៈ ៣. ដាក់សារព្រមានសុខភាពលើកញ្ចប់ផលិតផលថ្នាំជក់ ៤. ហាមឃាត់ការផ្សាយពាណិជ្ជកម្មផលិតផលថ្នាំជក់គ្រប់ទម្រង់ និង៥. យុទ្ធនាការផ្សព្វផ្សាយតាមប្រព័ន្ធផ្សព្វផ្សាយព័ត៌មាន។

បើតាម​របាយការណ៍​របស់អង្គការសុខភាពពិភពលោក (WHO) បានបង្ហាញថា ប្រជាជន​កម្ពុជាប្រមាណ ១៥,៨% នៃប្រជាជន​កម្ពុជា​សរុបបានប្រើប្រាស់ផលិតផលថ្នាំជក់ ក្នុងនោះ​បុរសមានអត្រា៣ដង​ខ្ពស់​ជាស្រ្តី។ ជាមួយ​គ្នានេះ គេ​ក៏បានរកឃើញដែរថា ប្រជាជនប្រមាណ ២៧,៣៦% គឺបានប៉ះពាល់​នឹងផ្សែងបារី​នៅ​ក្នុងផ្ទះ និង ១៥,៨៤% ប៉ះពាល់​នៅ​ទីសាធារណៈ៕