ក្រោយបញ្ចប់ថ្នាក់វិទ្យាល័យ បញ្ហាហិរញ្ញវត្ថុ គឺជារបាំងមួយដ៏ធំសម្រាប់យុវជន ដែលមិនមានជីវភាពធូរធាហើយមានបំណងមកបន្តការសិក្សានៅសាកលវិទ្យាល័យ។ ត្បិតថា បញ្ហានេះ ជារបាំងរារាំងដ៏ធំក្នុងដំណើរឆ្ពោះទៅរកក្ដីស្រមៃ ប៉ុន្តែមិនមែនមានន័យថា យុវជនមិនអាចឆ្លងផុតរបាំងនេះនោះទេ។

លោក លាវ គឹមឡាយ មន្ត្រីកម្មវិធីអប់រំ យូណេស្កូកម្ពុជា លើកឡើងថា សម្រាប់យុវជន ប្រសិនបើមានក្ដីសុបិនចង់បន្តការសិក្សាលើមុខជំនាញណាមួយនៅសាកលវិទ្យាល័យ ប៉ុន្តែមិនមានលទ្ធភាព សូមកុំអស់សង្ឃឹម។ ចំពោះបញ្ហា ដែលមិនមានថវិកាបន្តការសិក្សានេះ យុវជនអាចមានផ្លូវពីរដើម្បីដោះស្រាយ។

បើតាមអ្នកជំនាញរូបនេះ ដំណោះស្រាយមានពីរដែលយុវជនអាចប្រើដើម្បីបន្តដំណើរឆ្ពោះទៅរកក្ដីសុបិនរបស់ខ្លួន ទី១ គឺការស្វែងរកអាហារូបករណ៍ និងទី២ ការស្វែងរកឥណ្ឌទានសិក្សា ខណៈបច្ចុប្បន្នឥណ្ឌទានសិក្សានៅកម្ពុជា ក៏មានលក្ខណៈទូលំទូលាយផងដែរ។ ប៉ុន្តែលោក គឹមឡាយ សង្កត់ធ្ងន់ថា លោកមិនលើកទឹកចិត្តឱ្យយុវជនផ្តោតលើឥណទាននោះទេ ហើយត្រូវផ្ដោតឱ្យខ្លាំងលើការពង្រឹងសមត្ថភាព ដើម្បីចាប់ឱកាសអាហាររូបករណ៍។

លោក គឹមឡាយ មានប្រសាសន៍ថា ដើម្បីទទួលបានអាហារូបករណ៍សិក្សាជំនាញដែលខ្លួនឯងស្រឡាញ់ យុវជន ត្រូវត្រៀមខ្លួនឱ្យបានល្អ និងមានផែនការច្បាស់លាស់ក្នុងការសិក្សា ពង្រឹងសមត្ថភាព។ បន្ទាប់មកនៅពេលដែលដឹងពីជំនាញ និងមានសមត្ថភាពគ្រប់គ្រាន់ យុវជនត្រូវប្រមូលព័ត៌មានអំពីអាហារូបករណ៍ឱ្យបានច្រើនទៅតាមលទ្ធភាព។ ខណៈបច្ចុប្បន្ន អាហារូបករណ៍ ដែលយុវជនអាចប្រឡង និងចូលរួមប្រកួតប្រជែងយកមានច្រើន ដូចជា អាហារូបករណ៍រដ្ឋាភិបាល, អាហារូបករណ៍មូលនិធិ ឬអង្គការផ្សេងៗ, អាហារូបករណ៍តាមសាកលវិទ្យាល័យ, អាហារូបករណ៍តាមសហគមន៍ ឬក៏តាមបុគ្គលមួយចំនួន ដែលគាត់មានធនធាន និងអាហារូបករណ៍ទៅសិក្សានៅក្រៅប្រទេស ដែលផ្ដល់ដោយរដ្ឋាភិបាលប្រទេសណាមួយ។

បើតាមលោក គឹមឡេង ដើម្បីប្រឡងអាហារូបករណ៍ឱ្យបានជោគជ័យ យុវជនត្រូវមានមូលដ្ឋានគ្រឹះចំណេះដឹងចម្បងចំនួនបី រួមមាន ភាសាបរទេស ដែលជាទូទៅគឺភាសាអង់គ្លេស (ត្រូវមានសមត្ថភាព អាន សរសេរ និយាយ និងស្ដាប់) ចំណេះដឹងគណិតវិទ្យា និងវប្បធម៌ទូទៅ។ ចំពោះជំនាញទាំងបួននៅក្នុងចំណេះដឹងភាសាអង់គ្លេស ជំនាញសរសេរ គឺសំខាន់ជាងគេ ដែលត្រូវពង្រឹងជាចាំបាច់ ព្រោះការប្រកួតប្រជែងក្នុងស្រុកក្ដី ក្រៅស្រុកក្ដី ទាមទារឱ្យមានការសរសេរ។

លោក លាវ គឹមឡេង មានទស្សនៈថា យុវជនគ្រប់គ្នាសុទ្ធតែមានសក្តានុពលខ្ពស់ និងមានចំណុចខ្លាំងរៀងខ្លួន ប៉ុន្តែដើម្បីគាស់សក្តានុពល និងភាពខ្លាំងរបស់ខ្លួនឯងបាន យុវជន ត្រូវតែខិតខំប្រឹងប្រែង តស៊ូអត់ធ្មត់ និងពុះពារគ្រប់ឧបសគ្គ ក្នុងការពង្រឹងសមត្ថភាព និងកសាងខ្លួនឱ្យក្លាយជាធនធានមនុស្សឆ្នើម។ ដូច្នេះសម្រាប់យុវជនដែលកំពុងសិក្សាថ្នាក់វិទ្យាល័យ ហើយគិតថាខ្លួនឯងមិនមានលទ្ធភាពរៀនបន្ត ត្រូវប្រឹងប្រែងរៀនសូត្រ និងត្រៀមខ្លួនរួចជាស្រេច ដើម្បីចាប់ឱកាសអាហារូបករណ៍ផ្សេងៗ៕