ភ្នំពេញ – បន្ទាប់ពីមានការលើកឡើងជាច្រើនតាមរយៈបណ្ដាញសង្គម អំពីការប្រៀបធៀបគ្នារវាងប្រាក់ខែរបស់អ្នកធ្វើការជាកម្មករ​រោងចក្រ ជាមួយ​អ្នកដែលធ្វើការក្នុងក្រុមហ៊ុន ឬបុគ្គលិកស្ថាប័នឯកជនជាដើម រហូត​ដល់​មានការជជែកវែកញែកបញ្ចេញមតិជាហូរហែ ។ សម្រាប់លោកបណ្ឌិត ឈត ប៊ុនថង ប្រធានវិទ្យាស្ថានទំនាក់ទំនង​វប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជា យល់ឃើញថា មហាជនមិន​គួរ​មានការប្រៀបធៀប និង​គួរ​តែធ្វើការ​អបអរ ព្រោះ​អ្នកធ្វើ​ការនៅរោងចក្រ មិនមែនសុទ្ធតែជាកម្មករទាំងអស់នោះទេ។

លោកបណ្ឌិត ឈត ប៊ុនថង មានប្រសាសន៍ថា នៅពេលមានកម្មកររោងចក្រ ឬបុគ្គលិកឯកជន ទទួលបានប្រាក់ខែច្រើន យើងគួរតែអបអរសាទរ ដើម្បីលើកកម្ពស់ជីវភាពប្រជាពលរដ្ឋ ព្រោះអ្នកធ្វើការនៅរោងចក្រមិនមែនសុទ្ធតែជាកម្មករនោះទេ អ្នកខ្លះជាបុគ្គលិក ជាអ្នកជំនាញ ជាអ្នកគ្រប់គ្រងផ្នែករដ្ឋបាល អ្នកជំនាញហិរញ្ញវត្ថុ ឬជំនាញផ្សេងៗនៅក្នុងនោះដែរ។ ដោយឡែក កម្មករមានជំនាញ កម្មករមានសមត្ថភាព កម្មករសកម្ម ពួកគេនឹងទទួលបានប្រាក់ខែច្រើនទន្ទឹមនឹងការថែមម៉ោងការងារទៀត។

“យើងឃើញថានៅក្នុងរោងចក្រខ្លះ គេបានប្រាក់ខែសឹងតែប្រហាក់ប្រហែលរដ្ឋមន្រ្តី ឬតំណាងរាស្រ្តក៏មាននៅក្នុងស្រុកខ្មែរ គេធ្វើបានច្រើន ប្រាក់ខែបានច្រើនជាងក៏មាន គឺអាស្រ័យលើការផ្ដល់ឱ្យជាការសម្រេចរបស់ក្រុមប្រឹក្សាភិបាល ឬគណៈកម្មការប្រតិបត្តិនៅក្នុងរោងចក្រសហគ្រាសនីមួយៗ”

– លោកបណ្ឌិត ឈត ប៊ុនថង ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា ។

លោកបណ្ឌិត ឈត ប៊ុនថង បន្ថែមថា នៅក្នុងព្រះរាជាណាចក្រកម្ពុជា មានការកំណត់ប្រាក់ខែកម្មករ បុគ្គលិក នៅក្នុងក្រុមហ៊ុន រោងចក្រសហគ្រាស ជាប្រាក់ខែអប្បបរមា ហើយក្រៅពីនោះគេតម្លើងប្រាក់ខែតាមអតីតភាព តាមស្នាដៃ ឬតាមការពេញចិត្ត ចូលចិត្ត ឬផលិតផលនៃរោងចក្រសហគ្រាសធ្វើទៅបានសម្រេច។ ចំណែកការងារខ្លះទៀតគេផ្ដល់ជាប្រាក់រង្វាន់បន្ថែម ករណីបុគ្គលិកមិនឈប់សោះ ឬមានស្នាដៃការងារល្អ។ លោកបណ្ឌិតបន្តថា សម្រាប់អ្នកធ្វើការដែលទទួលបានប្រាក់ខែតិច ត្រូវមើលគោលការណ៍របស់ក្រុមហ៊ុន តើប្រាក់ខែអាចឡើង ឬមិនឡើង? គោលការណ៍ក្រុមហ៊ុនណាល្អ យើងទៅធ្វើទៅ ជៀសជាងចូលធ្វើការហើយបានប្រាក់ខែតិចតូចចិត្ត។ ប្រសិនបើយើងយល់ថា ការធ្វើការនៅទីនោះប្រាក់ខែតិច យើងអាចដូរទៅក្រុមហ៊ុនផ្សេងទៀតក៏បាន។

លោកបណ្ឌិតបន្តថា ប្រជាពលរដ្ឋម្នាក់នៅតាមបណ្ដាញសង្គមសុទ្ធតែមានសិទ្ធបញ្ចេញមតិយោបល់ ប៉ុន្តែត្រូវតែដឹងថា ខ្លួនបញ្ចេញមតិយោបល់លើបញ្ហាអ្វី។ ទន្ទឹមគ្នានេះ ប្រសិនបើចង់រិះគន់ វាយតម្លៃលើអ្វីមួយ ហើយដើម្បីឱ្យការវាយតម្លៃ ឬការបញ្ចេញយោបល់របស់យើងគេទទួលយកបាន យើងត្រូវតែមានរង្វាស់ច្បាស់លាស់ ឬមានគោលការណ៍ទៅវាយតម្លៃបែបណាមួយនោះ។

ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា ក៏បានសំណូមពរដល់ប្រជាពលរដ្ឋ​ទាំងអស់នៅពេលមានមតិយោបល់ទៅលើបញ្ហាផ្សេងៗនៅក្នុងការផ្សព្វផ្សាយព័ត៌មានផ្លូវការ ឬមិនផ្លូវការ ឬនៅតាមបណ្ដាញសង្គមក៏ដោយ ចាំបាច់ត្រូវតែប្រើពាក្យពីរោះពិសារ គួរ​កុំប្រើពាក្យអសុរោះ។ លើសពីនេះ ធ្វើអ្វីក៏ដោយត្រូវមានមូលដ្ឋានច្បាស់លាស់ កុំថាតាមតែនឹកឃើញ ដែលពេលខ្លះនាំឱ្យបំពុលសង្គមផងក៏មាន។ ដូច្នេះ យើងរួមគ្នា ដើម្បីកុំឱ្យមានការបំពុលសង្គម មុននឹងនិយាយអ្វីត្រូវមានមូលដ្ឋានច្បាស់លាស់ មុននិយាយអ្វីត្រូវគិតពិចារណាសិន៕