ប្រព័ន្ធអប់រំពីសាលាមួយ ទៅសាលាមួយ ឬពីតំបន់មួយ ទៅតំបន់មួយ មានភាពខុសៗគ្នា​ យ៉ាងណាដើម្បីបង្កើនភាពជោគជ័យក្នុងដំណើរការ នៃការរៀនសូត្រ គឺមានទម្លាប់ស្រដៀងៗគ្នាមួយចំនួន ដែលជំរុញភាពជោគជ័យក្នុងការសិក្សា ដោយមានដូចជា ការរៀបចំកាលវិភាគ និងកំណត់អាទិភាព, ការបំបែកទំហំនៃការសិក្សាឱ្យទៅជាចំណុចតូចដើម្បីបង្កើនភាពងាយស្រួល, ការជ្រើសរើសបរិយាកាសសិក្សាដែលផ្តល់ផាសុកភាព, កត់ត្រាមេរៀនដាក់នៅកន្លែងតែមួយដើម្បីបង្កភាពងាយស្រួលក្នុងការរក និងការផ្សារភ្ជាប់ខ្លួនទៅក្នុងបរិយាកាសដែលផ្តល់ការគាំទ្រជាដើម។

តាមរយៈគេហទំព័រ Chevening បានលម្អិតបន្ថែមអំពីគន្លឹះដើម្បីជំរុញភាពជោគជ័យក្នុងការសិក្សា ពិសេស​គឺការ​សិក្សានៅមហាវិទ្យាល័យ។

រៀបចំកាលវិភាគ ៖​ មិនខុសពីការគ្រប់គ្រងពេលវេលាទេ តែការរៀបចំកាលវិភាគក្នុងនាមជានិស្សិត វាលើសពីការរៀបចំតែមុខវិជ្ជាសម្រាប់សិក្សា។ ការរៀបចំកាលវិភាគត្រង់នេះ គឺសំដៅលើការប្រើប្រាស់ពេលទាំងស្រុងកំឡុងពេលរៀននៅមហាវិទ្យាល័យ ជារួមគឺរៀបចំទាំងការប្រើពេលក្នុងសាលា​ ការជួបជុំ ពេលត្រឡប់មកកាន់កន្លែងស្នាក់នៅ ការទទួលទានអាហារ ការសម្រាក និងការចំណាយពេលទៅលើសកម្មភាពដែលខ្លួនចូលចិត្តផងដែរ​។

នៅពេលដែលកាលវិភាគលម្អិតបែបនេះ មាននិស្សិតមួយចំនួនបារម្ភអំពីភាពខ្វះចន្លោះ ឬអនុវត្តន៍មិនស្របនឹងការរៀបចំកាលវិភាគ។ ប៉ុន្តែសុំកុំបារម្ភចំពោះចំណុចនេះពេក ព្រោះថា ការរៀបចំកាលវិភាគដោយលម្អិតអំពីការចំណាយពេលទៅធ្វើសកម្មភាពនីមួយៗ មិនមែនជាការដាក់សម្ពាធនោះទេ ប៉ុន្តែជាការសម្រួលដល់ការប្រើប្រាស់ពេលឱ្យមានប្រសិទ្ធភាព និងដើម្បីរក្សាតុល្យភាពក្នុងការសិក្សានិងរស់នៅ។ កាលវិភាគសម្រួលដល់ការរៀបចំជីវិតឱ្យបានល្អ និងកាត់បន្ថយក្ដីរំពឹងនៅលើតែលទ្ធផល ជំនួសមកវិញនូវការផ្តោតលើអ្វីដែលអាចទៅរួច និងធ្វើបានជាក់ស្ដែង។

បង្កលក្ខណៈងាយស្រួល ៖ រយៈពេលនៃការចំណាយពេលទៅលើមុខវិជ្ជានីមួយៗ មានភាពយូរ និងត្រូវការថាមពលជាច្រើន ដូចនេះត្រូវបង្កភាពងាយស្រួលនៅពេលស្វ័យសិក្សាដោយខ្លួនឯងបន្ថែម! ដូចជា រៀន២៥នាទី សម្រាក៥នាទី! ហើយនៅពេលអនុវត្តន៍បែបនេះបាន៤ដង អនុញ្ញាតឱ្យខ្លួនឯងបានសម្រាកយូរជាងមុនបន្តិច ដោយចាប់ពី១៥ទៅ៣០នាទី។ ប្រសិនបើវិធីនេះមានភាពស្មុគស្មាញ គួរប្រើកម្មវិធីឌីជីថលជំនួយដូចជា Pomodoro Technique ព្រោះមិនត្រឹមតែជួយកំណត់រយៈពេលទេ ប៉ុន្តែថែមទាំងមានបទភ្លេងដែលផ្តល់នូវអារម្មណ៍ល្អ និងសម្រួចការផ្ចង់ស្មារតីផងដែរ។

ជ្រើសបរិយាកាសដែលផ្តល់ផាសុកភាព ៖ បរិយាកាសមួយ មិនអាចត្រូវនឹងស្ថានភាព ឬក៏ចំណូលចិត្តរបស់គ្រប់គ្នាទេ! យ៉ាងណាដើម្បីឱ្យទទួលបានប្រសិទ្ធភាពនៃការប្រើប្រាស់ទីតាំង គួរកត់សម្គាល់ខ្លួនឯងដែរថា តើខ្លួនចូលចិត្តបែបស្ងប់ស្ងាត់ ឬក៏ត្រូវការភ្លេងអមៗអំឡុងពេលសិក្សា​។ ឧទាហរណ៍បើត្រូវការបង្កើនភាពច្នៃប្រតិដ្ឋ អាចទៅធ្វើការនៅហាងកាហ្វេ ព្រោះទីនោះមានសម្លេងនិងភ្លេងដែលរៀបចំស្រាប់ៗជំរុញឱ្យអារម្មណ៍ល្អ ក៏ដូចជាបង្កើនថាមពល និងការផ្តោតបានយូរ។

រក្សាកំណត់ត្រានៅកន្លែងដែលស្រួលរក ៖ មានកម្មវិធីមួយចំនួនដែលសម្រួលឱ្យរក្សារាល់កំណត់ត្រាឱ្យនៅជុំគ្នាបាន មានដូចជា OneNote, Evernote, Notion ដែលកម្មវិធីទាំងអស់នេះសិស្សអាចទាញយកមកប្រើប្រាស់ដោយឥតគិតថ្លៃ។ កាលដែលដាក់ឯកសារសិក្សា ឬក៏ការកត់ត្រាឱ្យនៅទីតាំងតែមួយគឺជាការបង្កលក្ខណៈងាយស្រួលក្នុងការស្វែងរកនៅពេលក្រោយ និងសន្សំពេលវេលាផងដែរ។

រកការគាំទ្រ និងសិក្សាជាក្រុមៗ ៖ ការសិក្សាជាក្រុមៗ មិនត្រឹមតែជំរុញបាននូវផលិតភាពនោះទេ ប៉ុន្តែជាការកាត់បន្ថយភាពឯកោ ព្រោះមានគ្នាក្នុងការដាស់តឿន មានគំនិតច្រើនក្នុងការជជែក បង្កើនភាពចម្រុះក្នុងការពិភាក្សា រួមទាំងការរក្សាទម្លាប់សិក្សារៀនសូត្រក្នុងរយៈពេលវែង។ ក្នុងករណីមិនមានក្រុមសម្រាប់ចូលរួមនោះទេ សិស្សខ្លួនឯងផ្ទាល់ គួរនាំគ្នាក្នុងការបង្កើតក្លឹប ដើម្បីធ្វើឱ្យដំណើរសិក្សាមានតុល្យភាព មានការផ្សារភ្ជាប់ទំនាក់ទំនង និងការសម្របខ្លួនក្នុងការរៀនរស់ជាមួយមនុស្សដែលមកពីប្រភពផ្សេងគ្នា៕