ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងសន្និសីទសារព័ត៌មាន និងបទបង្ហាញអំពីសាលារៀនវ៉េស្ទឡាញន៍ និងសាលាភាសាលីដឺលែន សាខាក្រុងតាខ្មៅ កាលពីចុងសប្តាហ៍កន្លងទៅនេះ លោកឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុបបានបង្ហាញមោទនភាពចំពោះបណ្តាញសាលារៀនវ៉េស្ទឡាញន៍ ដែលកំពុងបណ្តុះបណ្តាលធនធានមនុស្សកម្ពុជាឆ្លើយតបទៅនឹងបំណិនសតវត្សរ៍ទី២១។
បំណិនសតវត្សរ៍ទី២១ គឺជាបំណិនដែលចាំបាច់សម្រាប់ការចូលរួមទីផ្សារការងារដ៏ប្រកួតប្រជែងនាំពេលបច្ចុប្បន្ន ហើយបំណិនទាំងនោះត្រូវបានបែងចែកដូចជា ១.បំណិន នៃការសិក្សារៀនសូត្រ រួមមាន ការត្រិះរិះពិចារណា ការគិតដោយមានភាពច្នៃប្រតិដ្ឋ ការសហការ ការបង្កើតទំនាក់ទំនង, ២. បំណិន នៃការទទួលព័ត៌មានថ្មីៗ រួមមាន ចំណេះដឹងផ្នែកព័ត៌មានវិទ្យា ចំណេះដឹងផ្នែកប្រព័ន្ធផ្សព្វផ្សាយ ចំណេះដឹងផ្នែកបច្ចេកវិទ្យា, និង ៣. បំណិនជីវិត រួមមាន ការរស់នៅចុះសម្រុងនឹងអ្នកដទៃ ភាពជាអ្នកដឹកនាំ ការផ្តួចផ្តើមគំនិត ផលិតភាពការងារ ព្រមទាំងជំនាញសង្គម។
លោកឧកញ៉ា ប៉ិច បូឡែន មានប្រសាសន៍ថា បំណិនសតវត្សរ៍ទី២១ គឺជាលទ្ធភាពពិភាក្សាគ្នារវាងអ្នកអប់រំ និងអ្នកសេដ្ឋកិច្ចនៅលើពិភពលោក ដើម្បីស្វែងរកភាពរីកចម្រើននៅក្នុងជីវិត ជាពិសេសយុវជននៅក្នុងសម័យនេះ ។ លោកឧកញ៉ាបន្តថា លោកអាចនិយាយដោយមោទនភាព ចំពោះបណ្តាញសាលារៀនវ៉េស្ទឡាញន៍ ដែលបានដាក់បញ្ចូលកម្មវិធីបន្ថែមអមជាមួយកម្មវិធីគោលសិក្សា អាចធ្វើឱ្យសិស្សទទួលបានចំណេះដឹងពេញលេញឆ្ពោះទៅបំណិនសតវត្សរ៍ទី២១។
បើតាមអគ្គនាយកបណ្តាញគ្រឹះស្ថានអប់រំវេសឡាញ អេឌ្យូខេសិន គ្រុប នៅសាលារៀនវ៉េស្ទឡាញន៍ក្រុងតាខ្មៅ និងកំពង់ស្ពឺ គឺជាសាលាចុងក្រោយដែលរៀបចំធ្វើកំណែទម្រង់កម្មវិធីសិក្សា ហើយនឹងបកទៅសាលារៀនវ៉េស្ទឡាញន៍ដទៃទៀត ដោយក្នុងនោះផ្តោតទៅលើការបង្រៀនភាសាចំនួន៣ជាគោល គឺ ភាសាខ្មែរ អង់គ្លេស ចិន ព្រមជាមួយការផ្តោតទៅលើចំណេះដឹងបច្ចេកវិទ្យា និងឌីជីថល ក៏ដូចជាការបណ្តុះសិស្សឱ្យចេះចូលរួមក្នុងការអភិវឌ្ឍសហគមន៍ និងការអប់រំសីលធម៌ពលរដ្ឋ ចរិយាវិទ្យា ស្របទៅនឹងការជំរុញរបស់ប្រមុខរាជរដ្ឋាភិបាល ដែលចង់ឃើញយុវជនកម្ពុជាមិនត្រឹមតែមានចំណេះដឹង មានសមត្ថភាព ក៏ប៉ុន្តែក៏ត្រូវមានគុណធម៌ សីលធម៌ និងឥរិយាបទល្អ។
ក្រៅពីនេះ បណ្តាញសាលារៀនវ៉េស្ទឡាញន៍ មានកម្មវិធីអមបន្ថែមចាំបាច់ជាច្រើនទៀតដែលឆ្ពោះទៅបំណិនសតវត្សរ៍ទី២១ ដូចជា ចំណេះដឹងហិរញ្ញវត្ថុ និងសហគ្រិនភាព ដែលបង្រៀនសិស្សឱ្យចេះគ្រប់គ្រងលុយ, ទម្លាប់ល្អទាំង៧របស់បុគ្គលឆ្នើម, ចំណេះដឹងពាក់ព័ន្ធនឹងវិទ្យាសាស្រ្ត រួមជាមួយនឹងតន្រ្តី កីឡា សិល្បៈ ជាដើម៕
