ថ្លែងក្នុងពិធីបើកសន្និបាតបូកសរុបការងារអប់រំ យុវជន និងកីឡា ឆ្នាំសិក្សា២០២២-២០២៣ និងទិសដៅឆ្នាំសិក្សា២០២៣-២០២៤ ក្រោមប្រធានបទ “ឧត្តមានុវត្តន៍នៃកំណែទម្រង់គ្រឹះស្ថានសិក្សា” កាលពីថ្ងៃទី៣១ ខែមីនា ឆ្នាំ២០២៤ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ដើម្បីគាំទ្រដល់កំណែទម្រង់សាលារៀន ក្រសួងបានកែលម្អការងារអធិការកិច្ច ដែលជាកិច្ចការដ៏សំខាន់មួយក្នុងការគាំទ្រសាលារៀនគំរូ។

ឯកឧត្តមបណ្ឌិតសភាចារ្យ ហង់ជួន ណារ៉ុន បញ្ជាក់បន្ថែមថា ក្រសួងបានបន្ស៊ីឧបករណ៍អធិការកិច្ចជាមួយស្តង់ដាសាលារៀនគំរូ ដើម្បីក្តាប់បានស្ថានភាពរបស់សាលារៀននីមួយៗ និងឈានទៅរៀបចំសកម្មភាពជាក់លាក់សម្រាប់ចុះជួយគាំទ្រ។ ការកែលម្អអធិការកិច្ចដើម្បីគាំទ្រកំណែទម្រង់សាលារៀនគំរូ រួមមាន៖

ទី១. ការរៀបចំតេស្តស្តង់ដា ៖ ដើម្បីពង្រឹងរង្វាយតម្លៃលទ្ធផលសិក្សារបស់សិស្សនៅកម្រិតសាលារៀន និងជាមូលដ្ឋានសម្រាប់រៀបចំផែនការកែលម្អសាលារៀន ក្រសួងអប់រំបាននិងកំពុងរៀបចំជាសេចក្តីណែនាំ ដើម្បីជំរុញឱ្យសាលាបឋមសិក្សា និងសាលាមធ្យមសិក្សាអនុវត្តតេស្តស្តង់ដាឱ្យបានច្បាស់លាស់។ ជាមួយនេះ ក្រសួងនឹងពិនិត្យមើលយន្តការ និងគោលការណ៍ពាក់ព័ន្ធនឹងរង្វាយតម្លៃលទ្ធផលសិក្សារបស់សិស្សទាំងកម្រិតតំបន់ SEA-PLM និងកម្រិតអន្តរជាតិ PISA ដើម្បីបន្សំរវាងស្តង់ដានៃរង្វាយតម្លៃកម្មវិធីសិក្សា វិធីសាស្ត្របង្រៀន និងសៀវភៅសិក្សាគោល។

ទី២. ការអនុវត្តវិធីសាស្ត្របង្រៀន ៖ ក្រសួងអប់រំ បានអនុវត្តនៅសាលារៀនជំនាន់ថ្មី ក្នុងនោះក្រសួងបាននិងកំពុងជំរុញឱ្យសាលារៀនអនុវត្តវិធីសាស្ត្របង្រៀនថ្មី ដូចគ្នានឹងការបង្រៀនតាមបែបគម្រោង ការប្រើប្រាស់បច្ចេកវិទ្យាក្នុងការបង្រៀន ដែលបានដាក់ឱ្យអនុវត្តនៅក្នុងសាលារៀនជំនាន់ថ្មី។

ទី៣​. ការបង្រៀន និងរៀនពេញមួយថ្ងៃ ៖ ការបង្រៀន និងរៀនពេញមួយថ្ងៃ នឹងត្រូវដាក់ឱ្យអនុវត្តនៅតាមគ្រឹះស្ថានសិក្សាដែលមានលទ្ធភាពសមស្រប ទាំងចំនួនបន្ទប់រៀន និងគ្រូបង្រៀន ដើម្បីបង្កើនម៉ោងសិក្សារបស់សិស្ស និងអនុវត្តកម្មវិធីក្រៅម៉ោងសិក្សា។

ទី៤. ការអនុវត្តកម្មវិធីក្រៅម៉ោងសិក្សា ៖ នៅតាមគោលដៅសាលារៀនគំរូ តាមរយៈការជំរុញឱ្យសាលារៀនរៀបចំ និងបង្កើនម៉ោងសិក្សាពី៤ម៉ោងក្នុង១ថ្ងៃ នាពេលបច្ចុប្បន្ន ទៅ ៦ម៉ោងក្នុង១ថ្ងៃ ឬត្រូវជា ៤០ម៉ោង ក្នុង១សប្ដាហ៍។

ទី៥. ការអនុវត្តអំណាន និងគណិតវិទ្យាថ្នាក់ដំបូង ៖ ការអនុវត្តអំណាន និងគណិតវិទ្យាថ្នាក់ដំបូង ជាមូលដ្ឋានគ្រឹះដ៏សំខាន់របស់សិស្សនៅបឋមសិក្សា និងភូមិសិក្សាបន្តបន្ទាប់ទៀត ដោយក្រសួងបាននិងកំពុងពង្រឹងគុណភាពនៃការអប់រំនៅកម្រិតបឋមសិក្សា តាមរយៈ (១) ការលើកកម្ពស់អំណានដំបូង, (២) គណិតវិទ្យាថ្នាក់ដំបូង (៣) ការបង្កើនចំនួនគ្រូបង្រៀនល្អភាសាខ្មែរថ្នាក់ទី១ ទី២ និងទី៣ និង (៤)ការបង្កើត «សាលាគំរូអំណាន និងគណិតវិទ្យាថ្នាក់ដំបូង»។

គួរជម្រាបជូនថា ក្នុងឆ្នាំ២០២៤ សាលារៀនចំនួន ៧៩៣ ត្រូវបានជ្រើសរើសជាសាលារៀនគោលដៅអនុវត្តស្ដង់ដាសាលារៀនគំរូ ដើម្បីធ្វើអធិការកិច្ច ផ្ដល់ការគាំទ្រ និងជំរុញការអនុវត្ត ក្នុងនោះសាលាមត្តេយ្យសិក្សា ៩៦ សាលាបឋមសិក្សា ៣៤៨ និងសាលាមធ្យមសិក្សា ៣៤៩៕

​