ក្រុមហ៊ុន Westline Education Group (WEG) កាលពីចុងសប្តាហ៍​កន្លងទៅនេះ (២៧ មករា) បាន​ចុះ​អនុស្សារណៈយោគយល់គ្នា (MoU) ជាមួយ​គ្នា ស្ថាប័នធំៗចំនួន៤ ដូចជា ក្រុមហ៊ុន Advanced Glory Logistic (Cambodia) Co.,Ltd , ក្រុមហ៊ុន Apara Media Service (AMS), ក្រុមហ៊ុន United Food Group និង សាកលវិទ្យាល័យខេមតិច (CamTech) ដើម្បីចូលរួមចំណែកអភិវឌ្ឍវិស័យអប់រំ តាមរយៈការផ្តល់អត្ថប្រយោជន៍ដល់បុគ្គលិក និងសាច់ញាតិបុគ្គលិកក្នុងការសិក្សានៅបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប។

លោកឧកញ៉ា ប៉ិច បូឡែន នាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប មានប្រសាសន៍ថា WEG មានសាលា​រៀនជាច្រើនចាប់តាំងពីកុមារ រហូត​ដល់​មនុស្ស​ធំ​ដូចជា មានសាលារៀនវេសឡាញ, សសាលារៀនន័ស្សឡាញ, សាលារៀនសហគមន៍២១, សាលាអន្តរជាតិ, មជ្ឈមណ្ឌល​ភាសាអង់គ្លេស ព្រមទាំង​វិទ្យាស្ថានបណ្តុះបណ្តាល EDI ដែល​ផ្តោត​លើការ​បណ្តុះបណ្តាល​បុគ្គលិក​ទាំងវិស័យ​អប់រំ ពាណិជ្ជកម្ម ។ តាមរយៈ​ការចុះ​អនុស្សារណៈក្នុង​ភាពជាដៃគូនេះ លោកឧកញ៉ា​រំពឹងថា នឹង​មាន​ការ​ផ្តល់ជូន​តម្លៃ​ខុសពីអតិថិជនធម្មតា ជាពិសេស​នៅ​ក្នុង​ភាពជាដៃគូនេះ នឹង​មានការផ្តល់ជូនតម្លៃពិសេស​ដល់បុគ្គលិកឆ្នើម ដោយ​ចង់លើកទឹកចិត្ត​ដល់បុគ្គលិកទាំងអស់គ្រប់ក្រុមហ៊ុន​ធ្វើការ​ដោយ​មានផលិតភាពខ្ពស់។

លោកជំទាវ តាំង លីផេង នាយកប្រតិបត្តិក្រុមហ៊ុន Advanced Glory Logistic លើក​ឡើងថា ចំណេះ​ដឹង​គឺមានសារៈសំខាន់ ប្រសិនបើ​ក្នុង​ប្រទេស​នីមួយៗ​មិន​មានអ្នកចេះដឹងទេ គឺប្រទេសនោះ​មិន​អាច​អភិវឌ្ឍបាននោះទេ ដូច្នេះចំណេះដឹង​គឺកើតឡើងពីការ​រៀន​សូត្រ​នោះឯង ។ ក្នុងនាមជា​ថ្នាក់ដឹកនាំក្រុមហ៊ុន ការសម្រេច​ចិត្ត​ចុះអនុស្សារណជាមួយ WEG ព្រោះតែលោកជំទាវមើលឃើញថា សាលាវេសឡាញ គឺមាន​ប្រព័ន្ធអប់រំ​ដែលមាន​លក្ខណៈស្តង់ដារ ជាពិសេស​មាន​ភាពល្បីល្បាញជាយូរ​មក​នៅ​កម្ពុជាក្នុងការ​បណ្តុះបណ្តាល​សិស្ស​ដែលមានគុណភាព ។

ទន្ទឹមគ្នានេះ លោកជំទាវក៏​ចង់បន្ថែម​នូវ​អត្ថ​ប្រយោជន៍​មួយ​ចំនួន​ដល់បុគ្គលិក​ដែល​បម្រើ​ការ​នៅ​ក្នុងក្រុមហ៊ុន Advanced Glory Logistic រួម​ចំណែក​ក្នុងការ​លើក​ស្ទួយ​ចំណេះដឹង​ដល់​ក្មេង​ជំនាន់ក្រោយ ដែលអាច​ឱ្យ​ពួក​គាត់​មានអនាគត​ភ្លឺស្វាង និង​ជាធនធាន​មនុស្ស​ដ៏​ល្អ​ ក្នុង​ការ​ចូលរួម​កសាង​ប្រទេស​កម្ពុជា​ឱ្យ​រីក​ចម្រើន​ទៅមុខ​បន្ថែមទៀត។

លោក ហេង សុវណ្ណ តំណាងក្រុមហ៊ុន Apara Media Service (AMS) លើក​ឡើងថា មក​ដល់​សតវត្សរ៍ទី២១នេះ យើង​ចាប់ផ្តើម​ឈានពី​ការផ្តាច់មុខ ពីការ​ប្រកួត​ប្រជែង មក​ធ្វើការ​រួមគ្នា ។ ចំណុច​នេះ ក៏​ជាផ្នែក​មួយ​ដែល​យើង​ចាប់ផ្តើម​ជាមួយ​គ្នា រវាង​ក្រុមហ៊ុនមេឌា ជាមួយ​ក្រុមហ៊ុន​អប់រំ ដើម្បី​ធ្វើ​យ៉ាង​ណា​ជំរុញ​ធនធាន​ក្នុងស្រុក​យើងផង និង​ជំរុញ​ឱ្យ​មានការផ្សព្វផ្សាយ​មាតិកាល្អៗ​នៅ​ក្នុងស្រុកយើងផង។

បើតាម​លោក ហេង សុវណ្ណ បេសកកម្ម​របស់ AMS គឺការ​នាំ​មក​នូវ​អត្ថបទថ្មី ប្លែក​សម្រាប់​ប្រទេស​កម្ពុជា ដូច្នេះលោកសង្ឃឹមថា កិច្ច​សហការនេះ នឹងទទួល​បានអ្នកជំនាញ​ផ្នែកអប់រំ ដើម្បី​ចូលរួម​ចំណែក​​នៅ​ក្នុង​ការ​ចាក់បញ្ចូល​នូវ​មាតិកាអប់រំ​ឱ្យ​កាន់តែច្រើន​នៅ​ក្នុង​បណ្តាញ​សង្គម ជាពិសេសនៅ​លើ​ប្រព័ន្ធឌីជីថល ហើយលោកសង្ឃឹមថា នឹង​អាច​ចូលរួម​ចំណែក​ដើម្បី​ឱ្យ​កម្ពុជា​កាន់តែ​ប្រសើរ​ឡើងក្នុង​ការ​បោះជំហាន​យ៉ាង​ស្វាហាប់ នៅក្នុង​ស្ថេរភាព និង​សន្តិភាព។

សម្រាប់​លោក ហេង សៀងលី នាយកក្រុមហ៊ុន United Food Group លើក​ឡើងថា ការចូលរួមជាមួយ​នឹងវេសឡាញ គឺដើម្បី​កសាងធនធាន​មនុស្ស​នៅ​ក្នុង​ប្រទេស​កម្ពុជា ។ ប៉ុន្តែ​បើនិយាយ​ដោយ​ឡែក គឺក្រុមហ៊ុន​ចង់ផ្តល់អត្ថប្រយោជន៍​បន្ថែម​ដល់បុគ្គលិក ដូចជាទទួលបាន​ការ​បណ្តុះបណ្តាល ហើយ​ពួកគាត់ក៏​អាចមានលទ្ធភាពបញ្ជូន​កូន​រៀន​នៅ​សាលាមួយដែលមាន​ស្តង់ដារ។

បើតាម​លោក ហេង សៀងលី សាលាវេសឡាញ ជាសាលា​រៀន​ដែលមានកេរ្តិ៍​ឈ្មោះ​បោះសម្លេង ដូច្នេះ​នៅ​ពេល​ដែល​បុគ្គលិករបស់លោក​បញ្ចូន​កូន​ទៅរៀន​នៅទីនោះ ក៏​ជា​ផ្នែក​មួយ​នៃកិត្តិយស ឬ​អ្វី​ដែល​ពួកគាត់សប្បាយពេញចិត្ត។

ដោយ​ឡែក​លោកសាស្រ្តាចារ្យ Alamgir Hossain សាកលវិទ្យាធិការង នៃសាកលវិទ្យាល័យខេមតិច លើក​ឡើងថា នេះគឺជា​កិច្ចសហប្រតិបត្តិការក្នុងការលើក​កម្ពស់ការ​សិក្សា​ ដោយ​ក្នុងនោះ សាកលវិទ្យាល័យខេមតិច ក៏​បានផ្តល់​អាហារូបករណ៍ជាច្រើនកន្លែង​ដល់សិស្ស​ នៃសាលារៀនវេសឡាញ​ដែលទើប​បញ្ចប់​សញ្ញាបត្រមធ្យមសិក្សា​ទុតិយភូមិ​ផងដែរ៕