ក្មេងស្រីជំទង់កម្ពុជា ចូលរួមក្នុងកម្មវិធី the Coalition ដែល​ជាកម្មវិធីអភិវឌ្ឍវីដេអូហ្គេម បង្កើតឡើងដោយ ការិយាល័យ​​នវានុវត្តន៍ អង្គការយូនីសែហ្វ និងសម្ព័ន្ធភាព Game Changer សម្រាប់ក្មេងស្រី ដើម្បីត្រៀមខ្លួនចូលទៅក្នុងសេដ្ឋកិច្ចឌីជីថល។

ជាមួយនឹងការចូលរួមក្នុងកម្មវិធីនេះ យុវតីនៅទូទាំងប្រទេសកំពុងទទួលបានបទពិសោធន៍ជាក់ស្ដែងក្នុងការសរសេរកូដ ការរចនា និងគោលគំនិតអក្ខរកម្មហិរញ្ញវត្ថុ ដែលនេះសុទ្ធសឹងជាជំនាញសំខាន់ៗសម្រាប់ភាពជោគជ័យ ក្នុងបរិបទសង្គមឌីជីថល ដែលបច្ចេកវិទ្យាកំពុងវិវត្តន៍យ៉ាងឆាប់រហ័ស ជាពិសេសនៅក្នុងតំបន់អាស៊ីអាគ្នេយ៍។

លោកជំទាវ គឹម សេដ្ឋានី មន្រ្តីជាន់ខ្ពស់​ក្រសួងអប់រំ យុវជន និងកីឡា មានប្រសាសន៍ថា គំនិតផ្ដួចផ្ដើមនេះ បានកំណត់ក្មេងស្រីជាផ្នែកមួយដ៏សំខាន់បំផុត សម្រាប់បរិវត្តកម្មឌីជីថលនៅកម្ពុជា។ វាផ្ដល់សិទ្ធិអំណាចដល់ពួកគេ ក្នុងការក្លាយជាអ្នកផលិត អ្នកបង្កើតថ្មី និងអ្នកដឹកនាំក្នុងយុគសម័យឌីជីថល ដោយលុបបំបាត់គម្លាតយេនឌ័រក្នុងការអប់រំឌីជីថល និងធានាការទទួលបានឱកាសសិក្សាទំនើបដោយសមធម៌។

លោកជំទាវបន្ថែមថា តាមរយៈការសរសេរកូដ ការដោះស្រាយបញ្ហា និងការធ្វើការជាក្រុម ក្មេងស្រីអាចពង្រឹងសមត្ថភាពត្រិះរិះពិចារណា ភាពជាអ្នកដឹកនាំ និងអក្ខរកម្មឌីជីថល ដែលជួយឱ្យពួកគេត្រៀមខ្លួន ក្នុងការចូលរួមចំណែកអភិវឌ្ឍជាតិ។ ក្មេងស្រីដែលរចនាហ្គេមពេលបច្ចុប្បន្ននេះ គឺជាវិស្វករ ជាសហគ្រិនឌីជីថល និងជាអ្នកដឹកនាំក្នុងវិស័យបច្ចេកវិទ្យានាពេលអនាគត ដែលនឹងជំរុញវឌ្ឍនភាពសង្គម និងសេដ្ឋកិច្ចរបស់កម្ពុជា។

យុវតី រចនា ជាអ្នកបង្កើតវីដេអូវ័យក្មេងអាយុ ១៦ឆ្នាំ មកពីខេត្តតាកែវ និងជាសមាជិកនៃ Green Ever ជាក្រុមដែលឈ្នះក្នុងកម្មវិធី UNICEF Game Jam សកល បាននិយាយថា ក្រៅពីការរៀនសរសេរកូដ ពួកគេបានរៀនអំពីរបៀបគូរ របៀបបង្កើតសាច់រឿង ការបង្កើតដំណោះស្រាយនៅពេលជួបបញ្ហា និងសិក្សា ដើម្បីយល់អំពីដំណោះស្រាយទាំងនោះ ម្ដងមួយជំហាន ម្ដងមួយជំហាន។ នាងបន្ថែមថា ជាពិសេស នាងទទួលបានឱកាសបន្ថែម ក្នុងការពង្រឹងជំនាញទន់ និងការធ្វើការងារជាក្រុម។

“យើងក៏បានរៀនអំពីរបៀបធ្វើការជាក្រុម និងយល់ពីគ្នាទៅវិញទៅមក កាន់តែប្រសើរ។ ពេលចូលរួមក្នុងកម្មវិធី Game Changers ខ្ញុំគិតថា ហ្គេមគឺសម្រាប់តែការកម្សាន្តប៉ុណ្ណោះ។ ឥឡូវនេះខ្ញុំឃើញថា ពួកគេអាចដោះស្រាយបញ្ហាពិតប្រាកដបាន…”

លោក Ignacio Aguirre ប្រធានផ្នែកទីផ្សាររបស់ Bitget បានមានប្រសាសន៍ថា លោកចាប់អារម្មណ៍យ៉ាងខ្លាំង លើការតាំងចិត្ត និងទេពកោសល្យរបស់យុវជនកម្ពុជា។ លោកបន្ថែមថា នៅ Bitget យើងជឿជាក់ថា មនុស្សគ្រប់គ្នា គួរតែទទួលបានឱកាសបំពាក់ជំនាញ ដើម្បីចូលរួមក្នុងពិភពឌីជីថល រាប់ចាប់តាំងពីការសរសេរកូដ និងការឌីហ្សាញ រហូតដល់វិស័យដែលកំពុងរីកចម្រើន ដូចជា បច្ចេកវិទ្យា Block chain ជាដើម។

សូមជំរាបថា កាលពីថ្ងៃសុក្រ ចុងសប្ដាហ៍កន្លងទៅ កម្មវិធី National Game Jam ត្រូវ​បានរៀបចំរួមគ្នាដោយ UNICEF និងក្រសួងអប់រំ យុវជន និងកីឡា (MoEYS) ដោយ​មានសិស្សជាង ៦០០ នាក់ (ជាង ៦៥ ភាគរយជាក្មេងស្រី) ដែលមានអាយុពី ១០ ទៅ ១៨ ឆ្នាំមកពីសាលារៀនចំនួន ១៤ នៅទូទាំងខេត្តចំនួន ១១ បានបង្ហាញហ្គេមវីដេអូដើមរបស់ពួកគេទៅកាន់គណៈវិនិច្ឆ័យ ដែលជាអ្នកជំនាញ បន្ទាប់ពីដំណើរសិក្សារយៈពេលប្រាំមួយសប្តាហ៍។ គម្រោងរបស់ពួកគេ ត្រូវបានបង្កើតឡើង ដោយផ្អែកលើបទពិសោធន៍ផ្ទាល់ខ្លួន និងបញ្ហាដែលប៉ះពាល់ដល់សហគមន៍របស់ពួកគេ ដោយបង្ហាញពីតួនាទីរបស់បច្ចេកវិទ្យាក្នុងការជួយឱ្យយុវជនក្លាយជាអ្នកដោះស្រាយបញ្ហា និងអ្នកបង្កើតថ្មីក្នុងសម័យឌីជីថល៕