ក្រសួងអប់រំ យុវជន និងកីឡា ក្រោម​កិច្ច​សហការជាមួយអង្គការ​យូនីសេហ្វ បានប្រកាសពីការ​​រៀបចំការប្រកួតប្រជែងថ្នាក់ជាតិលើកទី២ ឆ្នាំ២០២៥ “កម្មវិធីអប់រំបង្កើតហ្គេម” ដើម្បីចូលរួមគាំទ្រការអប់រំបែបឌីជីថលនៅកម្ពុជា និងពង្រីកវិសាលភាពនៃការចូលរួមរបស់កុមារី ឱ្យចាប់យកការសិក្សាលើការអប់រំស្ទែម បច្ចេកវិទ្យា និងសហគ្រិនភាព។

បើតាម​ក្រសួងអប់រំ កម្មវិធីនេះ ជាការជំរុញលើកទឹកចិត្តកុមារីឱ្យក្លាយជាអ្នកអភិវឌ្ឍហ្គេមជាដំណោះស្រាយបញ្ហាក្នុងសហគមន៍ ប្រែក្លាយពីអ្នកលេងហ្គេមទៅជាអ្នកបង្កើតថ្មីប្រកបដោយភាពច្នៃប្រឌិត លើកកម្ពស់ការសិក្សាបែបសកម្មដែលជាតម្រូវការចាំបាច់ សម្រាប់ការបរិវត្តកម្មអប់រំ ជាពិសេសលុបបំបាត់គម្លាតយេនឌ័រ។

លក្ខខណ្ឌនៃការចូលរួម ៖ ត្រូវជាសិស្សស្រីដែលមានអាយុចាប់ពី ១០ឆ្នាំ ដល់ ១៨ឆ្នាំ, ត្រូវបង្កើតជាក្រុមដែលមានសមាជិកចាប់ពី ០២នាក់ ទៅ ០៥នាក់, ជាសិស្សានុសិស្សដែលកំពុងរៀននៅតាមគ្រឹះស្ថានសិក្សាសាធារណៈ ឬឯកជន, មានការប្តេជ្ញាចិត្តខ្ពស់ក្នុងការប្រើប្រាស់បច្ចេកវិទ្យាឌីជីថល និងការសិក្សាស្រាវជ្រាវ, មានការគាំទ្រពី​គណៈគ្រប់គ្រងសាលារៀន មាតាបិតាឬអ្នកអាណាព្យាបាល ឱ្យចូលរួមកម្មវិធីប្រកួត។

ចំពោះអត្ថប្រយោជន៍ទទួលបាន រួមមាន អភិវឌ្ឍជំនាញបច្ចេកវិទ្យា ការអប់រំសរសេរកូដ ភាពច្នៃប្រឌិត ការរចនា និងសហគ្រិនភាព, ផ្តល់ជំនាញដល់កុមារីកម្ពុជាដើម្បីត្រៀមខ្លួនក្នុងការដោះស្រាយបញ្ហាជុំវិញការអភិវឌ្ឍ​សហគមន៍​ដោយប្រើប្រាស់បច្ចេកវិទ្យាឌីថលជាដំណោះស្រាយ, បង្ហាញសក្តានុពលនៃភាពជោគជ័យរបស់កុមារីនិងក្មេងស្រី លើការអប់រំបច្ចេកវិទ្យា និងសហគ្រិនភាព, ចេះធ្វើការងារជាក្រុម និងអភិវឌ្ឍបំណិនសតវត្សទី២១។

ដំណើរការចូលរួមកម្មវិធី ៖ សិស្សានុសិស្សអាចធ្វើការស្វ័យសិក្សាអំពីកម្មវិធីអប់រំបង្កើតហ្គេម (វីដេអូមេរៀន) នៅសាលាឌីជីថលរបស់ក្រសួងអប់រំ យុវជន និងកីឡា តាមរយៈតំណ៖ https://link.moeys.gov.kh/gcclearningkh ជាភាសាខ្មែរ និងអាចសិក្សាជាភាសាអង់គ្លេសបាននៅលើគេហទំព័រ Agora របស់អង្គការយូនីសេហ្វ តាមរយៈតំណ៖ https://link.moeys.gov.kh/gcconlinecourse

សម្រាប់សិស្សានុសិស្សដែលមានបំណងចង់ចូលរួមកម្មវិធីប្រកួតប្រជែងថ្នាក់ជាតិ “កម្មវិធីអប់រំបង្កើតហ្គេម” សូមដាក់ពាក្យស្នើសុំតាមរយៈតំណ៖ https://link.moeys.gov.kh/GameJam25 ។ ផុតកំណត់ដាក់ពាក្យនៅថ្ងៃទី០២ ខែធ្នូ ឆ្នាំ២០២៥ វេលាម៉ោង ០៥:០០ល្ងាច។

គួរជំរាបជូនថា កម្មវិធីអប់រំបង្កើតហ្គេម គឺជាកម្មវិធីអប់រំនវានុវត្តន៍បច្ចកវិទ្យាបានអនុវត្តសាកល្បងកាលពីឆ្នាំ២០២៣ នៅតាមបណ្តាប្រទេសចំនួន៨ រួមមាន៖ ប្រទេសអាមេនី ប្រទេសប្រេស៊ីល ប្រទេសកម្ពុជា ប្រទេសឥណ្ឌាប្រទេសកាហ្សាក់ស្ថាន ប្រទេសម៉ារ៉ុក ប្រទេសម៉ាឡេស៊ី និងប្រទេសអាហ្វ្រិកខាងត្បូង ដែលមានអ្នកចូលរួមជាង១៥៤ ០០០ នាក់ជុំវិញពិភពលោក។ សម្រាប់ព្រះរាជាណាចក្រកម្ពុជា កម្មវិធីនេះបានផ្ដល់ផលជះជាវិថីមានជាច្រើនដល់សិស្សានុសិស្សតាមរយៈការសិក្សាផ្អែកលើគម្រោង ផ្ដល់ឱ្យសិស្សបង្កើននូវបំណិនសំខាន់ចាំបាច់ក្នុងការបង្កើតថ្មី ការត្រិះរិះពិចារណា ការស្វែងរកឬសគល់នៃបញ្ហា និងដំណោះស្រាយ ការសិក្សាបែបសកម្ម ដែលជាតម្រូវការចាំបាច់សម្រាប់បរិបទថ្មីនៃការអប់រំ ជាពិសេសលុបបំបាត់គម្លាតយេនឌ័រ ដោយបានលើកកម្ពស់ការចូលរួមរបស់សិស្សស្រីលើការអប់រំស្ទែម បច្ចេកវិទ្យា និងសហគ្រិនភាពផងដែរ៕