ទិវាអក្ខរកម្មអន្តរជាតិឆ្នាំ២០២៣នេះ ប្រារព្ធឡើងក្រោមប្រធានបទ «អក្ខរកម្មជាមូលដ្ឋានគ្រឹះនៃសហគ្រិនភាព និងសេដ្ឋកិច្ច» ។ នេះបង្ហាញពីការជួយពង្រឹងគ្នាទៅវិញទៅមករវាងអក្ខរកម្ម សហគ្រិនភាព និងផ្នែកសេដ្ឋកិច្ច និងបង្ហាញពីចំណុចកណ្ដាលនៃអក្ខរកម្ម ដើម្បីសន្តិភាពនិងការអភិវឌ្ឍន៍ប្រកបដោយចីរភាពនៅកម្ពុជា។

ក្នុង​ឱកាសអបអរសាទរទិវាអក្ខរកម្មអន្តរជាតិ លោក Sardar Alam Umar តំណាងអង្គការយូណេស្កូប្រចាំកម្ពុជា មានប្រសាសន៍ថា គោលបំណងនៃទិវាអក្ខរកម្មអន្តរជាតិឆ្នាំនេះ គឺដើម្បីជំរុញការយកចិត្តទុកដាក់ និងការវិនិយោគលើអក្ខរកម្ម និងការអប់រំនៅក្នុងពិភពលោកដែលមានការផ្លាស់ប្ដូរយ៉ាងឆាប់រហ័ស និងការប្រែក្លាយទៅជាការអប់រំតាមបែបឌីជីថលឱ្យកាន់តែខ្លាំងឡើង។

«វាជាឱកាសដ៏សំខាន់មួយសម្រាប់ពួកយើងដើម្បីបញ្ជាក់សារជាថ្មីឡើងវិញនូវការប្ដេជ្ញាចិត្តរបស់យើងអំពីឥទ្ធិពលបរិវដ្តកម្មនៃអក្ខរកម្ម ដែលជាសិទ្ធិមនុស្សដ៏សំខាន់ និងជាស្នូលនៃការអភិវឌ្ឍន៍របស់មនុស្សគ្រប់រូប និងការរួមចំណែករបស់វានៅក្នុងការអភិវឌ្ឍន៍សង្គម និងសេដ្ឋកិច្ចរបស់ប្រទេសមួយ»

លោក Sardar Alam Umar តំណាងអង្គការយូណេស្កូប្រចាំកម្ពុជា

លោក Sardar Alam Umar មានប្រសាសន៍បន្ថែមថា នៅប្រទេសកម្ពុជា អង្គការយូណេស្កូបាននិងកំពុងផ្ដោតលើ កិច្ចខិតខំប្រឹងប្រែងរបស់ខ្លួនតាមរយៈកម្មវិធីអក្ខរកម្មនៅតាមរោងចក្រ (FLP) ដើម្បីលើកកម្ពស់អក្ខរកម្ម និងបំណិនលេខនព្វន្តដល់កម្មករកាត់ដេរ ដែលមានកម្រិតការអប់រំទាប និងដែលបានបោះបង់ចោលការសិក្សានៅថ្នាក់ដំបូង មកពីតំបន់ជនបទតាមរយៈភាពជាដៃគូតែមួយគតជាមួយរោងចក្រកាត់ដេរ។ ក៏ប៉ុន្តែដូចគ្នាទៅនឹងប្រទេសដទៃទៀតនៅក្នុងពិភពលោក កម្ពុជាកំពុងតែមានការផ្លាស់ប្ដូរយ៉ាងឆាប់រហ័ស។

តំណាងអង្គការយូណេស្កូប្រចាំកម្ពុជា បន្តថា ដើម្បីធានាកម្លាំងពលកម្មកម្ពុជា រួមទាំងការចេះអក្សរ លេខនព្វន្ត និងមានចំណេះដឹងផ្នែកឌីជីថល ត្រៀមខ្លួនជាស្រេចសម្រាប់ការងារនាពេលអនាគត ចាំបាច់ត្រូវមានការវិនិយោគបន្ថែមលើហេដ្ឋារចនាសម័្ពន្ធឌីជីថល និងកម្មវិធីបណ្ដុះបណ្ដាលជំនាញឌីជីថលដ៏ទូលំទូលាយដែលផ្ដោតលើប្រជាជនកម្ពុជាគ្រប់វ័យ តាមរយៈការអប់រំក្នុងប្រព័ន្ធ ក្រៅប្រព័ន្ធ និងការអប់រំមិនផ្លូវការ។

«យើងបណ្ដុះវប្បធម៌នៃការរៀនសូត្រពេញមួយជីវិត ដោយការលើកទឹកចិត្តប្រជាជនកម្ពុជាឱ្យបន្តបង្កើនជំនាញរបស់ពួកគេ ដើម្បីរក្សាល្បឿនស្របជាមួយនឹងការផ្លាស់ប្ដូរនៅក្នុងផ្នែកសេដ្ឋកិច្ច និងសង្គម» ។

លោក Sardar Alam Umar តំណាងអង្គការយូណេស្កូប្រចាំកម្ពុជា

លោក Sardar Alam Umar បញ្ជាក់ថា អង្គការយូណេស្កូ នៅតែប្ដេជ្ញាចិត្តក្នុងការវិនិយោគលើអនាគតដ៏ត្រចះត្រចង់សម្រាប់ប្រទេសកម្ពុជា ដែលអក្ខរកម្ម និងការអប់រំ លើកកម្ពស់និងផ្ដល់អំណាចដល់មនុស្សគ្រប់គ្នា ហើយធានាថា គ្រប់គ្នាមានលទ្ធភាពទទួលបានការអប់រំប្រកបដោយគុណភាពរួមទាំងអក្ខរកម្ម និងជំនាញឌីជីថល។

យោងតាម​លទ្ធផល​ជំរឿន​​ទូទៅ​ប្រជាជន​នៅ​ព្រះរាជាណាចក្រកម្ពុជា​ឆ្នាំ​២០១៩ អត្រា​ចេះ​អាន​សរសេរ​ក្នុងចំណោម​ប្រជាជន​កម្ពុជា​សរុប​អាយុ ៧ ​ឆ្នាំ​ឡើង​បាន​កើនឡើង​ពី ៧៨,៤ ​ភាគរយ​ក្នុង​ឆ្នាំ​២០០៨ ដល់​ ៨៨,៥ ភាគរយ​ក្នុង​ឆ្នាំ​២០១៩​។ អត្រា​អក្ខរភាព​មនុស្សពេញវ័យ​មាន​ការផ្លាស់ប្តូរ​គួរឱ្យ​កត់សម្គាល់​នៅក្នុង​តំបន់​ទីប្រជុំជន​ដែល​មាន​អត្រា​ជាង៩៣ ​ភាគរយ ​ធៀប​នឹង​ជនបទ​មាន​អត្រា​ជិត ៨៤ ​ភាគរយ​។

គួរជម្រាបជូនថា ទិវាអក្ខរកម្មអន្តរជាតិ ៨ កញ្ញា ត្រូវបានប្រារព្ធឡើងដំបូងឡើយដោយអង្គការយូណេស្កូ ក្នុងឆ្នាំ១៩៦៦ ដើម្បីក្រើនរំឭកដល់សហគមន៍អន្តរជាតិអំពីសារៈសំខាន់នៃអក្ខរកម្មសម្រាប់បុគ្គល សហគមន៍ សង្គម និងតម្រូវការផ្សេងៗ ដើម្បីកសាងសង្គមជាតិដែលមានអ្នកចេះដឹង៕