សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា កាលពីចុងសប្តាហ៍នេះ បានបញ្ជាក់​ពី​ការ​ដាក់ចេញ​នូវ​គោលនយោបាយ​អនុគ្រោះជា​បន្ត​បន្ទាប់​របស់រាជរដ្ឋាភិបាល សំដៅ​លើកទឹកចិត្ត និង​ជួយ​សម្រួល​ដល់វិស័យ​អប់រំ ជាពិសេស​ដើម្បី​ជួយ​សម្រាល​បន្ទុក​ចំណាយ​ដល់សាកលវិទ្យាល័យ សាលា​រៀន ក៏​ដូចជា​ឪពុកម្តាយ អ្នកអាណាព្យាបាល និង​សិស្ស និស្សិត។

បើតាម​សម្តេចធិបតី ក្នុង​អង្គប្រជុំ​ថ្ងៃទី២៨ ខែឧសភា ឆ្នាំ២០២៤ សម្តេច​បានសម្រេច​ផ្តល់​នូវ​ការ​លើកទឹកចិត្ត​ចំនួន០៣ ចំណុច ដល់គ្រឹះស្ថានអប់រំ ដោយបន្ត​អនុគ្រោះ​ពន្ធមួយ​ចំនួន ដូចជា ពន្ធលើប្រាក់ចំណូល ប្រាក់រំដោះពន្ធលើប្រាក់ចំណូល ពន្ធអប្បបរមា អាករលើតម្លៃបន្ថែម និងពន្ធកាត់ទុកលើសេវាការប្រាក់ និងភាគលាភ ចាប់ពីឆ្នាំ២០២៤ រហូតដល់ដំណាច់ឆ្នាំ២០២៨។

ដើម្បីសម្រាលបន្ទុកដល់ឪពុកម្តាយ អ្នកអាណាព្យាបាល និងក្មួយៗ សិស្ស-និស្សិត ក្នុងការបង់ថ្លៃសិក្សានៅតាមគ្រឹះស្ថានសិក្សា សម្តេចបានប្រគល់ភារកិច្ចជូន ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា សមាគមគ្រឹះស្ថានឧត្តមសិក្សាកម្ពុជាដែលមានសមាជិក ១៤១ និងសហព័ន្ធសេវាអប់រំនៃកម្ពុជាដែលមានសមាជិក ១២០ ដើម្បីពិនិត្យលទ្ធភាពមិនដំឡើងថ្លៃសិក្សាសម្រាប់ឆ្នាំសិក្សាថ្មីនេះ ក៏ដូចជាពិនិត្យលទ្ធភាពជាក់ស្ដែងក្នុងការបញ្ចុះថ្លៃសិក្សាសម្រាប់សិស្ស-និស្សិត។

តាមប្រសាសន៍សម្តេចធិបតី ជាលទ្ធផល សមាគមគ្រឹះស្ថានឧត្ដមសិក្សាកម្ពុជា បានឯកភាពមិនដំឡើងថ្លៃសិក្សាសម្រាប់ឆ្នាំសិក្សាថ្មី ២០២៤-២០២៥ នេះ ហើយគ្រឹះស្ថានសិក្សាទាំងអស់នឹងពិនិត្យលទ្ធភាពបញ្ចុះតម្លៃសិក្សាជូន សិស្ស-និស្សិត ទៅតាមលទ្ធភាពរៀងៗខ្លួន។ ដោយឡែក ចំពោះសហព័ន្ធសេវាអប់រំនៃកម្ពុជា ក៏បានឯកភាពមិនដំឡើងថ្លៃសិក្សាសម្រាប់ឆ្នាំសិក្សា ២០២៥-២០២៦ (ដោយសារសម្រាប់ឆ្នាំសិក្សា ២០២៤-២០២៥ គ្រឹះស្ថានសិក្សាជាច្រើនដែលជាសមាជិកសហព័ន្ធបានបើកបវេសនកាលតាំងពីខែកក្កដា ឬសីហា រួចទៅហើយ)។

ខ្ញុំសង្ឃឹមថាសកម្មភាពជាវិជ្ជមានរបស់បណ្ដាគ្រឹះស្ថានសិក្សាខាងលើនេះ នឹងជួយសម្រាលបន្ទុកបានមួយកម្រិតសម្រាប់ឪពុកម្តាយ អ្នកអាណាព្យាបាល និងក្មួយៗ សិស្ស-និស្សិតសម្រាប់ការសិក្សានេះ។

ក្នុងនាមរាជរដ្ឋាភិបាល សម្ដេចធិបតី ហ៊ុន ម៉ាណែត បានកោតសរសើរចំពោះស្មារតីសហការ និងសូមថ្លែងអំណរគុណចំពោះ សមាគមគ្រឹះស្ថានឧត្តមសិក្សាកម្ពុជា និងសហព័ន្ធសេវាអប់រំនៃកម្ពុជា ដែលបានយល់ស្របតាមសំណើរ ដោយមិនដំឡើងថ្លៃសិក្សាសម្រាប់ឆ្នាំសិក្សាថ្មី ក៏ដូចជាការពិនិត្យលទ្ធភាពបញ្ចុះថ្លៃសិក្សាជូនក្មួយៗ សិស្ស-និស្សិត ទៅតាមលទ្ធភាពរៀងៗខ្លួនរបស់គ្រឹះស្ថានអប់រំនីមួយៗ។

សម្រាប់លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងគីឡា លើកឡើងថា ការចូលរួម​របស់សមាគមគ្រឹះស្ថានឧត្តមសិក្សាកម្ពុជា ដែលមានសមាជិកចំនួន ១៤១ សុទ្ធជាគ្រឹះស្ថានឯកជនដែលបានបង្ហាញពីស្មារតីមិនតម្លើងថ្លៃសិក្សានេះ គឺជាការចូលរួមមួយដ៏សំខាន់ក្នុងការគាំទ្រការអប់រំ ការផ្តល់ឱកាសដល់យុវជន និងការចូលរួមលើកកម្ពស់មូលធនមនុស្សឈានទៅការអភិវឌ្ឍកម្ពុជា៕