សាកលវិទ្យាល័យចំនួន ១០ ត្រូវបានគេទទួលស្គាល់ថា ល្អបំផុតនៅអាមេរិក សម្រាប់ការផ្ដល់ជូននូវកម្មវិធីហាត់ការ និងកម្មវិធីសិក្សា ដែលរួមបញ្ចូលនូវការសិក្សាទ្រឹស្តី និងអនុវត្ត (Co-op program)។ ការសិក្សានៅសាលាទាំងនេះ ផ្ដល់ឱ្យសិស្សនូវបទពិសោធន៍ជាក់ស្ដែង និងការភ្ជាប់ទំនាក់ទំនងជាមួយដៃគូឧស្សាហកម្ម ដើម្បីពង្រឹងសមត្ថភាព និងកសាងរបស់និស្សិត។

ចំណាត់ថ្នាក់កំពូលទាំង ៦ គឺដូចគ្នាទៅនឹងឆ្នាំមុនដែរ ក្នុងនោះមានដូចជា សាកលវិទ្យាល័យ Northeastern, សាកលវិទ្យាល័យ Drexel, វិទ្យាស្ថានបច្ចេកវិទ្យា ហ្សកហ្ស៊ី, មហាវិទ្យាល័យ Berea, សាកលវិទ្យាល័យ Cincinnati និងវិទ្យាស្ថានបច្ចេកវិទ្យា Rochester ។ នេះបើយោងតាមចំណាត់ថ្នាក់ ដែលបានចេញផ្សាយដោយ US News & World Report ដែលជាស្ថាប័នត្រូវបានគេទទួលស្គាល់ តាមរយៈ ព័ត៌មានគួរឱ្យទុកចិត្ត ការផ្ដល់ចំណេះដឹងល្អៗសម្រាប់សិស្សនិស្សិត ការចាត់ចំណាត់ថ្នាក់សាលា និងការវិភាគអំពីកម្មវិធីសិក្សា។

សាកលវិទ្យាល័យ Purdue បានឡើងពីរចំណាត់ថ្នាក់បើធៀបនឹងឆ្នាំមុន ដោយជាប់ចំណាត់ថ្នាក់លេខ ៧ ស្មើគ្នានឹងវិទ្យាស្ថានបច្ចេកវិទ្យាម៉ាសាជូសេត (MIT) ។ សាកលវិទ្យាល័យ Carnegie Mellon បានឡើងចំណាត់ថ្នាក់ពីលេខ ១២ មកលេខ ៩ ស្មើគ្នានឹងសាកលវិទ្យាល័យ Elon ។

មហាវិទ្យាល័យ Barea មានភាពលេចធ្លោ និងទទួលបានការចាប់អារម្មណ៍ខ្លាំង ក្នុងចំណោមសាលាទាំង ១០ ព្រោះជាសាលាសិល្បៈសេរីតែមួយគត់ ដែលផ្ដល់ការបង្រៀនដោយឥតគិតថ្លៃសម្រាប់សិស្សទាំងអស់។ សម្រាប់និស្សិតអន្តរជាតិ នៅសាលាផ្សេងទៀត ត្រូវបង់ថ្លៃសិក្សាចាប់ពី ២៩,០០០ដុល្លារអាមេរិក ដល់ ៦៦,០០០ដុល្លារអាមេរិក ក្នុងមួយឆ្នាំ។

U.S News & World Report បានចាត់ថ្នាក់កម្មវិធីសិក្សានៅសាកលវិទ្យាល័យ និងមហាវិទ្យាល័យ ដែលផ្ដល់ជូនកម្មវិធីសិក្សា ដែលមានគុណភាពខ្ពស់ សម្រាប់ការសិក្សានៅបរទេស, ការផ្ដល់សេវាកម្មសិក្សា និងកម្មវិធីសិក្សាពិសេសៗផ្សេងទៀត ដែលជាប់ទាក់ទងទៅនឹងភាពជោគជ័យរបស់សិស្ស និងលទ្ធផលសិក្សាវិជ្ជមាន។ ការចាត់ថ្នាក់នេះ ត្រូវបានកំណត់ដោយ លក្ខខណ្ឌចំនួន ៨ ជាមួយនឹងការចូលរួមវាយតម្លៃពីអ្នកជំនាញផ្នែកអប់រំ រួមទាំង បុគ្គលិកនៃសមាគមមហាវិទ្យាល័យ និងសាកលវិទ្យាល័យអាមេរិក។

នៅឆ្នាំ ២០២៤ មានសាលារៀនជាង ១៥០០ ត្រូវបានអញ្ជើញឱ្យចូលរួម ក្នុងការវាយតម្លៃនេះ។ ក្នុងនោះមានសាលាចំនួន ១៥ ដែលត្រូវបានគេវាយតម្លៃថា មានកម្មវិធីសិក្សាល្អបំផុត បើយោងតាមលក្ខខណ្ឌចំនួន ៨ រួមមាន៖ បទពិសោធន៍សិក្សាឆ្នាំសិក្សាមូលដ្ឋាន, ការហាត់ការ និងការសិក្សាទ្រឹស្តី និងអនុវត្ត (Co-ops), សហគមន៍សិក្សា (Learning Communities), ភាពប៉ិនប្រសប់របស់សិស្សក្នុងការបំពេញកិច្ចការ (Senior Capstone), សេវាកម្មសិក្សា, ការសិក្សានៅបរទេស, ការស្រាវជ្រាវកម្រិតបរិញ្ញាបត្រ/គម្រោងច្នៃប្រឌិត និងកម្មវិធីសិក្សាសម្រាប់ពង្រឹងសមត្ថភាពសរសេរ (Writing in the Disciplines)៕