ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងមុខងារសាធារណៈ បានប្រកាសទទួលស្គាល់បេក្ខភាពចំនួន១៤៩ ចូលរួមប្រកួតប្រជែងក្លាយជាអង្គភាពផ្តល់សេវាសាធារណៈគំរូ ឆ្នាំ២០២៥ ដោយក្នុងនោះរួមមាន អនុវិទ្យាល័យចំនួន៤៩ សាលាបឋមសិក្សាចំនួន៥០ និងមណ្ឌលសុខភាពចំនួន៥០ មកពី២៥ រាជធានី/ខេត្ត។
អង្គភាព១៤៩នេះ ត្រូវបានជ្រើសចេញពីក្នុងចំណោមអង្គភាពសរុបចំនួន៤៤៩០ ដោយឆ្លងកាត់ការវាយតម្លៃ តាមលក្ខណៈវិនិច្ឆ័យយ៉ាងល្អិតល្អន់ នៅកម្រិតក្រុង ស្រុក ខណ្ឌ និងកម្រិតរាជធានី ខេត្ត រួចមកហើយ ហើយចុងក្រោយនេះ រាជធានី ខេត្តនីមួយៗ បានបញ្ជូនអង្គភាពចំនួន២ ក្នុងមួយប្រភេទ រួមមាន អនុវិទ្យាល័យ សាលាបឋមសិក្សា និងមណ្ឌលសុខភាព ដើម្បីមកចូលរួមប្រកួតប្រជែងថ្នាក់ជាតិក្នុងឆ្នាំ២០២៥។
បើតាមក្រសសួងមុខងារសាធារណៈ អង្គភាពទាំង១៤៩ នឹងត្រូវធ្វើបទបង្ហាញសម្រាប់ការវាយតម្លៃជ្រើសសម្រាំងដំណាក់កាលបឋមនៅថ្នាក់ជាតិ នៅរាជធានីភ្នំពេញ។ ក្រោយការវាយតម្លៃបឋមនេះ គណៈកម្មការ នឹងចុះពិនិត្យដោយផ្ទាល់តាមអង្គភាពនីមួយៗ ដើម្បីជ្រើសសម្រាំងបេក្ខភាពដែលមានចំណាត់ល្អជាងគេ ឈានទៅការប្រកួតដំណាក់កាលចុងក្រោយ ដែលជាការវាយតម្លៃដោយផ្ទាល់ដោយ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធាន គ.វ.ជ. និងគណៈកម្មការ គ.វ.ជ.នៅថ្នាក់ជាតិ។
ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ មានប្រសាសន៍ថា អង្គភាពដែលបានចូលរួមប្រកួតប្រជែងពិតជាមានការវិវឌ្ឍពិតប្រាកដ និងការប្រែប្រួលជាវិជ្ជមានក្នុងការផ្តល់សេវាជូនប្រជាពលរដ្ឋ។
រដ្ឋមន្ត្រីក្រសួងមុខងារសាធារណៈ ក៏បញ្ជាក់ដែរថា ការវាយតម្លៃនេះ បាននិងកំពុងចូលរួមចំណែកយ៉ាងសកម្មក្នុងការលើកកម្ពស់ប្រសិទ្ធភាព និងគុណភាពនៃសេវាអប់រំ និងសុខាភិបាលមូលដ្ឋានដែលជាផ្នែកដ៏សំខាន់ក្នុងការសម្រេចអាទិភាពទី១ នៃយុទ្ធសាស្ត្របញ្ចកោណដំណាក់កាលទី១ គឺការកសាងធនធានមនុស្ស។ ជាងនេះ កម្មវិធីនេះ បានឆ្លើយតបយ៉ាងល្អប្រសើរទៅនឹងវិធានការក្នុងការកែទម្រង់រដ្ឋបាលសាធារណៈ ការកែទម្រង់វិស័យអប់រំ ការកែទម្រង់វិស័យសុខាភិបាល ការកែទម្រង់វិមជ្ឈការ និងវិសហមជ្ឈការ ការកែទម្រង់ការគ្រប់គ្រងហិរញ្ញវត្ថុសាធារណៈ និងការអភិវឌ្ឍវិស័យបរិស្ថាន ដែលនេះបង្ហាញពីការបំពេញការងារ ក្នុងជីវភាពនៃប្រព័ន្ធតួអង្គតែមួយ។
សូមជំរាបជូនថា ការប្រកួតអង្គភាពផ្តល់សេវាសាធារណៈគំរូ គឺជាកម្មវិធីប្រឡងប្រណាំងថ្នាក់ជាតិមួយដែលរៀបចំឡើងដោយរាជរដ្ឋាភិបាល (ដឹកនាំដោយក្រសួងមុខងារសាធារណៈ) ដើម្បីលើកកម្ពស់គុណភាព ប្រសិទ្ធភាព និងតម្លាភាពនៃការផ្តល់សេវាជូនប្រជាពលរដ្ឋ។
ការប្រឡងប្រណាំងនេះ មិនមែនធ្វើឡើងសម្រាប់គ្រប់ស្ថាប័នទាំងអស់នោះទេ ប៉ុន្តែផ្តោតលើអង្គភាពដែលផ្តល់សេវាផ្ទាល់ជូនប្រជាពលរដ្ឋច្រើនបំផុត ក្នុងវិស័យអាទិភាពរួមមាន វិស័យអប់រំ ៖ សាលាបឋមសិក្សា និងអនុវិទ្យាល័យ/វិទ្យាល័យរដ្ឋ, វិស័យសុខាភិបាល ៖ មណ្ឌលសុខភាព និងមន្ទីរពេទ្យបង្អែក និង រដ្ឋបាលមូលដ្ឋាន៖ រដ្ឋបាលឃុំ-សង្កាត់ និងការិយាល័យច្រកចេញចូលតែមួយ (OWSO)៕
