ក្រសួងអប់រំ យុវជន និងកីឡា ត្រៀមរៀបចំអនុវត្តគម្រោងកែលម្អការអប់រំកម្រិតមូលដ្ឋាន (Basics Education Improvement Project-BEIP) ដែលនឹងជួយពង្រឹងការត្រៀមខ្លួនរបស់កុមារតូចដើម្បីទទួលការអប់រំនៅកម្រិតបឋមសិក្សា។ គម្រោង BEIP មានរយៈពេលអនុវត្តចាប់ពីឆ្នាំ២០២៦ ដល់ឆ្នាំ២០៣០ ក្រោមហិរញ្ញប្បទានរបស់ធនាគារពិភពលោក។

ក្នុងកិច្ចប្រជុំជាមួយក្រុមបេសកកម្មធនាគារពិភពលោកស្តីពី វឌ្ឍនភាពនៃការរៀបចំសម្រាប់ការចាប់ផ្តើមអនុវត្តគម្រោងការអប់រំមូលដ្ឋាន (BEIP) នាពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានកោតសរសើរ និងថ្លែងអំណរគុណដល់ក្រុមការងារពាក់ព័ន្ធទាំងអស់ ជាពិសេសធនាគារពិភពលោក ដែលបានគាំទ្រទាំងផ្នែកថវិកា និងបច្ចេកទេសក្នុងការរៀបចំចងក្រងនូវឯកសារទស្សនៈទានប្រកបដោយចក្ខុវិស័យវែងឆ្ងាយ។

ឯកឧត្តមបណ្ឌិតសភាចារ្យ ហង់ជួន ណារ៉ុន បន្ថែមថា គម្រោងនេះបានរំលេចនូវសារៈសំខាន់នៃតួនាទីរបស់លោកគ្រូ អ្នកគ្រូ ក្នុងការជំរុញឱ្យសិស្សចង់រៀន ស្រលាញ់ការអាន និងសរសេរ លើកកម្ពស់លទ្ធផលសិក្សារបស់សិស្សតាមរយៈការចេះប្រើប្រាស់វិធីសាស្ត្របង្រៀនថ្មីក្នុងការអនុវត្តកម្មវិធីអំណានដំបូង និងគណិតដំបូង ការបង្រៀនសិស្សប្រកបដោយចិត្តគរុកោសល្យ មានភាពច្នៃប្រឌិតខ្ពស់ និងមានសមត្ថភាពក្នុងបង្កើតសម្ភារៈជំនួយដល់ការបង្រៀន។

បើតាមតំណាងក្រុមបេសកកម្មធនាគារពិភពលោក បានលើកឡើងថា ឯកសារទស្សនទានដើម្បីត្រៀមចាប់ផ្តើមការអនុវត្តគម្រោងការអប់រំកម្រិតមូលដ្ឋាន (BEIP) នេះ បានកំណត់នូវសមាសធាតុសំខាន់ៗ រួមមាន ទី១. ពង្រឹងការត្រៀមខ្លួនរបស់កុមារតូចដើម្បីទទួលការអប់រំនៅកម្រិតបឋមសិក្សា, ទី២. លើកកម្ពស់ប្រសិទ្ធផលការងារដើម្បីបង្កើនលទ្ធផលសិក្សារបស់សិស្ស , ពង្រឹងការអនុវត្តការបង្រៀនថ្នាក់ដំបូង (Early Grade Learning), វិនិយោគលើការពង្រឹងហេដ្ឋារចនាសម្ព័ន្ធការរៀននិងបង្រៀន ទី៣. ពង្រឹងសមត្ថភាពស្ថាប័នសម្រាប់ការគ្រប់គ្រងការអប់រំកម្រិតមូលដ្ឋាន ពង្រឹងការត្រួតពិនិត្យ និងការវាយតម្លៃគម្រោង (M&E) និងទី៤. ការឆ្លើយតបពេលមានអាសន្ន (Contingent Emergency Response)។

យ៉ាងណាក៏ដោយ បើ​តាមលោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា គម្រោងកែលម្អការអប់រំកម្រិតមូលដ្ឋាន (BEIP) កំពុងស្ថិតនៅក្នុងដំណាក់កាលនៃការសិក្សា ដែលមានគោលបំណងលើកកម្ពស់ការអប់រំកម្រិតមូលដ្ឋាន ជាពិសេសកម្រិតបឋមសិក្សា ក្នុងនោះមានការរៀបចំជាប្រព័ន្ធ ជំរុញធ្វើយ៉ាងណាឱ្យលទ្ធផលនៃការសិក្សារបស់សិស្សកាន់តែប្រសើរ និងឆ្លើយតបបំណិនសតវត្សរ៍ទី២១។

លោកជំទាវបន្ថែមថា គម្រោងកែលម្អការអប់រំកម្រិតមូលដ្ឋាន (BEIP) ជាគម្រោងដែលនឹងពង្រឹងវិសាលភាពគាំទ្រទាំងការងារគ្រូបង្រៀន ការគាំទ្រសិស្សតាមសាលារៀន និងជំរុញយ៉ាងណាឱ្យលទ្ធផលសិក្សារបស់សិស្សកាន់តែប្រសើរ និងធានាការអាន និងការសរសេររបស់សិស្សឱ្យស្របតាមអ្វីដែលបានគ្រោងទុក។

គួរជម្រាបជូនថា ធនាគារពិភពលោក ( World Bank) បានគាំទ្រវិស័យអប់រំនៅកម្ពុជាតាមរយៈគម្រោងអប់រំជាមូលដ្ឋាន (Basic Education 2025-2030) ដែលផ្តោតលើការលើកកម្ពស់គុណភាពនៃការអប់រំ និងការបណ្តុះបណ្តាលនៅគ្រប់កម្រិត ការអនុវត្តកំណែទម្រង់សាលារៀន ការពង្រឹងគុណភាពនៃការបណ្តុះបណ្តាល និងវិធីសាស្រ្តបង្រៀនរបស់គ្រូបង្រៀន និងការលើកកម្ពស់ការអប់រំឌីជីថល។

ដើម្បីបង្កើតផលជះលើគុណភាពនៃការអប់រំទូទៅ គម្រោងត្រូវផ្តោតលើការអប់រំថ្នាក់ដំបូង ការអប់រំឌីជីថល ការបង្រៀន និងការរៀនពេញមួយថ្ងៃ អាហារូបត្ថម្ភ និងសុខភាពសាលារៀន សម្រាប់ក្រុមជួបការលំបាក អភិបាលកិច្ចតាមវិស័យ និងការបណ្តុះបណ្តាលគ្រូ៕