ក្រសួងចំនួន៣ ដែល​រួមមាន ក្រសួងមហាផ្ទៃ ក្រសួងមុខងារសាធារណៈ និងក្រសួងកិច្ចការនារី កាលពីពេលថ្មីៗនេះ បាន​​បង្ហាញពី​កិច្ចសហការ ក្នុងការជំរុញផែនការយុទ្ធសាស្ត្រស្ដីពីការ​បង្កើនចំនួនស្ត្រីក្នុងមុខតំណែងគ្រប់គ្រង​នៅរដ្ឋបាលថ្នាក់ក្រោមជាតិ​ ដើម្បីលើកកម្ពស់ការអភិវឌ្ឍន៍ និងគ្រប់គ្រងធនធានមនុស្សរបស់រដ្ឋបាលថ្នាក់ក្រោមជាតិប្រកបដោយបរិយាបន្ន និងសមធម៌។

ក្នុងសិក្ខាសាលា​ផ្សព្វផ្សាយស្តីពី​ផែនការយុទ្ធសាស្ត្រស្តីពីការ​បង្កើនចំនួនស្ត្រីក្នុងមុខតំណែងគ្រប់គ្រង​នៅរដ្ឋបាលថ្នាក់ក្រោមជាតិ​ កាលពីពេលថ្មីៗនេះ លោកជំទាវ​ គឹម​ ស៊ីផាត់​ រដ្ឋលេខាធិកា​ប្រចាំការ​ក្រសួង​កិច្ចការ​នារី​ មានប្រសាសន៍ថា ផែនការយុទ្ធសាស្ត្រស្តីពីការ​បង្កើនចំនួនស្ត្រីក្នុងមុខតំណែងគ្រប់គ្រង​នៅរដ្ឋបាលថ្នាក់ក្រោមជាតិ​ គឺជាការបង្ហាញអំពីការគាំទ្រ និងប្តេជ្ញាចិត្តរួមគ្នា របស់ក្រសួងមហាផ្ទៃ ក្រសួងមុខងារសាធារណៈ ក្រសួងកិច្ចការនារី លេខាធិការដ្ឋាន គ.ជ.អ.ប និងរដ្ឋបាលថ្នាក់ក្រោមជាតិ ក្នុងសហថាមពលរួមគ្នា ដើម្បីលើកកម្ពស់តួនាទីស្ត្រីនៅក្នុងមុខតំណែងគ្រប់គ្រង នៅរដ្ឋបាលថ្នាក់ក្រោមជាតិ ព្រមទាំងបង្កើតបាននូវបរិយាកាសមេត្រីភាព និងលក្ខខណ្ឌអំណោយផលសម្រាប់ស្ត្រី នៅកន្លែងការងារ និងការអនុវត្តតួនាទីភារកិច្ច សក្តានុពលរបស់ខ្លួនបានពេញលេញ។

រដ្ឋលេខាធិកា​ប្រចាំការ​ក្រសួង​កិច្ចការ​នារី បញ្ជាក់បន្ថែមថា ការរៀបចំ និងដាក់ចេញឱ្យអនុវត្តផែនការយុទ្ធសាស្ត្រ ដំណាក់កាលទី២ ឆ្នាំ២០២៤-២០២៨ គឺយោងតាមលទ្ធផល មេរៀនបទពិសោធន៍ដែលទទួលបានពីការអនុវត្តផែនការយុទ្ធសាស្ត្រដំណាក់កាលទី១ ឆ្នាំ២០១៧-២០១៩ ព្រមទាំងបានឆ្លើយតបនឹងតម្រូវការអាទិភាពដែលបានចង្អុលបង្ហាញនៅក្នុងកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ ឆ្នាំ២០២១-២០៣០ និងស្ថានភាពជាក់ស្តែងនៅថ្នាក់ក្រោមជាតិ ព្រមទាំងមតិយោបល់របស់ដៃគូពាក់ព័ន្ធ។

លោកជំទាវ​ គឹម​ ស៊ីផាត់ បន្ថែមថា លទ្ធផលរំពឹងទុកនៃកម្មវិធីជាតិនេះ គឺរដ្ឋបាលថ្នាក់ក្រោមជាតិជ្រើសរើស និងគ្រប់គ្រងបុគ្គលិក រៀបចំផែនការ និងធនធានព្រមទាំងចាត់ចែងការផ្តល់សេវាសាធារណៈ និងការអភិវឌ្ឍមូលដ្ឋានដោយគ្មានការរើងអើង និងមិនប្រកាន់ជាតិសាសន៍ សាសនា ភេទ ជនដែលមានពិការភាព និងឆ្លើយតបដល់ក្រុមជនងាយរងគ្រោះនានាប្រកបដោយបរិយាបន្ន និងសមធម៌។

ផែនការយុទ្ធសាស្រ្តស្ដីពីការ​បង្កើនចំនួនស្ត្រីក្នុងមុខតំណែងគ្រប់គ្រង​នៅរដ្ឋបាលថ្នាក់ក្រោមជាតិ​ ត្រូវ​បាន​ផ្តោតលើយុទ្ធសាស្រ្តស្នូលចំនួន៤ រួមមាន ទី១. ការពិនិត្យ រៀបចំ និងកែសម្រួលគោលនយោបាយនិងលិខិតបទដ្ឋានគតិយុត្តនានា ដើម្បីជំរុញ ការលើកទឹកចិត្ត ក្នុងការបង្កើនចំនួនស្ត្រីក្នុងមុខតំណែងគ្រប់គ្រង និងមុខតំណែងវិជ្ជាជីវៈ នៅរដ្ឋបាលថ្នាក់ក្រោមជាតិ, ទី២. ការអភិវឌ្ឍសមត្ថភាពបុគ្គលិកជាស្ត្រីនៃរដ្ឋបាលរាជធានី ខេត្ត ក្រុង ស្រុក ខណ្ឌ, ទី៣.​ ការបង្កើតបរិយាកាសមេត្រីភាព និងលក្ខខណ្ឌអំណោយផលនៅកន្លែងបំពេញការងារ និងការ អនុវត្តតួនាទីភារកិច្ចរបស់ស្ត្រីនៅរដ្ឋបាលថ្នាក់ក្រោមជាតិ និង ទី៤. ការលើកកម្ពស់ប្រសិទ្ធភាពក្នុងការអនុវត្តផែនការយុទ្ធសាស្ត្រ ស្តីពីការបង្កើនចំនួនស្ត្រីក្នុងមុខតំណែងគ្រប់គ្រងនៅរដ្ឋបាលថ្នាក់ក្រោមជាតិ។

តាមទិន្នន័យឆ្នាំ២០២៣ ចំនួនមន្ត្រីរាជការជាស្ត្រីនៅរដ្ឋបាលថ្នាក់ក្រោមជាតិមាន ៥២,៥៧% នៃមន្ត្រីរាជការសរុប ១២២.៥៧៨ នាក់ ដែលនៅក្នុងនោះ ៖ (១) បុគ្គលិកជាស្ត្រីនៅរដ្ឋបាលរាជធានី ខេត្ត ក្រុង ស្រុក ខណ្ឌ ៤៥,៧៦% នៃចំនួន ៤៣.១៧០ នាក់ (២) បុគ្គលិកជាស្ត្រីបម្រើការងារនៅក្នុងវិស័យសុខាភិបាល ៥៦,៨៦% នៃចំនួន ២០.៥៤៣ នាក់ (៣) ក្នុងវិស័យអប់រំ (សាលាបឋមសិក្សាសាធារណៈ និងមត្តេយ្យសិក្សាសាធារណៈ) ៥៦,០៥% នៃចំនួន ៥៨.៨១២ នាក់ និង(៤) បុគ្គលិកជាស្ត្រីបម្រើការងារនៅក្នុងវិស័យសង្គមកិច្ច មណ្ឌលថែទាំកុមាររបស់រដ្ឋនៅរដ្ឋបាលរាជធានីខេត្ត៥៦,៦០% នៃចំនួន ៥៣ នាក់ ។

ដោយឡែក បើប្រៀបធៀបចំនួនស្ត្រី និងចំនួនបុរសដែលស្ថិតនៅក្នុងមុខតំណែងគ្រប់គ្រងនៅថ្នាក់រាជធានី ខេត្ត ក្រុង ស្រុក ខណ្ឌ បានបង្ហាញឱ្យឃើញថា ស្ត្រីមានចំនួនប្រមាណ ២៣,៩៤% នៃចំនួនមុខតំណែងគ្រប់គ្រងសរុប ២២.១៧២ នាទី តែប៉ុណ្ណោះ ដែលក្នុងនោះមុខតំណែងគ្រប់គ្រងនៅរដ្ឋបាលរាជធានី ខេត្តមាន ៣៣,៤៦% នៃចំនួនមុខតំណែងគ្រប់គ្រងសរុប ៥.០៦៨នាក់ និងមុខតំណែងគ្រប់គ្រងនៅរដ្ឋបាលក្រុង ស្រុក ខណ្ឌមាន ២១,១២% នៃចំនួនមុខតំណែងគ្រប់គ្រងសរុប ១៧.១០៤ នាក់៕