ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សមាគមអ្នកនិពន្ធខ្មែរ បានសម្រេចប្រគល់ជ័យលាភីពាន «កិត្តិគុណ» ដែលប្រសិទ្ធនាមថា «គរុវិជ្ជាចារ្យកវីនិពន្ធ» ជូនដល់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា ក្នុងឱកាសអបអរសាទរទិវាជាតិអំណានលើកទី១០។ ពាន «កិត្តិគុណ» នេះ ជាការបង្ហាញពីការទទួលស្គាល់គុណវឌ្ឍ និងគុណសម្បត្តិ ក្នុងបុព្វហេតុអក្សរសាស្រ្ត និងអក្សរសិល្ប៍ខ្មែរ។
ពាន «កិត្តិគុណ» ត្រូវបានបង្កើតដោយសម្ដេចអគ្គមហាសេនាបតីតេជោ ហ៊ុន សែន ប្រធានកិត្តិយសនៃសមាគមអ្នកនិពន្ធខ្មែរ ក្នុងគោលបំណងរំឭកនូវសេចក្ដីចងចាំអំពីការលះបង់ និងគុណបំណាច់ដ៏មហាថ្លៃថ្លារបស់បណ្ដាកវី អ្នកនិពន្ធគ្រប់ជំនាន់ជាប្រវត្តិសាស្រ្ត ក្នុងបុព្វហេតុនៃស្មារតីព្រលឹងជាតិខ្មែរ។
មកដល់បច្ចុប្បន្ន ឯកឧត្តមបណ្ឌិតសភាចារ្យ ហង់ជួន ណារ៉ុន បាននិពន្ធស្នាដៃចំនួន ៣៩ស្នាដៃ ដែលមានទាំងភាសាខ្មែរ អង់គ្លេស និងបារាំង។
ក្នុងពិធីអបអរសាទរ ទិវាជាតិអំណានលើកទី១០ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានប្រគល់ជ័យលាភីពាន «កិត្តិគុណ» ជូនដល់ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ដោយទទួលបានឈ្មោះថ្មីថា «គរុវិជ្ជាចារ្យកវីនិពន្ធ»។
សម្តេចកិត្តិសង្គហបណ្ឌិត ម៉ែន សំអន បានថ្លែងកោតសសើរចំពោះ ឯកឧត្តមបណ្ឌិតសភាចារ្យ ហង់ជួន ណារ៉ុន ដែលបានខិតខំបំពេញបេសសកម្មតាមតួនាទីភារកិច្ច និងជំរុញអភិវឌ្ឍន៍វិស័យអប់រំ យុវជន និងកីឡា ជាពិសេស ចូលរួមអភិវឌ្ឍមូលធនមនុស្ស ស្របតាមកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា។
ដោយឡែកដើម្បីលើកកម្ពស់អំណានឱ្យកាន់តែមានប្រសិទ្ធភាពថែមទៀតដល់សិស្សានុសិស្ស និស្សិត និងយុវជន សម្តេចកិត្តិសង្គហបណ្ឌិត ក៏បានលើកទឹកចិត្តដល់អ្នកនិពន្ធទាំងឡាយ សូមបន្ត និងបង្កើនការនិពន្ធ ការបោះពុម្ពស្នាដៃបន្ថែមទៀតឱ្យកាន់តែសម្បូរបែប ជាពិសេសការនិពន្ធជាភាសាខ្មែរ, ក្រសួង ស្ថាប័នពាក់ព័ន្ធ សូមបន្តរៀបចំឱ្យមានបណ្ណាល័យ ឬមជ្ឈមណ្ឌលរក្សាឯកសារឌីជីថល សម្រាប់សម្រួលដល់ការរកឯកសារ សៀវភៅសម្រាប់ការអាន, ក្រសួងអប់រំ យុវជន និងកីឡា ត្រូវបន្តពង្រីកការអនុវត្តឧត្តមានុវត្តន៍នៃកម្មវិធីអំណានថ្នាក់ដំបូងនៅបឋមសិក្សា កម្មវិធីកុមាររៀនកុមារចេះកម្មវិធីអក្ខរកម្មនៅតាមរោងចក្រ សហគ្រាស ពន្ធនាគារ ។ល។ គ្រឹះស្ថានសិក្សា មណ្ឌលសិក្សា ទីវត្តអារាមទាំងអស់សូមបន្ត និងខិតខំឱ្យអស់លទ្ធភាពក្នុងការបង្កើតបណ្ណាល័យ ឬជ្រុងអំណាន ដើម្បីឱ្យសិស្សានុសិស្ស និស្សិត សាមណសិស្ស សាមណនិស្សិត និងយុវជនគ្រប់រូបអាចទទួលបាន និងស្វែងរកឯកសារ និងសៀវភៅសម្រាប់ការអានបន្ថែម៕
