ក្នុងពិធីសំណេះសំណាលជាមួយសិស្សថ្នាក់ទី១២ នៃវិទ្យាល័យ ហ៊ុន សែន កងតាណឹង ខេត្តកំពង់ចាម ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និង កីឡា បានលើកទឹកចិត្តដល់សិស្សានុសិស្សដែល​កំពុង​ត្រៀមប្រឡងសញ្ញាបត្រមធ្យមសិក្សា​ទុតិយភូមិ ឬបាក់ឌុប សូម​កុំភិតភ័យបារម្ភខ្លាំង ដោយ​ត្រូវ​ហូបចុកនិងគេងឱ្យគ្រប់គ្រាន់ និងរៀបចំពេលវេលារម្លឹកមេរៀនឱ្យបានទៀងទាត់។

ជាមួយ​គ្នានេះ ឯកឧត្តមបណ្ឌិតសភាចារ្យ ហង់ជួន ណារ៉ុន ក៏​បានផ្តល់ជាដំបូន្មាន​ ដល់សិស្សានុសិស្សក្រោយ​ប្រឡងបាក់ឌុប​ជាប់ ​សូមព្យាយាមចាប់យកឱកាសអាហារូបករណ៍ តាមសាកលវិទ្យាល័យ ឬ ជំនាញវិជ្ជាជីវៈឱ្យបានសមស្របតាមសមត្ថភាព ឧបនិស្ស័យ និងចំណង់ចំណូលចិត្តរបស់ខ្លួន បង្ការការសម្រេចចិត្តខុសមួយគ្រា ដែល​នាំឱ្យបាត់បង់ឱកាសរៀនសូត្រ ខាតបង់ទាំងពេលវេលា និងធនធាន។

រដ្ឋមន្ត្រីក្រសួងអប់រំ បានអបអរសាទរចំពោះវឌ្ឍនភាពជាច្រើនរបស់វិទ្យាល័យ ហ៊ុន សែន កងតាណឹង ដោយគូសរំលេចពីការខិតខំប្រឹងប្រែងរបស់គណៈគ្រប់គ្រង លោកគ្រូ អ្នកគ្រូ វិទ្យាល័យនាឆ្នាំកន្លងទៅ រហូតអត្រាជាប់បាក់ឌុប៩៩% ដែលជាអត្រាមួយដ៏ខ្ពស់ នាំវិទ្យាល័យនេះបានជាប់ក្លាយជាសាលារៀនគំរូ។

ឯកឧត្តមបណ្ឌិតសភាចារ្យ បន្តថា តាមរយៈការប្រឡងសាកល្បងថ្មីៗនេះ នាំឱ្យប្អូនៗបេក្ខជនទាំងអស់អាចវាស់ស្ទង់កម្រិតសមត្ថភាព មើលឃើញពីបញ្ហាដែលប្រឈមនៅពេលប្រឡងយកមកសិក្សា និងកែតម្រូវព្រមទាំងខិតខំបន្ថែម ដើម្បីទទួលបានជោគជ័យក្នុងការប្រឡង។

ឯកឧត្តមបណ្ឌិតសភាចារ្យ ហង់ជួន ណារ៉ុន ក៏បានកោតសរសើរចំពោះការគាំទ្រពីសំណាក់មាតាបិតា អ្នកអាណាព្យាបាល និងការខិតខំប្រឹងប្រែងសង្វាតរៀនសូត្ររបស់សិស្សានុសិស្សផ្ទាល់ ដែលធ្វើឱ្យវិទ្យាល័យសម្រេចបានអត្រាប្រឡងជាប់ដល់ទៅ៩៩% ដែលនេះជាលទ្ធផលគួរជាទីមោទនៈបំផុត ដោយឯកឧត្តមជឿជាក់យ៉ាងមុតមាំថា វិទ្យាល័យ​កងតាណឹងនឹងអាចសម្រេចបានអត្រាជាប់១០០% សម្រាប់ការប្រឡងមធ្យមសិក្សាទុតិយភូមិនាពេលខាងមុខនេះ។

គួរជំរាបជូនថា ការប្រឡងមធ្យមសិក្សាទុតិយភូមិ (បាក់ឌុប) ឆ្នាំសិក្សា២០២៤-២០២៥ នឹងប្រព្រឹត្តិទៅនៅថ្ងៃទី១៨ និង១៩ ខែសីហា ឆ្នាំ២០២៥៕