ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ខណៈទិវាជាតិអំណានលើកទី៨ នឹងប្រព្រឹត្តទៅនៅថ្ងៃទី១១ ខែមីនា ចុងសប្តាហ៍នេះ ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានធ្វើការអំពាវនាវដល់សាធារណជន ជាពិសេសមាតាបិតា សូមនាំកូនៗមកចូលរួមការតាំងពិព័រណ៍សៀវភៅ ដែលចាប់ផ្តើមពីថ្ងៃទី១០ ដល់ថ្ងៃទី១២ ខែមីនា ដើម្បីឱ្យពួកគេចាប់អារម្មណ៍ និងលើកទឹកចិត្តដល់ការអាន។
បើតាមប្រសាសន៍លើកឡើងរបស់ ឯកឧត្តម ហង់ជួន ណារ៉ុន ការដែលនាំក្មេងៗចូលរួមឱ្យបានញឹកញាប់ក្នុងពិព័រណ៍សៀវភៅ ឬទៅតាមបណ្ណាល័យនានា វានឹងធ្វើឱ្យចិត្តពួកគេកាន់តែចូលចិត្តការអាន ខណៈដែលមានការចូលរួមអានសៀវភៅកាន់តែច្រើន វាប្រាកដណាស់ថានឹងធ្វើឱ្យចំណេះ ឬការយល់ដឹងគេកាន់ច្រើនដែរ។
ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា
“ក្រុមគ្រួសារចាំបាច់ត្រូវលើកទឹកចិត្តបណ្តុះឱ្យគាត់មានទម្លាប់អាន ហើយការបណ្តុះទម្លាប់អាននេះ គឺតាំងតែពីតូចមក ឱ្យគាត់ស្រឡាញ់សៀវភៅ ស្រឡាញ់ការអាន…”
សូមបញ្ជាក់ថា ដើម្បីជាការអបអរដល់ទិវាជាតិអំណានលើកទី៨ ដែលប្រារព្ធធ្វើនៅថ្ងៃទី១១ ខែមីនា ឆ្នាំ២០២៣ ក្រសួងអប់រំ បានរៀបចំឱ្យមានការតាំងពិព័រណ៍សៀវភៅ ចាប់ពីថ្ងៃទី១០ ដល់ថ្ងៃទី១២ ខែមីនា ឆ្នាំ២០២៣ ដែលមាន១១០ស្តង់ មកពី៨៧ស្ថាប័ន នៅវិទ្យាស្ថានបច្ចេកវិទ្យាកម្ពុជា ។ កម្មវិធីពិព័រណ៍សៀវភៅនេះ បើកទូលាយសម្រាប់មហាជនចូលរួមទស្សនា អាន និងជាវសៀវភៅបានដោយសេរី៕
