ភ្នំពេញ – ដោយសារ​ការរីកចម្រើន​ផ្នែកបច្ចេកវិទ្យា មនុស្ស​ស្ទើរ​តែគ្រប់រូប សុទ្ធសឹង​តែមាន​ទូរស័ព្ទដៃប្រើប្រាស់ ដោយករណីនេះ បានធ្វើ​ឱ្យ​សិស្ស​លែង​ផ្តោត​លើការអានសៀវភៅ ដែលនាំ​ឱ្យ​ការ​អាន​មានការធ្លាក់ចុះ ។ យ៉ាងណាក៏ដោយ​សម្រាប់កម្ពុជា ក្រសួងអប់រំ យុវជន និងកីឡា បានដាក់ចេញនូវ​គោលការណ៍ពង្រឹងអំណានដំបូង ដើម្បីទប់ទល់​នឹង​បញ្ហា​ខាងលើនេះ។

ក្នុងសន្និសីទសារព័ត៌មានស្តីពីការរៀបចំទិវាជាតិអំណានលើកទី៨ ឯកឧត្តម ហង់ជួន ណារ៉ុន រដ្ឋមន្រ្តី​ក្រសួងអប់រំ យុវជន និង​កីឡា បានមានប្រសាសន៍ថា កាលពីមុនសិស្សផ្តោត​តែទៅ​លើ​ការអានសៀវភៅ ប៉ុន្តែនៅពេលមានការរីកចម្រើនផ្នែកបច្ចេកវិទ្យា មានទូរស័ព្ទដៃច្រើន ​ការអានមានការធ្លាក់ចុះ ដោយនិន្នាការនេះ មិន​មែន​មានតែនៅ​កម្ពុជានោះទេ គឺមានទូទាំងពិភពលោក។ តាមការបញ្ជាក់របស់ ឯកឧត្តមរដ្ឋមន្រ្តី ទោះជាពេលខ្លះ​គេអាចអានបាននៅលើទូរស័ព្ទក៏ដោយ ប៉ុន្តែឯកឧត្តមយល់ឃើញថា ការអានដែលភាគច្រើន​នៅ​លើបណ្តាញសង្គម គឺមានសរសេរខុស មិន​ត្រឹម​ត្រូវតាមក្បួនវេយ្យាករណ៍​ជាដើម។

ឯកឧត្តម ហង់ជួន ណារ៉ុន បានបន្ថែម​ថា ក្នុង​ន័យនេះ ដើម្បីលើក​កម្ពស់ការអាន ក្រសួងអប់រំ​យុវជន និង​កីឡា បានដាក់ចេញ​នូវ​គោលការណ៍​មួយដើម្បីពង្រឹងការអានពីដំបូង ឬហៅថា អំណានដំបូង ដោយបង្រៀន​ចាប់ពីថ្នាក់ទី១ ដល់ទី៣។

តើអំណានដំបូងយ៉ាងដូចម្តេច?

បើតាមប្រសាសន៍​បញ្ជាក់របស់ ឯកឧត្តម ហង់ជួន ណារ៉ុន ភាសាខ្មែរ គឺជា​ភាសាមួយ​ដែលរៀន​ចាំបាច់​ត្រូវ​ឆ្លង​កាត់ការ​ប្រកប ខុសពីភាសាដទៃខ្លះ, ដូច្នេះគ្រូត្រូវចេះវិធីសាស្រ្ត​បង្រៀន​ឱ្យ​សិស្សចេះស្គាល់តួរអក្សរ ចេះស្គាល់សូរ ចេះយក​មក​ប្រកបគ្នា​រវាងស្រះ និង​ព្យញ្ជនៈ ហើយ​ឱ្យសិស្សចេះតែងឃ្លាល្បះដោយ​ខ្លួនឯង រៀនសរសេរ​ដោយ​ខ្លួនឯង។

ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ

“វិធីសាស្រ្តនេះគឺមាន៧ជំហាន ហើយមានវិធីសាស្រ្តបង្រៀន​ឱ្យសិស្ស​ឆាប់ចេះអាន ហើយ​បន្ទាប់គឺតម្រូវ​ឱ្យ​សិស្ស​អានសៀវភៅបន្ថែម…”

ជាមួយ​គ្នានេះ ឯកឧត្តម ហង់ជួន ណារ៉ុន ក៏​ជំរុញ​ឱ្យ​ឪពុកម្តាយត្រូវណែនាំកូនៗឱ្យ​អានសៀវភៅបន្ថែម ព្រមទាំង​សួរនាំទៅកូនៗ ដើម្បី​ឱ្យ​ពួកគេ​មានទម្លាប់អាន និងចូលបណ្ណាល័យ ។

ឯកឧត្តមរដ្ឋមន្រ្តីបានសង្កត់ធ្ងន់ថា ភាសាជាមូលដ្ឋានគ្រឹះ នៃការសិក្សារៀនសូត្រ ដូច្នេះ​ប្រសិនបើសិស្ស​មិន​អាចអាន និង​សរសេរមិនស្ទាត់ វានឹង​ធ្វើ​ឱ្យ​ប៉ះពាល់​ដល់​ការ​រៀន​ទៅ​លើ​មុខ​វិជ្ជាផ្សេងៗ ដូច្នេះ​ការពង្រឹងអំណានដំបូង គឺជា​ផ្នែក​មួយ នៃកំណែទម្រង់ដែលកម្ពុជាបានដាក់ចេញ៕