នៅក្នុងយុទ្ធសាស្រ្តបញ្ចកោណ របស់រាជរដ្ឋាភិបាលកម្ពុជាអាណត្តិទី៧ ដែលនឹងប្រសូត្រនាពេលខាងមុខ គេឃើញថា បច្ចេកវិទ្យា ជាមួយនឹងការបណ្តុះបណ្តាលធនធានមនុស្ស គឺស្ថិតក្នុងគោលនយោបាយអាទិភាព ដែលរដ្ឋាភិបាលថ្មីនឹងត្រូវគិតគូរ។

មានប្រសាសន៍នៅក្នុងពិធីសម្ពោធដាក់ឱ្យប្រើប្រាស់ជាផ្លូវការ ផ្លូវក្រវ៉ាត់ក្រុងទី៣ នាព្រឹកថ្ងៃទី៣ ខែសីហា ឆ្នាំ២០២៣ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា រាជរដ្ឋាភិបាលអាណត្តិមុនៗបានអនុវត្តនូវយុទ្ធសាស្រ្តត្រីកោណ បន្ទាប់មកចតុកោណ ដោយមាន៤ដំណាក់កាលមកហើយ, សម្រាប់រាជរដ្ឋាភិបាលអាណត្តិថ្មី នឹងចាប់ផ្តើមប្តូរទៅកាន់យុទ្ធសាស្រ្តបញ្ចកោណ ដោយថែមមុំមួយទៀត។

តាមប្រសាសន៍របស់សម្តេចតេជោ គោលនយោបាយអាទិភាពដែលនឹងត្រូវអនុវត្តសម្រាប់យុទ្ធសាស្រ្តបញ្ចកោណ គឺមាន មនុស្ស ទឹក ផ្លូវ ភ្លើង និងបច្ចេកវិទ្យា។

សម្តេចតេជោ ហ៊ុន សែន មានប្រសាសន៍បញ្ជាក់ថា សភាពការណ៍ថ្មី គឺមិនអាចនៅទ្រឹងត្រឹមយុទ្ធសាស្រ្តចតុកោណនោះទេ ដូច្នេះ ការចាប់យកបច្ចេកវិទ្យា គឺជាគោលដៅ ជាមួយនឹងការបណ្តុះបណ្តាលធនធានមនុស្ស ដែលជាកិច្ចការសំខាន់របស់យើងសម្រាប់ការអភិវឌ្ឍប្រទេស។

… ខ្ញុំនិយាយបានថា អ្នកជំនាន់បន្តគេបានត្រៀមខ្លួនរួចរាល់ហើយ ហើយអ្វីដែលខ្ញុំបានដឹង នោះគឺការរៀបចំយុទ្ធសាស្រ្តបញ្ចកោណដំណាក់កាលទី១ …យើងបានធ្វើពីដំណាក់កាលត្រីកោណ មកដំណាក់កាលចតុកោណចំនួន៤ដំណាក់កាលហើយ យើងចាប់ផ្តើមដូរទៅកាន់យុទ្ធសាស្រ្តបញ្ចកោណ ដោយថែមមុំមួយទៀត…

សម្តេចអគ្គមហាសេនាបតីតេជោ ហ៊ុន សែន

សូមបញ្ជាក់ថា វិទ្យាសាស្រ្ត បច្ចេកវិទ្យា និងនវានុវត្តន៍ ត្រូវបានទទួលស្គាល់ជាសកលថា ជាកម្លាំងចលករសម្រាប់ការអភិវឌ្ឍសេដ្ឋកិច្ចប្រកបដោយចីរភាព ធ្វើឱ្យកាន់តែប្រសើរឡើងនូវជីវភាពសង្គម និងផ្តល់ដំណោះស្រាយលើបញ្ហាបរិស្ថាន ដែលជាកត្តាមូលដ្ឋានគ្រឹះទាំងបីសម្រាប់ការរស់រានសុខសាន្តចីរកាលរបស់មនុស្សជាតិ ។ នៅក្នុងក្របខណ្ឌជាតិ ការវិនិយោគលើវិទ្យាសាស្រ្ត បច្ចេកវិទ្យា និងនវានុវត្តន៍ ត្រូវបានចាត់ទុកថា ជាយុទ្ធសាស្រ្ត និងគោលនយោបាយត្រឹមត្រូវ ដែលនឹងជួយឱ្យសម្តេចបាននូវយុទ្ធសាស្រ្តអភិវឌ្ឍន៍នានារបស់រាជរដ្ឋាភិបាល ឈានដល់ការសម្រេចបានចក្ខុវិស័យកម្ពុជាឆ្នាំ២៥០ សំដៅធ្វើឱ្យកម្ពុជាក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០ និងក្នុងក្របខណ្ឌអន្តរជាតិ គឺការសម្រេចបានគោលដៅអភិវឌ្ឍប្រកបដោយចីរភាព៕