ភ្នំពេញ – កម្លាំងពលកម្មជំនាញ ឬគេហៅថា កម្មករ​បច្ចេកទេស ដែលទទួលបានការ​បណ្តុះបណ្តាល​ជំនាញបច្ចេកទេស​វិជ្ជាជីវៈត្រឹមត្រូវ បច្ចុប្បន្ន​កំពុង​តែមានតម្រូវការខ្លាំង​ នៅ​ក្នុង​ទីផ្សារ​ការងារបច្ចុប្បន្ន។ នេះ​បើតាម​ប្រសាសន៍​លើក​ឡើងរបស់ ឯកឧត្តម ហ៊ីង ស៊ីដេត អគ្គនាយកអប់រំបណ្តុះបណ្តាលបច្ចេកទេស និងវិជ្ជាជីវៈ ក្នុងទិវា​ជាតិអប់រំបណ្តុះបណ្តាលបច្ចេកទេស និង​វិជ្ជាជីវៈ លើកទី៦។

តាមប្រសាសន៍របស់ ឯកឧត្តម ហ៊ីង ស៊ីដេត បច្ចុប្បន្ននេះ ក្នុង​មួយ​ឆ្នាំកម្ពុជាបណ្តុះបណ្តាលអ្នកជំនាញបច្ចេកទេសបានប្រមាណជិត ៩ម៉ឺននាក់ប៉ុណ្ណោះ ខណៈទីផ្សារ​ការងារត្រូវ​ការ​រហូត​ដល់ ៣០ម៉ឺននាក់​ក្នុងមួយ​ឆ្នាំ ដែលទាមទារ​ឱ្យ​មានការ​ផ្គត់ផ្គង់កម្លាំងពលកម្មបន្ថែមទៀត។

ឯកឧត្តមអគ្គនាយកបញ្ជាក់ថា ទីផ្សារ​ការងារបច្ចុប្បន្ន គឺត្រូវការអ្នកបច្ចេកវិទ្យា អ្នក​បច្ចេកទេស និង​អ្នក​មានជំនាញ ។ ឯកឧត្តម​បានលើកឧទាហរណ៍ពីប្រទេស​សឹង្ហបុរី ក៏ដូចជា​ប្រទេស​ស្វីស ដែល​ជាប្រទេស​កំពុង​មានការរីកចម្រើន អត្រាយុវជន ឬសិស្សនិស្សិតចុះឈ្មោះចូលរៀនក្នុងវិស័យ TVET គឺមានចំនួនច្រើន​ជាងសិស្សដែលចុះឈ្មោះចូលរៀន​នៅ​សាកលវិទ្យាល័យ ពោល​គឺសិស្ស​ដែលរៀន TVET គឺមានចំនួន២ភាគ៣ ខណៈ​សិស្សដែលចុះឈ្មោះរៀនសាកលវិទ្យាល័យ គឺមានត្រឹម​តែ ១ភាគ៣ប៉ុណ្ណោះ។ តាមឯកឧត្តម ហ៊ីង ស៊ីដេត ទៅថ្ងៃមុខ សាកលលោកនឹងលែងគិត​លើសញ្ញាបត្រហើយ ដោយ​គេ​គិត​ទៅលើសញ្ញាឃើញវិញ។

ឯកឧត្តម ហ៊ីង ស៊ីដេត ក៏​បានលើក​ឡើងពីអត្ថប្រយោជន៍នៃការ​រៀនជំនាញបច្ចេកទេស និង​វិជ្ជាជីវៈ ឬ TVET ដោយថា ការរៀន TVET គឺប្រើរយៈពេល​ខ្លី រៀនចប់មានប្រាក់ចំណូល។

“អញ្ចឹងរៀន TVET ប្រៀបដូចជាធនាគារមួយ គ្រាន់តែចេះជំនាញ យើង​ដើរទៅដល់ណាក៏យើងមានលុយដាក់ក្នុងហោប៉ៅដែរ…“

ឯកឧត្តម ហ៊ីង ស៊ីដេត អគ្គនាយកអប់រំបណ្តុះបណ្តាលបច្ចេកទេស និងវិជ្ជាជីវៈ

សូមបញ្ជាក់ថា បើយោង​តាមរបាយការណ៍​របស់ក្រសួងការងារ និង​បណ្តុះបណ្តាលវិជ្ជាជីវៈ នៅឆ្នាំ​២០២២កន្លងទៅនេះ សិស្សនិស្សិតដែលបញ្ចប់ការសិក្សាផ្នែកបច្ចេកទេស និង​វិជ្ជាជីវៈ មានចំនួន ៨៩ ៨៧៨នាក់ ក្នុងនោះកម្រិតសញ្ញាបត្របច្ចេកទេស និង​វិជ្ជាជីវៈ ១,២,៣ ចំនួន ១៦ ៧១៩នាក់, សញ្ញាបត្រជាន់ខ្ពស់បច្ចេកទេស/ឯកទេសចំនួន ៥៦៦៦នាក់ និង​បរិញ្ញាបត្របច្ចេកទេស/ឯកទេស/វិស្វករ ចំនួន ៦៦០៣នាក់ និង​វគ្គបណ្តុះបណ្តាលវិជ្ជាជីវៈរយៈពេល​ខ្លីចំនួន ២៤ ៧៣៥នាក់ និង​ការ​បណ្តុះបណ្តាលនៅ​តាម​កន្លែងធ្វើការចំនួន ៣៦ ១៥៥នាក់៕