ពេលរៀនគឺរៀនឱ្យពូកែ និងផ្តោតលើជំនាញណាមួយដែលសមស្របជាមួយសមត្ថភាព ឬសក្តានុពល ប៉ុន្តែមិនចាំបាច់ពូកែគ្រប់យ៉ាងនោះទេ។ ជ្រើសរើស រៀនជំនាញគឺជាផ្នែកសំខាន់ដែលឆ្លើយតបនឹងតម្រូវការបច្ចុប្បន្ន និងអនាគត ប៉ុន្តែក៏ត្រូវចាប់អារម្មណ៍ចំណេះទូទៅដែរ តាមរយៈការប្រឹងអភិវឌ្ឍខ្លួនឯងដោយការសិក្សា ទំនាក់ទំនង និងរៀនពីបទពិសោធនានា។ នេះជាប្រសាសន៍លើក​ឡើងរបស់ ឯកឧត្តម ថង សាម៉ុន ទីប្រឹក្សាអមក្រសួងការងារ និង​បណ្តុះ​បណ្តាល​វិជ្ជាជីវៈ និងជាអង្គនាយករង អ.ប.វ ថ្លែងនៅក្នុងកម្មវិធីជួបជុំអតីតនិស្សិត និងនិស្សិតកំពុងសិក្សាក្នុងវិទ្យាស្ថានបច្ចេកទេសឧស្សាហកម្ម កាលពីពេលថ្មីៗនេះ។

បន្ថែម​ចំពោះ​ការ​លើក​ឡើង​របស់ ឯកឧត្តម ថង សាម៉ុន នេះដែរ លោក ធៀវ អៀង ប្រធានក្រុមហ៊ុន អ៊ីស៊ី រីហ្រ្វីជើរេសិន ឯ.ក និងជាអតីតនិស្សិតវិទ្យាស្ថានបច្ចេកទេសឧស្សាហកម្ម ជំនាញបរិក្ខារត្រជាក់ លើក​ឡើងថា ដើម្បីឱ្យប្រាកដជាក់ថា ក្រោយរៀនជំនាញទទួលបានសមិទ្ធផលពិត គឺមិនអាចរំពឹងត្រឹមតែក្នុងរយៈពេលខ្លីនោះទេ គឺតម្រូវឱ្យមានភាពអត់ធ្មត់ និងការព្យាយាម។ ជាក់ស្ដែងក្រោយបញ្ចប់ការសិក្សាជំនាញ ខ្លួនលោកផ្ទាល់ បានចេញទៅធ្វើការដោយផ្តើមពីជាងធម្មតាៗ រហូតទទួលបានតួនាទីជាប្រធានផ្នែក និងជាអ្នកគ្រប់គ្រង ទើបក្រោយមកលោកបង្កើតក្រុមហ៊ុនផ្ទាល់ខ្លួនបាន។

«ក្លាយជាអ្នកជោគជ័យមិនមែនប្រើពេលមួយថ្ងៃ ទៅពីរថ្ងៃបាននោះទេ គឺត្រូវការហ្វឹកហាត់ចំណេះដឹង ប្រឹងឱ្យអស់លទ្ធភាព បើថាពូកែអី ប្រឹងហ្នឹងទៅ! ព្រោះជំនាញបច្ចេកទេសមិនមែន១បូក១ស្មើ៣ទេ ដូច្នេះត្រូវច្បាស់» – លោក ធៀវ អៀង ប្រធានក្រុមហ៊ុន អ៊ីស៊ី រីហ្រ្វីជើរេសិន ឯ.ក ។ 

ដោយឡែក លោកស្រី ប៉ែន បុប្ផា អគ្គនាយិកាក្រុមហ៊ុនឬទ្ធិពល មានប្រសាសន៍ថា អ្វីដែលយុវជនទូទៅត្រូវមានបន្ថែមពីលើជំនាញដែលសិក្សា មានដូចជា ស្គាល់ និងចេះច្បាស់នូវភាសាខ្មែរ, ចេះភាសាសកល(ឧទាហរណ៍៖ អង់គ្លេស), ការគិតបែបស៊ីជម្រៅ ហើយការផ្សារភ្ជាប់ការងារទៅនឹងឌីជីថលធ្វើឱ្យដំណើរការកាន់តែសំបូរបែបមួយកម្រិតបន្ថែមទៀត។

អ្នកស្រី បុប្ផា ក៏បានរំលេចដែរថា ចំណេះដឹងហិរញ្ញវត្ថុក៏មិនគួរមើលរំលងដែរ ព្រោះវាអាចជួយពួកគាត់ ឱ្យចេះបែងចែកការចំណាយបានត្រឹមត្រូវ និងនាំឱ្យកាត់បន្ថយសម្ពាធផ្លូវចិត្តបានមួយកម្រិតទៀត។ ទន្ទឹមគ្នានោះ ការស្រូបយកចំណេះដឹង ឬព័ត៌មានទូទៅក៏ជាផ្នែកមួយជំរុញឱ្យស្មារតីយុវជន មានភាពទូលំទូលាយជាងមុនដែរ ដោយការដឹងព័ត៌មានសេដ្ឋកិច្ច នយោបាយ វប្បធម៌ និងព្រឹត្តការណ៍នានា។ ក្រៅពីមានចំណេះ និងជំនាញ យុវជនក៏ត្រូវរស់នៅប្រកបដោយគុណធម៌ផងដែរ ព្រោះវាជាការទាក់ទាញទំនុកចិត្តពីអ្នកជុំវិញខ្លួន ក៏ដូចជាអតិថិជនដែលយើងផ្តល់សេវាកម្មជូន ហើយវាក៏ងាយស្រួលក្នុងទំនាក់ទំនងទៅពេលអនាគត៕