ជាធម្មតាស្ថាប័នកីឡាខុសៗគ្នា អាចប្រើលក្ខណៈវិនិច្ឆ័យ ក្នុងការកំណត់និយមន័យនៃភាពលំបាកនៃកីឡានីមួយៗខុសៗគ្នា។ កីឡាពិបាកខ្លាំងបំផុត គឺត្រូវការថាមពលខ្លាំងក្លា កាយសម្បទាមាំមួន ភាពធន់ ការស៊ូទ្រាំ និងភាពស្ទាត់ជំនាញ ។ យោងតាម ការវាយតម្លៃរបស់ស្ថាប័នមួយចំនួនដូចជា ESPN, Top End Sport, Bleacher Report’s take និង Sport Virsa បានកំណត់ប្រភេទកីឡាចំនួន៦ ដែលពិបាកហ្វឹកហាត់ និងប្រកួតខ្លាំងបំផុតនៅក្នុងពិភពលោក ហើយ​ប្រភេទកីឡាទាំងនោះ ក៏​មានឃើញ​នៅក្នុងការប្រកួត​នៅ​ព្រឹត្តិការណ៍​ស៊ីហ្គេមផងដែរ។

១. កីឡាប្រដាល់សកល (Boxing)

ប្រដាល់សកលត្រូវបានទទួលស្គាល់ជាទូទៅថា ជាប្រភេទកីឡា ដែលពិបាកខ្លាំងបំផុតលើពិភពលោក ។ ដើម្បីជោគជ័យក្នុងអាជីពមួយនេះ ទាមទារឱ្យអត្តពលិកមានកាយសម្បទារឹងមាំ ភាពរហ័សរហួន ល្បឿន និងភាពបត់បែនរហ័ស សុខភាពបេះដូងល្អ និងភាពស្ទាត់ជំនាញផ្នែកក្បាច់គុណ។

២. កីឡា​ហុកគី (Hockey)

ហុកគី ជាកីឡាមួយដែលទាមទារឱ្យមានការប្រើប្រាស់កម្លាំងច្រើន។ វារួមបញ្ចូលនូវការរត់ប្រជែងគ្នារយៈពេល ១ម៉ោង ហើយតម្រូវឱ្យកីឡាមានល្បឿនលឿន កម្លាំងខ្លាំង ពូកែពិតពាំង និងភាពរហ័សរហួនជាងគូប្រកួត។ នៅក្នុងកីឡានេះ កីឡាករត្រូវមានស្នៀតពិតពាំង ពូកែរត់ប្រដេញ ភាពច្នៃប្រឌិត ផ្លាស់​ប្ដូរទិសដៅបានរហ័ស និងសម្បូរយុទ្ធសាស្ត្រ។

៣. កីឡាបាល់ទឹក (Water-Polo)

មនុស្សទូទៅប្រហែលជាភ្លេច ឬមិនស្គាល់កីឡាបាល់ទឹកតែម្ដង ព្រោះកីឡានេះមិនសូវពេញនិយមដូចកីឡាលំបាកៗដទៃ។ ប៉ុន្តែវានៅតែប្រភេទកីឡាមួយ ដែលពិបាកលេងខ្លាំងបំផុត។ កីឡាករត្រូវរត់នៅក្នុងទឹក និងត្រូវប្រាកដថា មានស្មារតីខ្ពស់ក្នុងការការពារខ្លួនមិនឱ្យលង់ទឹក ខណៈពេលប្រជែងយកបាល់។ កីឡាបាល់ទឹក ទាមទារឱ្យកីឡាករ មានសុខភាពបេះដូងល្អ កម្លាំងខ្លាំង ល្បឿនលឿន មានភាពធន់ និងមានកាយសម្បទារឹងមាំ។

៤. កីឡាទ្រីយ៉ាត្លុង (Ironman Triathlon)

ព្រឹត្តិការណ៍កីឡាទ្រីយ៉ាងត្លុងស្ដង់ដារអន្តរជាតិ ត្រូវរួមបញ្ចូលនូវវិញ្ញាសាកីឡាចំនួនបីដូចជា ការហែលទឹក ៣,៨៦គីឡូម៉ែត្រ, ការជិះកង់ ១៨០គីឡូម៉ែត្រ, និងរត់ ៤២,១៦គីឡូម៉ែត្រ។ ប្រភេទកីឡានេះ ទាមទារឱ្យមានការស៊ូទ្រាំខ្ពស់ និងភាពធន់លើកាយសម្បទា។

៥. យុទ្ធគុនចម្រុះ (MMA)

កីឡាយុទ្ធគុនចម្រុះ តម្រូវឱ្យកីឡាករមានរាងកាយមាំមួន ភាពរហ័សរហួន លឿន និងភាពបត់បែនខ្ពស់។ កីឡានេះ ទាមទារឱ្យអត្តពលិក មានរាងកាយរឹងមាំ និងធន់ខ្លាំង ដែលអាចទប់ទល់នឹងក្បាច់ប្រយុទ្ធរបស់គូប្រកួត។

៦. កីឡាកាយសម្ព័ន្ធ (Gymnastics) កីឡានេះ ទាមទារឱ្យអ្នកហ្វឹកហាត់មានបច្ចេកទេសល្អ និងកាយសម្បទារឹងមាំ ដែលចំណុចនេះបានក្លាយជាឧបសគ្គដ៏ធំសម្រាប់អត្តពលិកគ្រប់រូប​។ វាជាប្រភេទកីឡាដែលពិបាកបំផុតមួយ ដោយកីឡាករចាំបាច់ត្រូវមាន ការតាំងចិត្តខ្ពស់ កម្លាំងខ្លាំង ភាពរហ័សរហួន ថាមពល ភាពបត់បែន ល្បឿន និងជំនាញ៕