ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទិវាជាតិអំណានលើកទី១០ នឹងធ្វើឡើងចាប់ពីថ្ងៃទី៨ ដល់ថ្ងៃទី១១ ខែមីនា ឆ្នាំ២០២៥ ក្រោមប្រធាបទ «ការអានផ្សារភ្ជាប់អន្តរជំនាន់មនុស្សក្នុងសង្គម» ដើម្បីលើកស្ទួយអក្សរសាស្ត្រជាតិ រម្លឹកដល់ស្នាដៃ និងការចូលរួមអភិរក្សអក្សរខ្មែរ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ការកំណត់យកប្រធានបទ “ការអានផ្សារភ្ជាប់អន្តរជំនាន់មនុស្សក្នុងសង្គម” ក្នុងទិវាជាតិអំណានលើកទី១០ ឆ្នាំនេះ មានន័យថា ដោយសារការអាននេះ បានផ្តល់នូវចំណេះដឹង បំណិន និងការអនុវត្តផ្សារភ្ជាប់គ្នា បន្តពីមនុស្សម្នាក់ទៅមនុស្សម្នាក់ រហូតដល់មនុស្សពីជំនាន់មួយទៅមនុស្សជំនាន់មួយទៀត។
បើតាមលោកជំទាវ ឃួន វិច្ឆិកា ទិវាជាតិអំណានឆ្នាំនេះ គេរំពឹងថា នឹងមានអ្នកចូលរួមប្រមាណជិត៤ពាន់នាក់។
ក្រសួងអប់រំ យុវជន និងកីឡា បានឱ្យដឹងថា ទិវាជាតិអំណានលើកទី១០ ឆ្នាំ២០២៥ នឹងរៀបចំធ្វើនៅវិទ្យាស្ថានបច្ចេកវិទ្យាកម្ពុជា ដោយមានសៀវភៅរាប់ម៉ឺនក្បាល ជាមួយនឹងកំណើននៃស្តង់ពិព័រណ៍មកពីសា្ថប័នផ្សេងៗជាច្រើន។ លើសពីនេះ ក៏មានជំនួបអ្នកនិពន្ធ ការថតរូបស្អាតៗ ការលេងល្បែងកម្សាន្តសប្បាយៗ ការលេងហ្គេមដើម្បីឈ្នះរង្វាន់ ការគូរគំនូរ ផាត់ពណ៌សម្រាប់កុមារតូចៗនៅសួនកុមារ ការប្រគំតន្រ្តី និងការបង្ហាញសមត្ថភាពសម្តែងផងដែរ។ ជាពិសេស ក៏មានការប្រកាសជ័យលាភីឧស្សាហ៍កថាក្រោមប្រធានបទ “តម្លៃគុណធម៌តាមរយៈវណ្ណកម្មអក្សរសិល្ប៍ខ្មែរ”។
សូមជំរាបថា ទិវាជាតិអំណាន ត្រូវបានប្រារព្ធឡើងនៅថ្ងៃទី១១ ខែមីនា ជារៀងរាល់ឆ្នាំ ដែលជាថ្ងៃប្រសូត្ររបស់សម្តេចព្រះសង្ឃរាជ ជួន ណាត ដើម្បីរំលឹកដល់ស្នាដៃ និងការចូលរួមអភិរក្សភាសាខ្មែរ និងចងក្រងវចនានុក្រមខ្មែរ ដែលមានការទទួលស្គាល់ និងប្រើប្រាស់មកដល់ពេលបច្ចុប្បន្ន។ លើសពីនេះ ក៏ជាការបន្តបណ្ដុះទម្លាប់អាន និងសរសេរ ជំរុញវប្បធម៌អាន លើកកម្ពស់សមត្ថភាពអាន ស្មូតកំណាព្យ និងការតែងនិពន្ធ៕
