លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ស្រ្តីទីមួយ​កម្ពុជា បានសន្យាថា នឹង​ផ្តល់​អាហារូបករណ៍​ថ្នាក់​មហាវិទ្យាល័យ ដល់កូនចៅ​របស់វីរកងទ័ពជួរមុខឱ្យបានសិក្សា​រៀន​សូត្រ បង្កើនចំណេះវិជ្ជា ដើម្បីតបស្នង​ការ​លះបង់​ដ៏ធំធេង​របស់​ពួកគាត់​ចំពោះ​ជាតិមាតុភូមិ​។

ការសន្យានេះ បានធ្វើ​ឡើង​ក្នុង​ឱកាស​ជួប​សំណេះសំណាល​សួរសុខទុក្ខ និងចែក​អំណោយ​ជូន​គ្រួសារវីរកងទ័ព​ជួរ​មុខ​ប្រមាណ ១២៤៤គ្រួសារ នៅ​រាជធានីភ្នំពេញ កាលពីថ្ងៃសៅរ៍។

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានថ្លែងថា បើមានកូនឬមួយក៏ចៅរបស់វីរកងទ័ពយើង ដែលនឹងត្រូវប្រឡងបាក់ឌុបហើយត្រៀមចូលរៀនមហាវិទ្យាល័យ លោកជំទាវនឹងឱ្យអាហារូបករណ៍ជូនទាំងអស់គ្នា ដែលមានវត្តមាននៅក្នុងថ្ងៃនេះរហូតដល់រៀនចប់មហាវិទ្យាល័យ។ លោកជំទាវបណ្ឌិតបញ្ជាក់ថា លោកជំទាវមិនមានអី្វតបស្នងសងគុណទេ គឺមានតែបញ្ជូនកូនចៅរបស់វីរកងទ័ព បានរៀនសូត្រតទៅមុខទៀត ដែលនេះគឺសំខាន់បំផុត ដើម្បីការសិក្សា និងអនាគតរបស់កូនចៅពួកគាត់។

“នេះជាអ្វីមួយអាចជួយ បានក្នុងការសម្រាលបន្ទុករបស់បងប្អូនវីរកងទ័ព ដែលបានលះបង់យ៉ាងធំធេងដើម្បីជាតិមាតុភូមិយើង”

លើសពីនេះលោកជំទាវបណ្ឌិត បានណែនាំឯកឧត្តម ឃួង ស្រេង អភិបាលរាជធានីភ្នំពេញ ជួយធ្វើបណ្ណមូលនិធិក្រីក្រ ជូនដល់គ្រួសារវីរកងទ័ពដែលខ្សត់ចំនួន ២៩៩គ្រួសារ ដើម្បីឱ្យពួកគាត់អាចរកសេវាកម្មព្យាបាល នៅតាមមន្ទីរពេទ្យរដ្ឋដោយឥតគិតថ្លៃ ដែលជាការជួយសម្រាលការលំបាកមួយបន្ថែមទៀត សម្រាប់គ្រួសារវីរកងទ័ព។

បន្ថែមលើនេះ លោកជំទាវបណ្ឌិត ពេជ ចន្ទមុន្នី កំពុងតែរៀបចំជួយដល់ភរិយា របស់វីរកងទ័ពជួរមុខដែលនៅតាមព្រំដែន ដែលមួយចំនួននៅជាមួយប្តីតាមលេណដ្ឋាន ដែលគ្មានជំនាញផ្ទាល់ខ្លួន ហើយពឹងផ្អែកលើប្តីរបស់គាត់ទាំងអស់ ដូចនេះ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត កំពុងមានគំនិតមួយនៅពេលដែលចប់សង្គ្រាម លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត នឹងចុះជួយពួកគាត់ឱ្យអស់លទ្ធភាព ដើម្បីឱ្យពួកគាត់មានជំនាញ មានមុខរបររកស៊ី បានចំណូលរាល់ថ្ងៃជួយរំលែកទុក្ខ លំបាកគ្រួសារបានមួយផ្នែក។

កងទ័ពកម្ពុជា និងថៃ បានប៉ះទង្គិច​គ្នា​ដោយ​អាវុធ​ជាលើកទី២ ចាប់តាំងពីថ្ងៃទី៧ ខែធ្នូ ឆ្នាំ២០២៥, ការ​ប្រយុទ្ធតាមបណ្តោយ​ព្រំដែន​កម្ពុជា-ថៃ អស់រយៈពេល​៣សប្តាហ៍ បានបណ្តាល​ឱ្យ​មានជនភៀសសឹក​ប្រមាណ កន្លះលាននាក់។ ក្រោយអ​នុវត្ត​បទឈប់បាញ់ កាលពីថ្ងៃទី២៧ ខែធ្នូ ឆ្នាំ២០២៥ គិត​មក​ត្រឹម​ល្ងាច​ថ្ងៃទី២៩ ខែធ្នូ ឆ្នាំ២០២៥ ជនភៀសសឹក​មានចំនួន ៥៩៦ ៩២៦នាក់ ក្នុងនោះស្រ្តី ៣១១ ៥៩៩នាក់ និង​កុមារ ១៨៧ ៥៩៧នាក់ ខណៈជនភៀសសឹក ១៤ ៩៦៣នាក់ បានវិលត្រឡប់ទៅលំនៅឋានវិញ។ នេះ​បើយោង​តាម​របាយការណ៍​របស់ក្រសួងមហាផ្ទៃ៕