ក្នុងពិធីបិទសន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំ ២០២៤-២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានស្នើ​ឱ្យ​ក្រសួងសុខាភិបាល ក៏​ដូចជា​ក្រសួងអប់រំ គិត​គូឡើងវិញពីបញ្ហាភេសជ្ជៈ​ប៉ូវកម្លាំង ដែល​ប៉ះពាល់​ដល់សុខភាពកុមារ​កម្ពុជា។

សម្តេចធិបតីមានប្រសាសន៍ថា ភេសជ្ជៈប៉ូវកម្លាំង មិន​មែន​សម្រាប់ក្មេងៗនោះទេ ដោយសម្តេចបានសង្កត់ធ្ងនើ់ថា ក្មេងៗដែល​ប្រើប្រាស់ភេសជ្ជៈប៉ូវកម្លាំង ឬភេសជ្ជៈដែលមានជាតិផ្អែមខ្លាំង ចាប់ពីពេលនេះ រហូត​ដល់ពួកគេ​មានអាយុ៣០ ឬ៤០ឆ្នាំ ពួកគេនឹង​ក្លាយជា​បន្ទុកសង្គម ដោយអាច​នឹង​កើត​មានជំងឺទឹកនោមផ្អែម ឬជំងឺផ្សេងៗ។ សម្តេចនាយករដ្ឋមន្រ្តីមានប្រសាសន៍ថា រឿងនេះ គឺជា​រឿង​មួយ​ដែល​ត្រូវ​ប្រកាស​អាសន្ន។

“រឿងប្រើប្រាស់អាទឹកប៉ូវកម្លាំង… សុំ​ឱ្យ​ឪពុកម្តាយ ប្រជាជន លោកគ្រូអ្នកគ្រូទាំងអស់ និងអ្នកលក់គិតគូពីរឿងនេះ… ទៅមើលមន្ទីរពេទ្យគន្ធបុប្ឆា ក្មេងៗច្រើនណាស់ ហើយនេះ ពេលខ្លះពាក់ព័ន្ធទៅនឹងការយល់ដឹងរបស់ឪពុកម្តាយ…”

ជាមួយគ្នានេះ សម្តេចនាយករដ្ឋមន្រ្តី ក៏​បានមានប្រសាសន៍ដោយធ្វើការ​ណែនាំទៅ​ដល់ស្ថាប័នពាក់ព័ន្ធ សូមធ្វើសារអប់រំ​ឱ្យ​បានច្រើន​ពាក់ព័ន្ធនឹងផលវិបាក​នៃភេសជ្ជៈប៉ូវកម្លាំង ឬភេសជ្ជៈផ្អែម រួចធ្វើការផ្សព្វផ្សាយ​ដើម្បី​ឱ្យ​ឪពុកម្តាយ អាណាព្យាបាល បានយល់អំពីបញ្ហានេះ។ “…គ្មានឪពុកម្តាយណាចង់ឱ្យ​កូនកើតទឹកនោមផ្អែមទេ តែពេលខ្លះអត់សូវដឹង…អញ្ចឹងយើងចេញ​សារឱ្យច្រើនដើម្បី​យល់ ព្រោះយឺតមួយឆ្នាំ តើក្មេងប៉ុន្មាននាក់ដែលកើតជំងឺ…”។

ជំងឺទឹកនោមផ្អែម គឺជាជំងឺដែលបង្កឡើងដោយកម្រិតជាតិស្ករក្នុងឈាមខ្ពស់, វាអាចបណ្តាលមកពីការផលិតអាំងស៊ុយលីនមិនគ្រប់គ្រាន់ ឬការដែលរាងកាយមិនអាចប្រើប្រាស់អាំងស៊ុយលីនបានត្រឹមត្រូវ។ នៅប្រទេសកម្ពុជា ជំងឺនេះកំពុងកើនឡើងជារៀងរាល់ឆ្នាំ ដោយបើតាមទិន្នន័យសមាគមទឹកនោមផ្អែមអន្តរជាតិ ឆ្នាំ២០១៩ បង្ហាញថា ក្នុងចំណោមមនុស្សពេញវ័យ ៩,៧លាននាក់ មាន ៤,៤% កើតជំងឺទឹកនោមផ្អែម ក្នុងនោះ​​ប្រជាជនពេញវ័យ​ដែលរស់នៅទីក្រុង មានអត្រា​ឆ្លង​ជំងឺទឹកនោមផ្អែម​ប្រមាណ ១០% ខណៈ​អ្នករស់នៅ​ជនបទ មានអត្រា​ឆ្លង​ប្រមាណ៥%។ ជាមួយ​គ្នា​នេះ ប្រទេស​កម្ពុជា​បាន​ចំណាយ​ប្រមាណ ១០២លានដុល្លារអាមេរិក ក្នុងការ​ព្យាបាល​ជំងឺទឹកនោមផ្អែម ដោយអ្នកជំងឺម្នាក់​ចំណាយ​មធ្យម​ប្រមាណ ២៣៨ដុល្លារក្នុង​មួយឆ្នាំ៕