ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងសារពិសេសទៅកាន់ជនរួមជាតិក្នុងសម័យប្រជុំពេញអង្គលើកទី៣ ព្រឹទ្ធសភា នីតិកាលទី៥ នាព្រឹកថ្ងៃទី១៦ ខែមិថុនា សម្ដេចតេជោ ហ៊ុន សែន ប្រធានព្រឹទ្ធសភា បានប្រកាសពីការទទួលយកនិស្សិតកម្ពុជាដែលកំពុងសិក្សានៅប្រទេសថៃត្រឡប់មករៀនក្នុងប្រទេសវិញ ប្រសិនបើមានករណីភាគីថៃធ្វើទុក្ខបុកម្នេញពួកគេពេលកំពុងសិក្សា។
សម្ដេចតេជោ មានប្រសាសន៍ថា សម្រាប់និស្សិតខ្មែរដែលកំពុងសិក្សានៅប្រទេសថៃ ក្នុងស្ថានភាពនេះ បើគេបន្តឱ្យរៀនបានក៏រៀនសិនទៅ តែបើទ្រាំរៀនមិនបានទេ សូមត្រឡប់មកប្រទេសខ្មែរវិញ មករៀននៅស្រុកខ្មែរ ដោយមានផ្ដល់អាហារូបករណ៍សម្រាប់ការសិក្សា។
ប្រធានព្រឹទ្ធសភា បន្ថែមថា ប្រសិនក្រសួងអប់រំ និងរាជរដ្ឋាភិបាល មិនអាចជួយផ្តល់អាហារូបករណ៍បាន សម្ដេចនឹងចេញលុយឱ្យរៀនតែម្ដង។
លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា លើកឡើងថា ប្រសាសន៍របស់សម្តេចតេជោនេះ គឺបង្ហាញពីជាការយកចិត្តទុកដាក់ខ្ពស់របស់ថ្នាក់ដឹកនាំកម្ពុជា ទៅលើសេចក្ដីថ្លៃថ្នូរ និងអាយុជីវិតរបស់ប្រជាពលរដ្ឋខ្មែរ ក្នុងខណៈដែលប្រទេសជិតខាងមើលងាយ ឬធ្វើទុក្ខបុកម្នេញជាដើម។
អគ្គលេខាធិការ នៃរាជបណ្ឌិត្យសភាកម្ពុជា មានប្រសាសន៍បន្ថែមថា ការសិក្សានៅក្នុងប្រទេសរបស់យើង ក៏មានទាំងគ្រប់មុខវិជ្ជា គុណភាពទទួលយកបានមិនចាញ់ប្រទេសជិតខាងនោះទេ ដូច្នេះនិស្សិតខ្មែរអាចត្រឡប់មកសិក្សានៅប្រទេសកម្ពុជា ដោយបំពេញគ្រប់លក្ខខណ្ឌបរិញ្ញាបត្របរិញ្ញាបត្រជាន់ខ្ពស់ បណ្ឌិត គឺមានទាំងអស់។
ជាមួយគ្នានេះ លោកបណ្ឌិត យង់ ពៅ ក៏បានលើកទឹកចិត្តឱ្យនិស្សិតខ្មែរគួរពិចារណា ព្រោះការបណ្ដុះបណ្ដាលកម្រិតខ្ពស់នៅកម្ពុជាក៏មិនចាញ់ប្រទេសជិតខាង ឬបណ្ដាប្រទេសផ្សេងទៀតដែរ។ ម៉្យាងដើម្បីរក្សាសុខសុវត្ថិភាព និងសេចក្ដីថ្លៃថ្នូរ នៃប្រជាជាតិរបស់យើង ខណៈពេលដែលថ្នាក់ដឹកនាំកំពុងយកចិត្តទុកដាក់ខ្ពស់។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ស្របតាមប្រសាសន៍លើកឡើងរបស់សម្ដេចតេជោ ហ៊ុន សែន ប្រធានព្រឹទ្ធសភា ក្រសួងអប់រំ បានត្រៀមខ្លួនរួចជាស្រេច ក្នុងការទទួលនិស្សិតខ្មែរវិលត្រឡប់ពីប្រទេសថៃវិញ។
លោកជំទាវបញ្ជាក់ថា បច្ចុប្បន្ននេះ ក្រសួងអប់រំ ក៏កំពុងធ្វើការងារជិតស្និទ្ធជាមួយបណ្ដាញប្អូនៗនិស្សិតខ្មែរដែលកំពុងសិក្សានៅតាមប្រទេសនានាផងដែរ៕
