ប្រព័ន្ធវាយតម្លៃផ្អែកលើសមត្ថភាព ឬការធ្វើតេស្តវាយតម្លៃសមត្ថភាពហៅកាត់ថា RPL ជាកម្មវិធីតេស្តវាយតម្លៃសមត្ថភាពដើម្បីទទួលបានវិញ្ញាបនបត្របញ្ជាក់ពីជំនាញដែលបុគ្គលគ្រប់រូបអាចធ្វើការស្នើតេស្តដើម្បីបញ្ជាក់សមត្ថភាពបានដល់អ្នកដែលមានជំនាញដែលមិនទាន់មានការទទួលស្គាល់។

លោក អ៊ិន វុទ្ធី អនុប្រធាននាយកដ្ឋានស្តង់ដារ និងកម្មវិធីសិក្សា និងទទួលបន្ទុកការវាយតម្លៃសមត្ថភាព បានប្រាប់ឱ្យដឹងថា ការធ្វើតេស្តវាយតម្លៃសមត្ថភាពហៅកាត់ថា RPL ជាកម្មវីធីថ្មីដែលប្រជាពលរដ្ឋទូទៅមិនទាន់បានស្គាល់ថាជាប្រព័ន្ធអ្វី ។ លោកបន្តថា នេះជាប្រព័ន្ធតេស្តសមត្ថភាពសម្រាប់ប្រជាពលរដ្ឋដែលសិក្សាក្នុង និងក្រៅប្រព័ន្ធអាចចូលធ្វើការតេស្តវាយតម្លៃបានដោយឥតគិតថ្លៃ និងទទួលបានវិញ្ញាបនបត្របញ្ជាក់ចេះជំនាញពិតប្រាកដផងដែរ។

បើតាមអនុប្រធាននាយកដ្ឋានស្តង់ដារ និងកម្មវិធីសិក្សា រូបនេះបន្ថែមថា អ្នកដែលអាចស្នើពាក្យតេស្តសមត្ថភាពនេះអាចជាអ្នកសិក្សាក្រៅប្រព័ន្ធដូចជាការចេះធ្វើការងារតាមបែបប្រពៃណី ចេះតពីគ្រួសារ ចេះតពីគ្នា ជាពិសេសប្រជាពលរដ្ឋប្រកបរបរជាកម្មករ-កម្មាការិនីរោងចក្រ ការងារសំណង់ ជាដើម។

ជាមួយគ្នានេះ បេក្ខជនអាចទៅធ្វើតេស្តដើម្បីយកវិញ្ញាបនបត្របាននៅតាមគ្រឹះស្ថាន និងមជ្ឈមណ្ឌលវាយតម្លៃសមត្ថភាពជាដៃគូដែលមាននៅតាមបណ្ដារាជធានីខេត្តមួយចំនួនដូចជា វិទ្យាស្ថានពហុបច្ចេកទេសព្រះកុសុមៈ (រាជធានីភ្នំពេញ) វិទ្យាស្ថានបច្ចេកវិទ្យាបាត់ដំបង (ខេត្តបាត់ដំបង) វិទ្យាស្ថានជាតិពហុបច្ចេកទេសអង្គរ (ខេត្តសៀមរាប) វិទ្យាស្ថានពហុបច្ចេកទេសភូមិភាគតេជោសែនតាកែវ (ខេត្តតាកែវ) វិទ្យាស្ថានពហុបច្ចេកទេសភូមិភាគតេជោសែនសៀមរាប (ខេត្តសៀមរាប)​ វិទ្យាស្ថានពហុបច្ចេកទេសភូមិភាគតេជោសែនកំពត (ខេត្តកំពត) វិទ្យាស្ថានពហុបច្ចេកទេសភូមិភាគតេជោសែនឦសាន (ខេត្តក្រចេះ) និងមជ្ឈមណ្ឌលវាយតម្លៃសមត្ថភាពនៃវិទ្យាស្ថានបច្ចេកទេសឧស្សាហកម្ម (រាជធានីភ្នំពេញ)។ កម្មវិធីតេស្តនេះមានមុខជំនាញផ្សេងៗគ្នាទៅតាមគ្រឹះស្ថានសិក្សា និងមជ្ឈមណ្ឌលវាយតម្លៃសមត្ថភាពដែលគ្រឹះស្ថានខ្លះមានមួយមុខជំនាញ និងគ្រឹះស្ថានបី ឬបួនឡើងទៅសម្រាប់ធ្វើតេស្ត។

លោក អ៊ិន វុទ្ធី បានបញ្ជាក់ថា ជំនាញដែលអាចធ្វើតេស្ត RPL នេះមានប្រាំពីរមុខជំនាញដូចជា ការងារកំបោរ, ការដំឡើងបណ្ដាញអគ្គិសនីក្នុងអគារ សេវាកម្មកុំព្យូទ័រ សេវាកម្មថែទាំនិងជួសជុលរថយន្ត សេវាកម្មថែទាំនិងជួសជុលរថយន្ត សេវាកម្មថែទាំនិងជួសជុលអគ្គិសនីរថយន្ត សេវាកម្មថែទាំនិងជួសជុលម៉ាស៊ីនត្រជាក់រថយន្ត សេវាកម្មថែទាំនិងជួសជុលម៉ាស៊ីនត្រជាក់រថយន្ត។

នៅក្នុងដំណាក់កាលនៃការធ្វើតេស្តបេក្ខជនអាចធ្វើការចុះឈ្មោះតាមរយៈការចុះឈ្មោះដោយផ្ទាល់នៅតាមគ្រឹះស្ថានដែលមានខាងលើ ឬអាចចុះឈ្មោះតាមរយៈតំណភ្ជាប់ https://tvet-erpl.com/home ។

ជាចុងក្រោយលោក អ៊ិន វុទ្ធី សូមលើកទឹកចិត្តដល់ប្រជាពលរដ្ឋខ្មែរគ្រប់រូបដែលមានជំនាញក្នុងខ្លួន ហើយចង់សាកសមត្ថភាពខ្លួនឯង និងទទួលបានវិញ្ញាបនបត្រដែលទទួលបានការទទួលស្គាល់ជំនាញពីមជ្ឈមណ្ឌលវាយតម្លៃសមត្ថភាព និងក្រសួងការងារ និងបណ្ដុះបណ្ដាលវិជ្ជាជីវៈ៕