ក្នុង​ឱកាស​ចុះ​ពិនិត្យវឌ្ឍនភាពនៃសាលាគរុកោសល្យ និងវិក្រឹតការ ខេត្តសៀមរាប កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា បានថ្លែង​អបអរសាទរដល់សាលាគរុកោសល្យ និងវិក្រឹតការខេត្តសៀមរាប ដែលបានក្លាយជាសាលាគរុកោសល្យគំរូដំបូងគេ ក្នុងចំណោមសាលាគរុកោសល្យទាំង១៦នៅកម្ពុជា។

លោជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ប្រសិនគិតអំពីកម្រិតភាពជាសាលាគរុកោសល្យទទួលបន្ទុកការងារបណ្ដុះបណ្ដាលគ្រូកម្រិតបឋមសិក្សាតាមកម្មវិធី១២+២ សាលាគរុកោសល្យ និងវិក្រឹតការ ខេត្តសៀមរាប ពិតជាបានទទួលស្គាល់ជាសាលាគរុកោសល្យគំរូដំបូងគេ។

អ្នកនាំពាក្យក្រសួងអប់រំ បន្ថែមថា ការទទួលស្គាល់ជាសាលាគរុកោសល្យគំរូនេះ គឺផ្អែកលើស្តង់ដាទាំង៥ រួមមាន ១. លទ្ធផលបណ្តុះបណ្តាល ២. ធនធានបណ្តុះបណ្តាល ៣. កិច្ចសហប្រតិបត្តិការ ៤. អភិបាលកិច្ចល្អ និង៥. ការស្រាវជ្រាវ និងនវានុវត្តន៍។ លោជំទាវបណ្ឌិត ឃួន វិច្ឆិកា បន្តថា ក្រសួងបានវាស់វែងពិនិត្យមើលសូចនាករជាច្រើន ដើម្បីពិនិត្យមើលថាសាលាគរុកោសល្យនេះ ពិតជាបានផ្ដល់ការបណ្ដុះបណ្ដាល មានធនធានគ្រប់គ្រាន់ក្នុងការបណ្ដុះបណ្ដាល ក៏ដូចជាមានលក្ខខណ្ឌនានាទៀតនៅក្នុងស្តង់ដាទាំង៥ ដើម្បីធានាគុណភាព នៃការបណ្ដុះបណ្ដាលគ្រូនៅទីនោះឱ្យទទួលបានគុណភាពល្អ។

បើតាមលោជំទាវបណ្ឌិត ឃួន វិច្ឆិកា ក្រសួងអប់រំរៀបចំឱ្យមានសាលាគរុកោសល្យគំរូនេះ គឺជាផែនទីបង្ហាញផ្លូវសម្រាប់សាលាគរុកោសល្យទាំងអស់ទូទាំងប្រទេស ដែលបច្ចុប្បន្ននេះមានសាលាគរុកោសល្យសរុបចំនួន២៥។ ក្នុងនោះ មានសាលាគរុកោសល្យដែលផ្ដល់ការបណ្ដុះបណ្ដាលសម្រាប់គ្រូវិទ្យាល័យ កម្រិតអនុវិទ្យាល័យ កម្រិតបឋមសិក្សា មត្តេយ្យសិក្សា អប់រំពិសេស ក៏ដូចជាអប់រំពហុភាសា ដើម្បីធានាថាសាលាគរុកោសល្យផ្ដល់ការបណ្ដុះបណ្ដាលដល់គរុនិស្សិតមានគុណភាព អាចចេញទៅបង្រៀនទទួលបានលទ្ធផលល្អ។

យ៉ាងណាក៏ដោយនៅ​ចំពោះ​គរុសិស្ស​ជិត៥រយនាក់នៅ​សាលាគរុកោសល្យ​ខេត្តសៀមរាប ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា បច្ចុប្បន្ន ក្រសួងអប់រំ បាននិងកំពុងយកចិត្តទុកដាក់អនុវត្តកំណែទម្រង់គ្រូបង្រៀន ដោយផ្តោតលើការលើកកម្ពស់ស្តង់ដាវិជ្ជាជីវៈគ្រូបង្រៀន គុណវុឌ្ឍិគ្រូ ចិត្តគរុកោសល្យ លើកកម្ពស់ជីវភាព និងកិត្តិយសគ្រូ ទាក់ទាញសិស្សពូកែៗឱ្យចូលធ្វើគ្រូបង្រៀន កែទម្រង់វិទ្យាស្ថានគរុកោលស្យ និងយកចិត្តទុកដាក់លើកទឹកចិត្តដល់គ្រូបង្រៀនដែលកំពុងអនុវត្តការងារបានល្អហើយឱ្យបន្តខិតខំប្រឹងប្រែងបន្ថែមទៀត។

ដើម្បីបន្តលើកកម្ពស់គុណភាពអប់រំ ទាមទារចាំបាច់គ្រូបង្រៀនមានគុណភាព ក្នុងន័យនេះ រដ្ឋមន្ត្រីក្រសួងអប់រំ បានលើកទឹកចិត្តឱ្យគរុសិស្សបន្តខិតខំប្រឹងប្រឹងរៀនសូត្រ ដោយត្រូវផ្សារភ្ជាប់ការសិក្សាទៅនឹងការអនុវត្តឱ្យបានច្រើន, ពង្រឹងសមត្ថភាពក្នុងការប្រើប្រាស់ភាសាបរទេស និងបច្ចេកវិទ្យាឌីជីថល, ពង្រឹងសមត្ថភាពក្នុងការនិយាយទំនាក់ទំនងជាមួយសិស្ស និងសហគមគ្រូបង្រៀន ត្រូវរៀនសូត្រពីរបៀបបង្រៀនរបស់គ្រូល្អៗ សិក្សាស្រាវជ្រាវឯកសារនានាដោយខ្លួនឯង។

ឯកឧត្តមបណ្ឌិតសភាចារ្យ ក៏ស្នើឱ្យសាលាផ្តោតលើការអនុវត្តជាក់ស្តែងបន្ថែមទៀត ដោយត្រូវពង្រឹងការអនុវត្តវិធីសាស្ត្របង្រៀនអំណានដំបូង និងគណិតវិទ្យាដំបូង និងបង្កើតកិច្ចសហការជាមួយសាលារៀនដែលអនុវត្តល្អ និងលោកគ្រូបង្រៀនល្អៗមានបទពិសោច្រើនដើម្បីជួយគាំទ្រ ជាពិសេសលើកទឹកចិត្តគ្រូឧទ្ទេសឱ្យធ្វើការស្រាវជ្រាវឱ្យបានច្រើន។

គួរជំរាបជូនថា ក្នុងសន្និបាតបូកសរុបការងារអប់រំ យុវជន និងកីឡាឆ្នាំសិក្សា ២០២៣-២០២៤ និងទិសដៅឆ្នាំសិក្សា ២០២៤-២០២៥ កាលពីខែមីនា ក្រសួងអប់រំ បានប្រកាសទទួលស្គាល់សាលាគរុកោសល្យគំរូចំនួន៥ រួមមាន វិទ្យាស្ថានជាតិអប់រំ, វិទ្យាស្ថានគរុកោសល្យរាជធានីភ្នំពេញ, វិទ្យាស្ថានគរុកោសល្យបាត់ដំបង, មហាវិទ្យាល័យអប់រំនៃសាកលវិទ្យាល័យភូមិន្ទភ្នំពេញ និងសាលាគរុកោសល្យ និងវិក្រឹតការខេត្តសៀមរាប៕