លើកឡើងក្នុងសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២២-២០២៣ និងទិសដៅឆ្នាំសិក្សា ២០២៣-២០២៤ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា សាលាគរុកោសល្យ គឺជា​កន្លែង​ដំបូង​គេ​ក្នុងការ​ប្រើប្រាស់បច្ចេកវិទ្យាឌីជីថលសម្រាប់ការអប់រំ ដោយថា ប្រសិន​បើ​សាលា​គរុកោសល្យ​មិន​ឌីជីថលនោះទេ យើង​ក៏​មិន​អាច​ឱ្យ​សាលា​ដទៃ​ទៀត​ឌីជីថល​បានដែរ។

ឯកឧត្តម ហង់ជួន ណារ៉ុន មានប្រសាសន៍ថា ការ​រៀបចំវិធីបង្រៀន​ដោយ​ប្រើប្រាស់​បច្ចេកវិទ្យា​ឌីជីថល គឺ​ជាការចាំបាច់ ដូច្នេះសាលា​គរុកោសល្យ​ត្រូវតែឈានមុនគេរៀបចំវិធីបង្រៀន ដោយ​ប្រើប្រាស់​នូវ​អ្វី​ដែលសាលា​រៀនជំនាន់ថ្មីមាន ហើយ​ជាមួយ​គ្នានេះ សាកលវិទ្យាល័យ​ទាំងអស់​ត្រូវ​តែផ្សារភ្ជាប់​ជាមួយ​នឹង​សាលា​មធ្យមសិក្សា និងជួយ​ដល់សាលាមធ្យមសិក្សា ដោយជាចក្ខុវិស័យក្រសួងអប់រំ​ចង់​ឱ្យ​គ្រឹះស្ថាន​ឧត្តមសិក្សា​ទាំងអស់បង្កើត​មជ្ឈមណ្ឌល​បដិវត្តកម្មឌីជីថល​មួយ ដើម្បីជួយគាំទ្រ និង​ចែករំលែកចំណេះដឹងឌីជីថល​ទៅ​កាន់សាលាមឋមសិក្សា និង​មធ្យមសិក្សា។

ជាមួយគ្នានេះ ឯកឧត្តមរដ្ឋមន្ត្រីក្រសួងអប់រំ ក៏​បានបង្ហាញពីបច្ចេកវិទ្យាថ្មីៗ​គាំទ្រ​ដល់ការ​រៀន និង​បង្រៀន ដែល​ក្រសួងបានបង្កើតឡើងដូចជា ថ្នាល “សាលាឌីជីថល” ( https://sala.moeys.gov.kh/ ) ដែលជាសាលារៀនបែបឌីជីថលសម្រាប់បម្រើដល់គ្រូបង្រៀន និងអ្នករៀនជំនាន់ថ្មី ដោយ​ថ្នាលមួយនេះ ក៏ជាវេទិកានិម្មិតសម្រាប់សិស្សានុសិស្ស គ្រូបង្រៀន និងអ្នកជំនាញ ធ្វើការចែករំលែកចំណេះដឹងទៅកាន់អ្នកសិក្សាដទៃទៀត ហើយ​បច្ចុប្បន្ន កម្មវិធីនេះ មានអ្នកចូលប្រើប្រាស់ប្រមាណជាង៩ម៉ឺននាក់ ។

បើតាមប្រសាសន៍របស់ឯកឧត្តមរដ្ឋមន្រ្តី ថ្នាលអប់រំសាលាឌីជីថល ត្រូវបានបង្កើតឡើងក្នុងគោលបំណងលើកកម្ពស់ ជំរុញការចែករំលែក និងប្រើប្រាស់មាតិកាអប់រំឌីជីថល ឱ្យកាន់តែសម្បូរបែបសម្រាប់បម្រើដល់ការបង្រៀន និងរៀន តាមរយៈការប្រើប្រាស់បច្ចេកវិទ្យា ដែលផ្ដល់ភាពងាយស្រួលដល់គ្រឹះស្ថានសិក្សា គ្រូបង្រៀន និងសាធារណជនទូទៅក្នុងការបង្កើតសាលារៀននិម្មិត និងបង្កើតវគ្គសិក្សានានា នៅលើថ្នាលសាលាឌីជីថល សម្រាប់សិស្សានុសិស្សចូលធ្វើស្វ័យសិក្សាដោយសេរីមិនគិតថ្លៃ គ្រប់ពេលវេលា និងទីកន្លែង។

ថ្នាលអប់រំសាលាឌីជីថល ក៏បានផ្ដល់ភាពងាយស្រួលដល់អ្នកប្រើប្រាស់ ក្នុងការស្វែងរកឯកសារឌីជីថល តាមកម្រិតថ្នាក់ចាប់ពីមត្តេយ្យសិក្សារហូតដល់កម្រិតឧត្តមសិក្សា ដោយអាចធ្វើការស្វែងរកតាមរយៈពាក្យគន្លឹះ ប្រភេទក្រុមមុខវិជ្ជា ប្រភេទវគ្គសិក្សា និងកម្រិតថ្នាក់ជាដើម។

គួរជម្រាបថា​ ក្នុងកម្មវិធីសន្និបាតអប់រំ​ យុវជន​ និងកីឡាឆ្នាំនេះ​ ក៏មានការតាំងបង្ហាញសមទ្ធិផលរបស់ក្រសួងអប់រំ យុជន​ និងកីឡា​ ដែលការងារទាំងនេះចូលរួមជំរុញការសម្រេចបានគោលដៅរដ្ឋាភិបាលឌីជីថលក្នុងនោះមានដូចជា ថ្នាលអប់រំសាលារៀនឌីជីថល https://sala.moeys.gov.kh/, ថ្នាលអភិវឌ្ឍសមត្ថភាព https://cdp.moeys.gov.kh/, កម្មវិធីសមមូលអប់រំកម្រិតមូលដ្ឋានតាមអ៊ីនធឺណិត (ប៊ីប) https://beep.moeys.gov.kh/, កម្មវិធីទូរសព្ទដៃ Elearning MoEYS, ប្រព័ន្ធគ្រប់គ្រង សាលារៀន តាមបែបឌីជីថល (SIS), កម្មវិធីទូរសព្ទដៃសុខភាពយុវជន​, កម្មវិធីទូរសព្ទដៃទូរសិក្សា, ឧបករណ៍ផ្ដល់ប្រឹក្សាតាមប្រព័ន្ធអេឡិចត្រូនិច “ត្រីវិស័យ”​ កម្មវិធីទូរស័ព្ទដៃ, ប្រព័ន្ធគ្រប់គ្រងហិរញ្ញវត្ថុក្រសួងអប់រំ យុវជន និងកីឡា (EFMS), ថ្នាលគ្រប់គ្រងការអភិវឌ្ឍវិជ្ជជីវៈជាប្រចាំ​ (CPD) និងស្ថិតិ និងសូចនាករអប់រំសាលារៀនសាធារណៈ និងឯកជន៕