ឯកឧត្តម គួច ចំរើន អភិបាល​ខេត្តកណ្តាល លើក​ឡើងថា សាលារៀនឯកជនពិតជាបានរួមចំណែកយ៉ាងសំខាន់ ក្នុងការជួយសម្រួលដល់បន្ទុកក្នុងការបណ្ដុះបណ្ដាលរបស់សាលារដ្ឋ និងជួយសម្រាលអារម្មណ៍របស់អាណាព្យាបាលច្បាស់ថា កូនរបស់គាត់ចេញពីផ្ទះមកចូលរៀននៅសាលាពិតប្រាកដ។

ក្នុង​ឱកាស​អញ្ជើញ​ជាអធិបតី ក្នុងពិធីសម្ពោធជាផ្លូវការ​សាលា​រៀនវ៉េស្ទឡាញន៍ សាខាទី១១ និង​សាលា​ភាសាលីដឺលែន សាខាទី២ ស្ថិត​ក្នុងក្រុងតាខ្មៅ កាលពីព្រឹកថ្ងៃទី១២ ខែសីហា ឯកឧត្តម គួច ចំរើន បានមានប្រសាសន៍ថា សម្រាប់ខេត្តកណ្ដាលមានសាលារៀនឯកជនចំនួន ២៣៣សាលា ក្នុងនោះជាសាលាចំណេះដឹងទូទៅចំនួន ២៧សាលា ត្រូវបានទទួលស្គាល់ដោយក្រសួងអប់រំយុវជន និងកីឡា ហើយមានសិស្សានុសិស្សចូលរៀនប្រមាណជាង ៥ម៉ឺន ៦ពាន់នាក់ ដែលចំនួននេះពិតជាបានរួមចំណែកយ៉ាងសំខាន់ ធ្វើការសំរាលនៃបន្ទុករបស់សាលារដ្ឋ។ មិនត្រឹមតែប៉ុណ្ណោះ វិស័យអប់រំឯកជន បានបង្កើតឱកាសការងារដល់លោកគ្រូ អ្នកគ្រូ និងបងប្អូនប្រជាពលរដ្ឋដទៃទៀតប្រមាណជាង១០០០នាក់ ដែលកំពុងបម្រើការងារក្នុងវិស័យអប់រំនេះផងដែរ។

ឯកឧត្ដមអភិបាលខេត្តបន្តទៀតថា ការបើកសាលានេះមិនត្រឹមតែយកកម្លៃចំណេញនោះទេគឺបានជួយដល់ការអប់រំ និងបណ្ដុះបណ្ដាលធនធានមនុស្ស ហើយការអភិវឌ្ឍន៍ជាបន្តបន្ទាប់របស់សាលាដោយមានការប្រកួតប្រជែងជាមួយសាលារដ្ឋ ដែលបានខិតខំអភិវឌ្ឍន៍ខ្លួនទាំងផ្នែកជំនាញរឹង និងជំនាញទន់ព្រមទាំងបំណិនជីវិតផងដែរ។

បន្ថែមថាពីលើនេះ ឯកឧត្ដមអភិបាលខេត្ត បានចាត់ទុកការអប់រំ គឺពិតជាមានសារៈសំខាន់សម្រាប់ការកសាងធនធានមនុស្សបន្តវេន និងដើម្បីអភិវឌ្ឍប្រទេសជាតិឱ្យមានការរីកចម្រើន ជាពិសេសគឺខណៈពេលប្រទេសជាតិយើង និងពិភពលោកកំពុងតែដើរនៅលើបរិបទនៃការរីកចម្រើននៃបច្ចេកវិទ្យា។

បើតាម ឯកឧត្តម គួច ចំរើន រាជរដ្ឋាភិបាលនីតិទី៧ នៃរដ្ឋសភា បាននឹងកំពុងបន្តថែរក្សាសុខសន្តិភាព ជំរុញកំណើនសេដ្ឋកិច្ច និងការ អភិវឌ្ឍ ក្នុងចក្ខុវិស័យដឹកនាំប្រទេស និងប្រជាជនឱ្យមានកិត្យានុភាពជាតិ ដោយប្រែក្លាយខ្លួន ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងឆ្ពោះទៅសម្រេចជាប្រទេសមាន ចំណូលខ្ពស់នៅឆ្នាំ២០៥០ តាមរយៈការដាក់ចេញយុទ្ធសាស្ត្របញ្ចកោណដំណាក់កាលទី១ ដើម្បី កំណើន, ការងារ, សមធម៌, ប្រសិទ្ធភាព និងចីរភាព និងកំណត់យកនូវអាទិភាពគន្លឹះ ចំនួន ៥ គឺ៖ មនុស្ស, ផ្លូវ, ទឹក, ភ្លើង និងបច្ចេកវិទ្យា។

ក្នុងឱកាសនោះដែរ ឯកឧត្តមអភិបាលខេត្ត ក៏បានលើកទឹកចិត្តដល់សាលារៀនទាំងរដ្ឋ និងឯកជន គួរ​ដាក់បញ្ចូលកម្មវិធី “មនសិការពលរដ្ឋល្អ”ក្នុងកម្មវិធីសិក្សា ដើម្បីជាការបណ្ដុះបណ្ដាលសមត្ថភាព ស្មារតីឆន្ទៈ សេចក្ដីថ្លៃថ្នូរ និងភាពជាពលរដ្ឋល្អរបស់យុវជនសម្រាប់កម្ពុជា និងជាការផ្ដល់ឱកាសដល់យុវជនក្នុងការកសាងភាពជាពលរដ្ឋល្អ ដើម្បីត្រៀមខ្លួនចូលរួមអភិវឌ្ឍប្រទេសជាតិ ក្នុងគោលបំណងកសាងកម្លាំងរួមជាធ្លុងមួយប្រកបដោយសាមគ្គីភាព ឯកភាពជាតិ និងសុខុដុមនីយកម្មជាតិដើម្បីអនាគតកម្ពុជា៕