ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា កំពុងជំរុញសាលានានាដើម្បីចូលរួមលើកកម្ពស់ការអាន ការសរសេរភាសាខ្មែរឱ្យបានត្រឹមត្រូវ។ ទន្ទឹមនឹងនេះ ក្រសួងអប់រំ ក៏បានរៀបចំកម្មវិធីប្រឡងសំណេរចំប៉ី ក្នុងគោលបំណងឱ្យសិស្សថ្នាក់ទី៥ និងទី៦ បានបង្ហាញសមត្ថភាព នៃសំណេរអត្ថបទ មានភាពក្លាហាន មានទំនុកចិត្តក្នុងការចូលរួមប្រកួតប្រជែងនានា ពង្រឹងការអនុវត្តសំណេរសរសេរតាមអាន របស់សិស្សានុសិស្សកម្រិតបឋមសិក្សា និងជំរុញទឹកចិត្តឱ្យកូនខ្មែរស្រឡាញ់ ចូលរួមថែរក្សាអក្សរសាស្ត្រខ្មែរ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា កម្មវិធីប្រឡងសំណេរចំប៉ី ជាកម្មវិធីមួយដែលក្រសួងបានដាក់អនុវត្តទៅតាមស្មារតី នៃការប្រឡងសំណេរអង្គរកន្លងមកនេះ ដើម្បីជំរុញឱ្យកុមារកម្ពុជាខិតខំប្រឹងប្រែងសរសេរភាសាខ្មែរបានត្រឹមត្រូវ។
អ្នកនាំពាក្យក្រសួងអប់រំ បញ្ជាក់បន្ថែមថា ការរៀបចំកម្មវិធីប្រឡងសំណេរចំប៉ី ក៏ដូចជាការដាក់ឱ្យអនុវត្តកម្មវិធីសរសេរតាមអាននៅក្នុងថ្នាក់រៀន និងនៅសាលារៀន ក៏ជាសកម្មភាពមួយជំរុញឱ្យការរៀន និងបង្រៀនភាសាខ្មែរកាន់តែមានភាពប្រសើរឡើង ក៏ដូចជាជំរុញ និងលើកកម្ពស់ការរៀនភាសាខ្មែរនៅតាមសាលារៀនឱ្យមានការប្រើប្រាស់ភាសាខ្មែរបានត្រឹមត្រូវផងដែរ។
ដើម្បីលើកកម្ពស់ភាសាខ្មែរ និងអក្សរសាស្ត្រខ្មែរទាមទារអ្នកសិក្សាមានបម្រុងប្រយ័ត្នចងចាំ សរសេរបានត្រឹមត្រូវតាមអក្ខរាវិរុទ្ធ ក្បួនខ្នាតវេយ្យាករណ៍ និងចេះពីរបៀបសរសេរអត្ថបទបានច្បាស់លាស់។
ដោយហេតុថា ការប្រើប្រាស់ភាសាក្នុងការនិយាយស្តី បញ្ចេញសូរសំឡេង និងការសរសេរ មិនទាន់ចុះសម្រុងគ្នាទាំងស្រុង ទើបវចនានុក្រមសម្តេចព្រះមហាសង្ឃរាជ ជួន ណាត ត្រូវបានប្រកាសឱ្យប្រើប្រាស់ជាផ្លូវការ ឬជាគោល សម្រាប់ការនិយាយស្តី បញ្ចេញសំឡេង និងការប្រកប ឬការសរសេរ ត្រូវយកតាមវចនានុក្រមសម្តេចព្រះមហាសង្ឃរាជ ជួន ណាត។
គួរជម្រាបជូនថា ការពង្រឹងសមត្ថភាពរៀនភាសាខ្មែរនេះ ក្រៅពីការរៀបចំឱ្យមានក្នុងកម្មវិធីសិក្សាទូទៅ ក្រសួងអប់រំ ក៏បានដាក់ចេញនូវសេចក្ដីណែនាំដែលសាលាឯកជននានាក៏មានដាក់បញ្ចូលការរៀនភាសាខ្មែរនៅក្នុងកម្មវិធីសិក្សារបស់ខ្លួនផងដែរ៕
