មហាព្រឹត្តិការណ៍ការងារដ៏ធំប្រចាំឆ្នាំ គឺពិព័រណ៌ការងារ និងផលិតភាពជាតិឆ្នាំ២០២៤ គ្រោងនឹងប្រព្រឹត្តិធ្វើ​រយៈពេល២ថ្ងៃ គឺនៅថ្ងៃសៅរ៍ អាទិត្យ ទី២៦-២៧ ខែតុលា ឆ្នាំ២០២៤ ដោយផ្តល់​ឱកាស​ការងារ​ជាង៣ម៉ឺន​កន្លែង​ពីក្រុម​ហ៊ុន​រោងចក្រ និង​សហគ្រាស​ធំៗ​ចំនួន១៥០ នៅអគារពិព័រណ៌កោះពេជ្រ។

យោង​តាមមន្រ្តីទីភ្នាក់ងារជាតិ មុខរបរ និង​ការងារ នៃក្រសួងការងារ និង​បណ្តុះបណ្តាលវិជ្ជាជីវៈ បាន​ឱ្យដឹងថា ពិព័រណ៍​ការងារ​ថ្នាក់ជាតិឆ្នាំនេះ គឺមានកិច្ចសហការជាមួយ​សហភាព​សហព័ន្ធយុវជន​កម្ពុជា​រាជធានីភ្នំពេញ សមាគមវាយនភណ្ឌសម្លៀកបំពាក់ ស្បែកជើង និង​ផលិតផល​ធ្វើដំណើរ​កម្ពុជា (TAFTAC) មូលនិធិអភិវឌ្ឍន៍ជំនាញ (SDF) និង​ក្រោម​ការ​គាំទ្រ​ដោយ​អង្គការអន្តរជាតិខាងការងារ (ILO)។ មន្រ្តីដដែលបន្ថែមថា ក្នុងព្រឹត្តិការណ៍​រយៈពេល​២ថ្ងៃនេះ ក្រៅពីផ្តល់​ឱកាស​ការងារ​ដល់សិស្ស​និស្សិត និង​អ្នកស្វែង​រក​ការងារធ្វើ​ចំនួនជាង៣ម៉ឺនកន្លែងហើយ ក៏​មានរួម​បញ្ចូល​សិក្ខា​សាលា ដើម្បី​លើក​កម្ពស់​ការយល់ដឹង និង​បំផុស​គំនិត​ទាក់ទង​នឹង​ផលិតភាព​ការងារ តាមរយៈ​ការ​ចែក​រំលែក​ចំណេះដឹង បទពិសោធន៍​ល្អៗ និង​គន្លឹះសំខាន់ៗ​ពីសំណាក់​វាគ្មិន​ជំនាញៗ និង​ផ្សព្វផ្សាយ​លើក​កម្ពស់​ការ​យល់ដឹងពី​សារសំខាន់ នៃការ​បង្កើន​ផលិតភាព​ការងារ និង​សហគ្រិនភាព បញ្ហា​ប្រឈម នៃផលិតភាព និង​បង្ហាញពី​ការ​វិវត្តបច្ចេកវិទ្យាថ្មីៗ ដែលប្រទេស​ជឿនលឿន និងប្រទេស​កំពុង​អភិវឌ្ឍ​មួយ​ចំនួន​ប្រើប្រាស់​ដើម្បី​គ្រប់គ្រង​ការងារ និង​ខ្សែ​សង្វាក់ផលិតកម្ម ជាពិសេស​បំផុស​ស្មារតី និង​ពង្រីក​ប្រសិទ្ធភាព​ការងារ​ក្នុង​បរិបទ​ការងារតាមគន្លងប្រក្រតីថ្មី។

ពិព័រណ៍ការងារ​ថ្នាក់ជាតិ ត្រូវ​បានរៀបចំធ្វើជាលើកដំបូង​នៅក្នុងឆ្នាំ​២០១១ គិត​មក​ដល់ពេលនេះ ទីភ្នាក់ងារជាតិមុខរបរ និង​ការងារ បានរៀបចំ​ពិព័រណ៍ការងារថ្នាក់ជាតិនេះ​ចំនួន​១៣លើក​រួចមកហើយ ក្នុងគោលបំណង រក្សាតុល្យ​ភាព​ក្នុងទីផ្សារ​ការងារ តាមរយៈ​ការ​ជួយជ្រោមជ្រែង​និយោជក​ដែលមាន​តម្រូវ​ការ​ជ្រើសរើស​កម្លាំង​ពលកម្ម និង​អ្នកស្វែង​រក​ការងារ​ធ្វើ​កំពុង​មានតម្រូវការ​ការងារ, និយោជក និង​អ្នកស្វែង​រក​ការងារ​អាចជ្រើសរើស​បុគ្គលិក និង​ដាក់ពាក្យ​សុំការងារផ្ទាល់ ឬសម្ភាសន៍​ការងារ​នៅ​នឹង​កន្លែង​ដោយស្រួល, បង្កើត​ឱ្យ​មានវេទិកា​ការងារ​ដ៏ធំ​ជួបជុំគ្នា​នៅមួយ​កន្លែង​ដោយងាយស្រួល រវាងអ្នកស្វែង​រក​ការងារ និង​និយោជក អ្នកផ្តល់​ការអប់រំ​បណ្តុះបណ្តាល និង​ដៃគូ​ពាក់ព័ន្ធនានា ដើម្បីធ្វើការ​ផ្លាស់ប្តូរ និង​ចែក​រំលែក​ព័ត៌មានទីផ្សារ​ការងារ, បន្ត​ជំរុញ​លើក​កម្ពស់​ការយល់ដឹងស្តីពីការ​បង្កើន​ផលិតភាព​ការងារ​តាមរយៈ​សិក្ខា​សាលា​ផលិតភាព, បន្ត​ជំរុញ​លើក​កម្ពស់ការយល់ដឹងស្តីពីសហគ្រិនភាព។

តាមរបាយការណ៍របស់ទីភ្នាក់ងារជាតិមុខរបរ និងការងារ សម្រាប់រយៈពេល​៦ឆ្នាំចុងក្រោយនេះ កម្មវិធីពិព័រណ៍ការងារ និងផលិតភាពជាតិបានកៀរគរអ្នកចូលរួមទស្សនាកើនឡើងពីមួយឆ្នាំទៅមួយឆ្នាំ និងផ្តល់​ឱកាស​ការងារ​ដល់សិស្ស​និស្សិត និង​ពលរដ្ឋ​រាប់ម៉ឺននាក់ ក្នុងនោះ​កាលឆ្នាំ២០១៨ ព្រឹត្តិការណ៍​នេះបានផ្តល់​ឱកាស​ការងារ​ជាង​២ម៉ឺននាក់ ហើយ​ទទួលបាន CV ចំនួនជាង៤ម៉ឺន, ឆ្នាំ២០១៩ ផ្តល់​ឱកាស​ការងារ​ជាង ១ម៉ឺនកន្លែង និងទទួលបាន CV ចំនួនជិត៥ម៉ឺន, ឆ្នាំ២០២០ ផ្តល់​ឱកាស​ការងារជាង ៥ពាន់កន្លែង នឹងទទួលបាន CV ចំនួនជាង១ពាន់, ឆ្នាំ២០២១ ផ្តល់​ឱកាស​ការងារជាង២ម៉ឺនកន្លែង នឹងទទួលបាន CV ចំនួនជាង១ពាន់, ឆ្នាំ២០២២ ផ្តល់​ឱកាស​ការងារ២ម៉ឺនកន្លែង នឹងទទួលបាន CV ជាង២ម៉ឺន៤ពាន់ ហើយ​ចុងក្រោយនេះ នៅឆ្នាំ​២០២៣ ផ្តល់​ឱកាស​ការងារជាង ២ម៉ឺន១ពាន់កន្លែង ហើយទទួលបាន CV ចំនួនជាង ២ម៉ឺន២ពាន់ CV។

យ៉ាងណាក៏ដោយសម្រាប់ឆ្នាំ២០២៤នេះ ជាមួយនឹងការផ្តល់​ឱកាស​ការងារជាង៣ម៉ឺនកន្លែង ពីក្រុមហ៊ុន​សហគ្រាស​ប្រមាណ ១៥០ ទីភ្នាក់ងារជាតិមុខបរ និងការងារ រំពឹងថា នឹងមានអ្នកចូលរួមប្រមាណ ៤ម៉ឺននាក់ ដូច្នេះសម្រាប់យុវជន សិស្ស និស្សិត និងអ្នកកំពុងស្វែង​រកការងារ សូមកុំភ្លេច​ចូលរួម​ក្នុង​ព្រឹត្តិការណ៍ថ្នាក់ជាតិនេះ ដើម្បីទទួលបានឱកាស​ការងារដែលខ្លួនប៉ងប្រាថ្នា៕