យោងតាមរបាយការណ៍របស់ Statista បានបង្ហាញថា នៅឆ្នាំ២០២៤ មានយុវជនទូទាំងពិភពលោក ប្រមាណ ៦៥លាននាក់ គ្មានការងារធ្វើ។ ខណៈចាប់តាំងពីមានវិបត្តិកូវីដ-១៩មកទល់បច្ចុប្បន្ន អត្រាអត់ការងារធ្វើរបស់យុវជននៅតែខ្ពស់ជាង មនុស្សវ័យកណ្ដាលរហូតដល់ ៣,៥ដង។

បញ្ញាសិប្បនិម្មិត (AI) មិនបានធ្វើឱ្យបញ្ហានេះងាយស្រួលដោះស្រាយនោះទេ។ ការស្រាវជ្រាវរំពឹងថា បច្ចេកវិទ្យានេះ ផ្លាស់ប្ដូរការងារចំនួន ៨៣ លានកន្លែង ហើយវាក៏ត្រូវបានគេរំពឹងថា នឹងបង្កើតការងារថ្មីចំនួន ៦៩លានក​ន្លែងនៅឆ្នាំ២០២៧ ដែលការវិវឌ្ឍនេះបង្ហាញថា យុវជនត្រូវចាប់យកអាជីព ដែលកំពុងមានតម្រូវការខ្ពស់ក្នុងទីផ្សារការងារ និងអភិវឌ្ឍជំនាញឱ្យស្របនឹងតម្រូវការជាក់ស្ដែង។

វេទិកាសេដ្ឋកិច្ចពិភពលោក (WE Forum) បានបង្ហាញនូវវិធីសាស្ត្រចំនួន ៣ ដែលអាចជំរុញ អ្នកមានទេពកោសល្យ និងបុគ្គលិកជំនាញថ្មី ឱ្យប្រឹងប្រែងចាប់ឱកាស និងបង្កើតឱកាសបន្ថែមទៀត សម្រាប់យុវជនទូទៅ។

លើកកម្ពស់ចំណេះដឹងសហគ្រិនភាពក្នុងចំណោមយុវជន

តាមរយៈការលើកកម្ពស់ចំណេះដឹងសហគ្រិនភាព យុវជននឹងមានសមត្ថភាពបង្កើតការងារសម្រាប់ខ្លួន និងសហគមន៍របស់ខ្លួនឯង។ ការទទួលបានការងារ នឹងជួយលើកកម្ពស់ជីវភាពរស់នៅរបស់គេ ហើយពួកគេក៏អាចចូលរួមផ្លាស់ប្តូរពិភពលោកបានផងដែរ។ មានចំណុចសំខាន់ៗចំនួន ២ ដែលជំនាញសហគ្រិនភាពអាចចូលរួមដោះស្រាយបញ្ហាសង្គម។

១. ភាពជាសហគ្រិនបង្កើតឱកាសការងារ មិនត្រឹមតែសម្រាប់សហគ្រិនខ្លួនឯងប៉ុណ្ណោះទេ ប៉ុន្តែសម្រាប់សហគមន៍ទាំងមូល។

២. ភាពជាសហគ្រិន បង្រៀនឱ្យមនុស្សមានជំនាញសំខាន់ៗដូចជា គំនិតច្នៃប្រឌិត ការដោះស្រាយបញ្ហា ការប្រាស្រ័យទាក់ទង និងជំនាញពិសេសៗមួយចំនួនទៀត ដែលគាំទ្រដល់អនាគតរបស់ពួកគេ។ ក្នុងស្ថានភាពសង្គមបច្ចុប្បន្ន យុវជនសម័យថ្មី ចាំបាច់ត្រូវមានផ្នត់គំនិត ជំនាញ និងស្មារតីជាសហគ្រិន។

ការលើកកម្ពស់ការអប់រំ និងការបណ្ដុះបណ្ដាលជំនាញ

យោងតាមអង្គការយូណេស្កូ នៅតែតិចជាង ៣៨ភាគរយ នៃយុវជនទទួលបានអត្ថប្រយោជន៍ពីការអប់រំខ្ពស់ ប៉ុន្តែសម្រាប់យុវជនភាគច្រើន ជាពិសេសក្នុងប្រទេសកំពុងអភិវឌ្ឍន៍ មនុស្សមួយចំនួនធំផ្ដល់អាទិភាពដល់ការរកប្រាក់ និងអាហារសម្រាប់រស់នៅប្រចាំថ្ងៃ ជាជាងការវិនិយោគលើការអប់រំ។

បញ្ហានេះ បានបង្កើតជាសំណួរ ថា តើគួរបង្កើតការលើកទឹកចិត្តដោយសមធម៌សម្រាប់យុវជនពីគ្រប់មជ្ឈដ្ឋាន ដោយរបៀបណា ដើម្បីឱ្យពួកគេទទួលបានឱកាសរៀនសូត្រ និងពង្រឹងជំនាញរបស់ខ្លួន។

ការផ្ដល់អាហារូបករណ៍គឺជាវិធីសាស្ត្រប្រពៃណី ក្នុងការលើកទឹកចិត្តឱ្យយុវជនស្វែងរក និងទទួលបានការអប់រំ។ ទន្ទឹងមនឹងនេះ នៅប្រទេសស្វីស យុវជនរហូតដល់ ៩០ភាគរយ ទទួលបានការអប់រំ ឬវិញ្ញាបនបត្រកម្មសិក្សា ដែលមានន័យថា ភាពអត់ការងារក្នុងចំណោមយុវជនគឺមានទាបបំផុត។ យុវជនស្វីស ត្រូវបានលើកទឹកចិត្តឱ្យចូលរួមក្នុងការបណ្ដុះបណ្ដាលក្រៅម៉ោងក្នុងក្រុមហ៊ុន ដើម្បីពង្រឹងជំនាញរបស់ខ្លួនជាប្រចាំ។ ការបន្តពង្រឹងជំនាញឱ្យស្របតាមការប្រែប្រួលនៃសង្គម បានធ្វើឱ្យយុវជនទទួលបានប្រាក់ខែសមរម្យ មានជំនាញល្អសម្រាប់ការប្រកបអាជីព និងងាយស្រួលចូលទៅក្នុងទីផ្សារការងារ។

ជាមួយគ្នានេះ ការបង្កើតវគ្គសិក្សាអនឡាញ គឺជាវិធីសាស្ត្រដែលមានប្រសិទ្ធភាពមួយទៀត សម្រាប់យុវជន រៀនសូត្រ និងពង្រឹងជំនាញរបស់ខ្លួន ខណៈដែលពួកគេនៅតែអាចបំពេញការងាររកប្រាក់ចំណូលបាន។

បរិបទពិភពលោកបច្ចុប្បន្ន កំពុងឆ្ពោះទៅរកសេដ្ឋកិច្ចដែលផ្អែកលើជំនាញ ដោយផ្ដោតសំខាន់លើមនុស្សជំនាញ និងសមត្ថភាពបំពេញការងាររបស់មនុស្សម្នាក់ ជាជាងសញ្ញាបត្រ ប្រវត្តិការងារ ឬមុខតំណែងដែលគេធ្លាប់មានពីមុន។

ការផ្ដល់រង្វាន់សម្រាប់យុវជនមានអាប្បកិរិយាវិជ្ជមាន

ភពផែនដីរបស់យើងកំពុងមានវិបត្តិ ជាពិសេស គឺវិបត្តិបរិស្ថាន និងអាកាសធាតុ។ ត្រង់ចំណុចនេះ វេទិកាសេដ្ឋកិច្ចពិភពលោក បានផ្ដល់អនុសាស្ត្រឱ្យប្រមូលផ្ដុំយុវជន ឱ្យធ្វើសកម្មភាពណាមួយ ដើម្បីចូលរួមទប់ស្កាត់បញ្ហាបរិស្ថាន និងអាកាសធាតុ ជាថ្នូរនឹងការលើកទឹកចិត្ត​ តាមរយៈការផ្ដល់រង្វាន់ ឬថវិកា។ សកម្មភាពនេះ ផ្ដល់ផលវិជ្ជមាន សម្រាប់ផែនដី សង្គម និងយុវជនផ្ទាល់៕