តើអ្នកធ្លាប់បានសង្កេតដែរទេថា មនុស្សដែលមានភាពវៃឆ្លាត និងការគិតស៊ីជម្រៅជាមនុស្សដែលបរាជ័យក្នុងការបង្កើតសុភមង្គលសម្រាប់ការរស់នៅ? ពួកគេអាចជាបុគ្គល ដែលទទួលភាពជោគជ័យក្នុងជីវិត មានដៃគូជីវិតដែលគេពេញចិត្ត មានគ្រួសារដ៏កក់ក្ដៅ និងការងារល្អ ប៉ុន្តែពួកគេនៅតែទទួលអារម្មណ៍ឯកោ តានតឹង និងសោកសៅ។

បើយោងតាមគេហទំព័រ Learning Mind បានបង្ហាញពីហេតុផលចំនួន ៦ដែលនាំឱ្យមនុស្សឆ្លាតមិនអាចរស់នៅដោយរីករាយ៖

១. វិភាគស៊ីជម្រៅគ្រប់រឿង៖ មនុស្សដែលមាន IQ ខ្ពស់ភាគច្រើន មានទំនោរក្លាយទៅជាមនុស្សគិតច្រើនហួសហេតុ (Over thinker) ដែលជាទូទៅគេវិភាគទៅលើព្រឹត្តិការណ៍ទាំងអស់ដែលគេបានជួបប្រទះក្នុងជីវិត។ ទម្លាប់នេះ ធ្វើឱ្យគេឆាប់ខ្សោះខ្លួន អស់កម្លាំង និងតានតឹងច្រើន ជាពិសេសនៅពេលដែលដំណើរនៃការគិតរបស់គេ ធ្វើឱ្យគេមានអារម្មណ៍ថា មិនពេញចិត្ត ឬខកចិត្ត។

២. មានស្ដង់ដារស់នៅខ្ពស់ ៖ បុគ្គលដែលឆ្លាត តែងតែដឹងអំពីអ្វីដែលគេចង់បានក្នុងជីវិត និងមានការតាំងចិត្តខ្ពស់ក្នុងការឆ្ពោះទៅរកអ្វីដែលគេចង់បាន។ ហេតុផលនេះ ធ្វើឱ្យគេមិនងាយនឹងពេញចិត្តចំពោះសមិទ្ធផលដែលគេសម្រេចបាននោះទេ ទាំងក្នុងទំនាក់ទំនង ការងារ ការអភិវឌ្ឍសមត្ថភាព និងអ្វីៗដែលគេកំពុងមាន។ ម្យ៉ាងទៀត មនុស្សដែលមានគំនិត ទ្រឹស្តី និងការស្រមើស្រមៃច្រើន ពេលខ្លះពិបាករស់នៅក្នុងពិភពជាក់ស្ដែង ព្រោះរាល់ការរំពឹងរបស់គេ មិនមែនសុទ្ធតែក្លាយជាការពិតនោះទេ។

៣. តឹងតែងនឹងខ្លួនឯងពេក ៖ ជាទូទៅ មនុស្សឆ្លាតតែងតែមានវិន័យតឹងតែងខ្លាំងចំពោះខ្លួនឯង។ គេតែងតែសង្កេត និងតាមដានទម្លាប់ និងឥរិយាបថខ្លួន​ឯងជានិច្ច ទោះជាការអនុវត្តបែបនេះជាទម្លាប់ល្អ ប៉ុន្តែវាហាក់ដូចជាកំពុងតែរកហេតុផលស្ដីបន្ទោសខ្លួន​​ឯងគ្រប់ពេល ។ ជួនកាលខណៈពេលដែលកំពុងគេង ស្រាប់តែនឹកឃើញកំហុសដែលគេបានធ្វើខុស កាលពីថ្ងៃមុន ខែមុន ឬឆ្នាំមុន ហើយស្ដីបន្ទោសខ្លួន​ឯងភា្លម ដែលធ្វើឱ្យខ្លួនឯងខូចអារម្មណ៍ និងគេមិនលក់។

ជានិច្ចជាកាល មនុស្សឆ្លាតឧស្សាហ៍មានបទពិសោធន៍នឹករឿងរ៉ាវ និងកំហុសដែលគេបានធ្វើក្នុងអតីតកាល។ ទម្លាប់នេះ ធ្វើឱ្យគេមានអារម្មណ៍មិនគប្បី ភាពមិនពេញចិត្ត និងការគិតអវិជ្ជមាន ហើយទម្លាប់នេះគឺជាថ្នាំពុលនៃសុភមង្គល។

៤. ជីវិតជាក់ស្ដែងមិនគ្រប់គ្រាន់ ៖ ភាពស៊ីជម្រៅ និងការសម្រៃមិនចេះចប់របស់គេ ធ្វើឱ្យគេពិបាកនឹងសម្រាក ឬរីករាយនឹងរឿងល្អក្នុងជីវិត។ ការរស់នៅក្នុងពិភពលោកដូចមនុស្សសាមញ្ញ ធ្វើឱ្យពួកគេឆាប់ធុញ ជាហេតុនាំឱ្យគេបង្កើតបានគំនិតថ្មីៗ ប្លែកៗ និងគួរឱ្យចាប់អារម្មណ៍ ដែលអ្នកដទៃនឹកស្មានមិនដល់។ ជួនកាលគេមានអារម្មណ៍ថា គេគួរតែរស់នៅក្នុងសម័យដែលជឿនលឿនជាងនេះ ឬរស់នៅភពផ្សេងដែលគួរឱ្យចាប់អារម្មណ៍ជាងនេះ។ ខណៈដែលមានអារម្មណ៍ថាខ្លួនឯងចម្លែក ឬខុសពីគេ តែងតែធ្វើឱ្យមនុស្សឆ្លាតពិបាកបង្កើតភាពរីករាយសម្រាប់ខ្លួនឯង។

៥. ពិបាកទាក់ទងជាមួយអ្នកដទៃ៖ ចំណុចនេះ គឺជាភាពសោកសៅដ៏ធំបំផុតមួយរបស់មនុស្សឆ្លាត ព្រោះជានិច្ចជាកាលមិនងាយមានមនុស្សដែលយល់ពីការគិត និងគំនិតរបស់គេនោះទេ។ គេពិបាកស្វែងរកមនុស្សដែលអាចជជែកជាមួយ ហើយយល់ពីអ្វីដែលគេចង់បង្ហាញប្រាប់ ជាហេតុធ្វើឱ្យមនុស្សឆ្លាតមានទំនាក់ទំនងក្នុងសង្គមតិចជាងមនុស្សទូទៅ។ យ៉ាងណាមិញ មិនមែនមានន័យថា គេមិនចង់មានទំនាក់ទំនងជាមួយអ្នកដទៃនោះទេ ប៉ុន្តែគេចង់ជជែកជាមួយមនុស្សដែលអាចយល់ពីគេ ហើយជាទូទៅគេចូលចិត្តលើកប្រធានបទដែលមានប្រយោជន៍ និងអត្ថន័យក្នុងការរស់នៅ។

៦. ងាយរងសម្ពាធផ្លូវចិត្ត៖ បើតាមការស្រាវជ្រាវរបស់សាកលវិទ្យាល័យ CAMBRIDGE ​បានបង្ហាញថា មនុស្សដែលមាន IQ ខ្ពស់ជាច្រើន មានបញ្ហាផ្លូវចិត្ត ដែលបណ្ដាលមកពី បញ្ហាថប់បារម្ភក្នុងសង្គម និងជំងឺប៊ីផូឡា (bipolar)។ ខណៈអ្នកខ្លះមិនមានជំងឺផ្លូវចិត្ត ប៉ុន្តែមានទំនោរទៅរកការបាក់ទឹកចិត្ត ដែលបណ្ដាលមកពី ការគិតហួសកម្រិត៕