ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រោយពីបានបង្កើតអស់រយៈពេលជិត១ឆ្នាំ ក្រុមប្រឹក្សាជាតិ ដើម្បីផ្តល់ឋានៈសាស្រ្តាចារ្យ បានបើកកិច្ចប្រជុំដំបូងរបស់ខ្លួនកាលពីសប្តាហ៍កន្លងទៅនេះ ដើម្បីត្រួតពិនិត្យស្ថានភាពរួម និងវឌ្ឍនភាពការងារដែលបានអនុវត្តដើម្បីកំណត់នូវទិសដៅការងារ ក្នុងគោលបំណងលើកកម្ពស់គុណវុឌ្ឍិ និងគុណតម្លៃរបស់សាស្ត្រាចារ្យ ក៏ដូចជាគ្រូបង្រៀន។
កិច្ចប្រជុំនោះ មានការចូលរួមពី ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមប្រឹក្សាជាតិដើម្បីផ្តល់ឋានៈសាស្ត្រាចារ្យក្នុងព្រះរាជាណាចក្រកម្ពុជា (ក.ជ.ស.), ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាអនុប្រធានអចិន្ត្រៃយ៍ ក.ជ.ស., ឯកឧត្តមបណ្ឌិតសភាចារ្យ ឯកឧត្តមរដ្ឋលេខាធិការ ឯកឧត្តមសាស្ត្រាចារ្យ ដែលជាអនុប្រធាន និងសមាជិកក្រុមប្រឹក្សាជាតិ ក.ជ.ស. ព្រមទាំងឯកឧត្តម លោកជំទាវ លោក លោកស្រី តំណាងអង្គភាពពាក់ព័ន្ធមួយចំនួនទៀត។
ឯកឧត្តម រង្សី វិស្សុត មានប្រសាសន៍ថា តួនាទីរបស់ក្រុមប្រឹក្សាជាតិ ក.ជ.ស. ក្នុងការពង្រឹងគុណភាព នៃការផ្ដល់ឋានៈសាស្ត្រាចារ្យ តាមរយៈការវាយតម្លៃ លក្ខខណ្ឌនៃការជ្រើសរើស និងការពិនិត្យផ្ទៀងផ្ទាត់ច្បាស់លាស់លើគុណភាព នៃការប្រឡងជ្រើសរើសសាស្ត្រាចារ្យ ដើម្បីធានាបាននូវគុណតម្លៃរបស់សាស្ត្រាចារ្យនៅក្នុងព្រះរាជាណាចក្រកម្ពុជា។
ក្នុងកិច្ចប្រជុំលើកដំបូងនោះ ឧបនាយករដ្ឋមន្ត្រីប្រចាំការ បានណែនាំឱ្យបង្កើតគណៈកម្មការជំនាញតាមវិស័យ និងការរៀបចំគោលការណ៍ណែនាំស្តីពីការវាយតម្លៃ ការជ្រើសរើស និងការផ្តល់ឋានៈសាស្ត្រាចារ្យតាមវិស័យជាដើម។ ក្នុងនោះ ឯកឧត្តមក៏ស្នើឱ្យមានការគិតគូរអំពីក្របខ័ណ្ឌ នៃការរៀបចំ Expert Group ដើម្បីជាយន្តការត្រួតពិនិត្យពីការវាយតម្លៃ ជ្រើសរើស និងផ្ដល់ឋានៈសាស្ត្រាចារ្យ ដើម្បីឱ្យដំណើរការផ្ដល់ឋានៈនេះ ប្រកបដោយភាពហ្មត់ចត់ មានគុណភាព និងធានាឱ្យបាននូវគុណវុឌ្ឍិនិងគុណតម្លៃនៃសាស្ត្រាចារ្យ។
សូមជំរាបថា ក្រុមប្រឹក្សាជាតិដើម្បីផ្តល់ឋានៈសាស្រ្តាចារ្យក្នុងព្រះរាជាណាចក្រកម្ពុជា ត្រូវបានបង្កើតឡើងដោយព្រះរាជក្រឹត្យចុះថ្ងៃទី២៣ ខែមករា ឆ្នាំ២០១៣ ហើយសមាសភាពក្រុមប្រឹក្សានេះ ត្រូវបានតែងតាំង តាមរយៈអនុក្រឹត្យ ចុះថ្ងៃទី៣ ខែមករា ឆ្នាំ២០២៥។ ក្រុមប្រឹក្សានេះ មានសមាសភាពចំនួន១០រូប ដែលមាន ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ជាប្រធាន ហើយ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា ជាអនុប្រធានអចិន្រ្តៃយ៍។
យោងតាមព្រះរាជក្រឹត្យ ក្រុមប្រឹក្សាជាតិផ្តល់ឋានៈសាស្រ្តាចារ្យ មានភារកិច្ចក្នុងការកំណត់នីតិវិធី បែបបទស្តីពីការវាយតម្លៃការជ្រើសរើសផ្តល់ឋានៈសាស្រ្តាចារ្យ, អនុម័តយល់ព្រមលើសមាសភាពគណៈមេប្រយោគសម្រាប់ការវាយតម្លៃឋានៈសាស្រ្តាចារ្យ, អនុម័តយល់ព្រមលើលទ្ធផលនៃការវាយតម្លៃរបស់គណៈមេប្រយោគ, ទទួល និងដោះស្រាយការប្តឹងតវ៉ារបស់គណៈមេប្រយោគ ឬបេក្ខជន និងទទួលអនុវត្តភារកិច្ចផ្សេងៗទៀតដែលរាជរដ្ឋាភិបាលប្រគល់ជូន៕
