ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លោកស្រី លុយ ស៉ើម ជាជីដូនមានវ័យចំណាស់ដែលមានចៅប្រុសស្រី១២នាក់ ប៉ុន្តែមានចៅប្រុសតែម្នាក់ប៉ុណ្ណោះដែលមានបញ្ហាកង្វះអាហារូបត្ថម្ភស្រួចស្រាលធ្វើឱ្យចៅរបស់លោកស្រីមានរូបរាងស្គមស្គាំង និងមិនសូវមានសកម្មភាពរហ័សរហួន។
លោកស្រី លុយ ស៉ើម បានប្រាប់ឱ្យដឹងថា ចៅរបស់គាត់មានរូបរាងតូចល្អិត មិនសូវរហ័សរហួស និងភ្លឹកៗជាងក្មេងដទៃទៀតដែលមានអាយុស្រករគ្នា លើសពីនេះចៅប្រុសរបស់គាត់មិនសូវញ៉ាំឡើយទាំងម្ហូបអាហារ និងនំចំណី។ ប៉ុន្តែបញ្ហាទាំងនេះត្រូវបានកំពុងដោះស្រាយក្រោយដឹងពីមូលហេតុដែលចៅកំពុងមានបញ្ហាកង្វះអាហារូបត្ថម្ភដែលទទួលបានសេវាពិនិត្យ និងតាមដានពីគ្រូពេទ្យនៃមណ្ឌលសុខភាព និងការគាំទ្រពីអង្គការភ្លែនអន្តរជាតិកម្ពុជាដែលមានការចុះតាមដានសុខភាពមួយសប្ដាហ៍ម្ដង និងទទួលបាននំសម្រាប់កុមារដែលមានអាហារូបត្ថម្ភបន្ថែម។
ជីដូនចំណាស់រូបនេះបន្ថែមថា ក្រោយទទួលបានការណែនាំ និងពិនិត្យតាមដានសុខភាពចៅរបស់គាត់បានមួយខែកន្លងមកនេះ លោកយាយសង្កេតឃើញថា ចៅមានកម្លាំង មានសកម្មភាពរហ័សរហួន និងមិនសូវមានជំងឺដូចមុនឡើយ។ ការព្យាបាលដែលទទួលបានពីការណែនាំរបស់អាជ្ញាធរក្នុងតំបន់ និងដៃគូរសហការណ៍រួមមាន ការណែនាំឱ្យដឹងពីរបៀបថែរក្សាអនាម័យ និងបរិភោគទឹកស្អាត ដោយលាងដៃជាមួយសាប៊ូក្រោយចេញពីបង្គន់អនាម័យ ឬមុនធ្វើម្ហូប និងបញ្ចុកអាហារកូន ការងូតទឹកសម្អាតខ្លួនឱ្យកូនឱ្យបានទៀងទាត់ប្រចាំថ្ងៃ និងការចម្អិនអាហារដែលមានបន្លែច្រើនមុខ និងជាបន្លែដែលដាំនៅផ្ទះមិនប្រើប្រាស់ជីគីមី។
ជីដូនកំសត់ពោលទាំងទឹកមុខរីករាយថា «ខ្ញុំពិតជាសប្បាយចិត្តខ្លាំងណាស់នៅពេលដែលបានឃើញចៅមានកម្លាំងជាងមុន អាចលេងបាន និយាយបានច្រើន និងមិនឈឺដូចមុនទៀតឡើយ»។ លោកយាយរូបនេះតាំងចិត្តថានឹងបន្តចិញ្ចឹមចៅតាមការបង្ហាញរបស់អាជ្ញាធរ និងដៃគូរអង្គការពាក់ព័ន្ធទាំងអស់ដែលបានចុះមកបង្ហាត់បង្រៀន និងចូលរួមតាមដានសុខភាពចៅបន្ថែម។
គួរបញ្ជាក់ថា កុមារាកុមារីក្រោម៥ឆ្នាំជាច្រើននាក់នៅក្នុងភូមិពើងឆ័ត្រ ឃុំឃុនរាម ស្រុកបន្ទាយស្រី ខេត្តសៀមរាប ទទួលបានការព្យាបាលពីបញ្ហាកង្វះអាហារូបត្ថម្ភស្រួចស្រាល និងការតាមដានជាបន្តបន្ទាប់ដើម្បីឱ្យកុមារអាចមានសុខភាពល្អឡើងវិញពីមណ្ឌលសុខភាពឃុនរាម និងមានការសហការណ៍ពីអង្គការភ្លែនអន្តរជាតិកម្ពុជា៕
