ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គិតត្រឹមថ្ងៃទី២៤ ខែធ្នូ ឆ្នាំ២០២៣ យុវជនដែលមកពីគ្រួសារក្រីក្រ និងងាយរងហានិភ័យចំនួន ១៧ ២៦៧នាក់ (ស្រី ៥ ៩៣៨នាក់) បានចុះឈ្មោះចូលរៀនជំនាញបច្ចេកទេស និងវិជ្ជាជីវៈ នៅទូទាំងប្រទេស ក្នុងនោះជំនាញមេកានិចទូទៅ និងមេកានិចរថយន្ត មានអ្នកចុះឈ្មោះចូលរៀនច្រើនជាងគេ។ នេះបើតាមការបញ្ជាក់របស់ ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ។
ឯកឧត្តម កត្តា អ៊ន បញ្ជាក់ថា ក្នុងចំណោមយុវជនដែលចុះឈ្មោះរៀនជំនាញបច្ចេកទេសនោះ មាននៅរាជធានីភ្នំពេញ ចំនួន ៦ ៨៧៨នាក់ (ស្រី ២ ២២៩នាក់), បាត់ដំបង ២ ០៥១នាក់ (ស្រី ៩១៧នាក់), សៀមរាប ១ ២១៤នាក់ (ស្រី ២៦៤នាក់), កណ្តាល ៦៦៦នាក់ (ស្រី ១៩៤នាក់), ព្រះសីហនុ ៦០៨នាក់ (ស្រី ២០៦នាក់) និងបណ្ដាខេត្តផ្សេងៗចំនួន ៥ ៨៥០នាក់ (ស្រី ២ ១២៨នាក់)។
សម្រាប់វិស័យដែលយុវជនចុះឈ្មោះចូលរៀនវិញ គឺវិស័យមេកានិចទូទៅ/មេកានិចរថយន្ត មានចំនួនច្រើនជាងគេ គឺ ២៥៨៩នាក់ (ស្រី ១១៣នាក់), សំណង់ចំនួន ២ ៥២៥នាក់ (ស្រី ៣៣០នាក់), អគ្គិសនី និងថាមពល ៥៥៧នាក់ (ស្រី ៦២នាក់), អេឡិចត្រូនិក ៤២០នាក់ (ស្រី ៦១នាក់), កម្មន្តសាល ១២០នាក់ (ស្រី ៧នាក់), ធុរកិច្ច និងព័ត៌មានវិទ្យា ៥ ៦៣៨នាក់ (ស្រី ២ ៩៩៧នាក់) , សេវាកម្ម ៩៩៤នាក់ (ស្រី ៨៥៩នាក់), បរិក្ខារត្រជាក់ និងកម្តៅ ២ ៥៦២នាក់ (ស្រី ៩៩នាក់), ទេសចរណ៍ ១ ០០០នាក់ (ស្រី ៧៤៣នាក់), និងកសិកម្ម និងកសិ-ឧស្សាហកម្ម ៨៦២នាក់ (ស្រី ៦៦៧នាក់)។
ដោយឡែកសម្រាប់កាលបរិច្ឆេទ នៃការចូលរៀនវិញ តាមការបញ្ជាក់របស់អ្នកនាំពាក្យក្រសួងការងារថា ប្រសិនបើមិនមានការប្រែប្រួល ការចូលរៀនដំបូង នឹងផ្តើមនៅថ្ងៃទី១៥ ខែមករា ឆ្នាំ២០២៤។
គូរបញ្ជាក់ផងដែរថា កាលពីថ្ងៃទី១៤ វិច្ឆិកា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីបានដាក់ឱ្យអនុវត្តន៍ជាផ្លូវការនូវការបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ចំនួន ១,៥ លាននាក់ ។ ការបណ្តុះបណ្តាលនេះ គឺដើម្បីឆ្លើយតបទៅនឹងតម្រូវការទីផ្សាររបស់ប្រទេសកម្ពុជា ជាពិសេសនៅក្នុងវិស័យឧស្សាហកម្ម និងវិស័យផ្សេងៗទៀតដែលកំពុងមានតម្រូវការ។
យ៉ាងណាក៏ដោយ បើតាម ឯកឧត្តម កត្តា អ៊ន ចាប់តាំងពីថ្ងៃ នៃការដាក់ឱ្យអនុវត្តជាផ្លូវការនូវកម្មវិធីបណ្តុះបណ្តាលថ្នាក់ជាតិនេះ ក្រសួងការងារបានដុតដៃដុតជើងផ្សព្វផ្សាយព័ត៌មាន ចាត់ក្រុមការងារថ្នាក់ក្រសួងចុះមូលដ្ឋានធ្វើយ៉ាងណាគៀងគយុវជនគោលដៅមកចុះឈ្មោះចូលរៀនជំនាញវិជ្ជាជីវៈ និងបច្ចេកទេសនេះបានយ៉ាងផុសផុល៕
