ក្មេងជំទង់វ័យ១៥ឆ្នាំជនជាតិប៊ែលហ្ស៊ិកមួយរូប បានទទួលសញ្ញាបត្របណ្ឌិតផ្នែករូបវិទ្យាកង់ទិច និងក្លាយជាបុគ្គលវ័យក្មេងបំផុតលើពិភពលោក ដែលទទួលបានសញ្ញាបត្របណ្ឌិតផ្នែកនេះ។

យុវតី Laurent Simons បានការពារនិក្ខេបបទបណ្ឌិតរបស់នាង ដោយជោគជ័យ នៅសាកលវិទ្យាល័យ Antwerp កាលពីដើមសប្ដាហ៍នេះ ហើយគោលដៅបន្ទាប់របស់នាង គឺការរកវិធីធ្វើឱ្យមនុស្សមានជីវិតអមតៈ តាមរយៈការស្រាវជ្រាវផ្នែកវិជ្ជសាស្ត្រ។

កើតនៅប្រទេសបែលហ្ស៊ិក និងបច្ចុប្បន្នរស់នៅក្នុងប្រទេសហូឡង់ យុវតី Laurent ត្រូវបានគេចាត់ទុកថា ជាក្មេងមានទេពកោសល្យពីកំណើត។ នៅអាយុ ៨ឆ្នាំ នាងបានបញ្ចប់ថ្នាក់វិទ្យាល័យ ដោយចំណាយពេលត្រឹមតែ១ឆ្នាំប៉ុណ្ណោះ ក្នុងឆ្នាំ២០១៨, នេះបើយោងតាមទីភ្នាក់ងារសារព័ត៌មាន Reuters។

នៅឆ្នាំ២០១៩ គាត់ស្ទើរតែបានបង្កើតកំណត់ត្រាថ្មីដ៏អស្ចារ្យសម្រាប់ខ្លួនឯងទៅហើយ សម្រាប់ការទទួលបានសញ្ញាបត្រថ្នាក់បរិញ្ញាបត្រ មុនពេលនាងមានអាយុ ១០ឆ្នាំ ប៉ុន្តែនាងបានឈប់រៀនជំនាញវិស្វកម្មអគ្គិសនីនៅសាកលវិទ្យាល័យបច្ចេកវិទ្យា Einhoven ដោយសារតែមានជម្លោះពាក់ព័ន្ធនឹងបញ្ហាកាលវិភាគបញ្ចប់ការសិក្សា។ ផ្ទុយទៅវិញ Laurent បានប្តូរទៅកម្មវិធីបរិញ្ញាបត្ររូបវិទ្យានៅសាកលវិទ្យាល័យ Antwerp ហើយបានបញ្ចប់ការសិក្សាដោយទទួលបានកិត្តិយសបន្ទាប់ពីសិក្សាបានត្រឹមតែ ១៨ខែប៉ុណ្ណោះ ដែលរយៈពេលនេះ គឺលឿនជាងធម្មតា ៣ឆ្នាំ។

នៅអាយុត្រឹម១២ឆ្នាំ ខណៈពេលដែលមិត្តភក្ដិរបស់នាងកំពុងសិក្សានៅថ្នាក់វិទ្យាល័យនៅឡើយ Laurent បានបញ្ចប់ថ្នាក់អនុបណ្ឌិតផ្នែករូបវិទ្យាកង់ទិច ដោយជោគជ័យ។

បន្ទាប់ពីទទួលបានសញ្ញាបត្រអនុបណ្ឌិត នាងបានបន្តសិក្សាថ្នាក់បណ្ឌិត ដោយមានអារម្មណ៍ថា នាងមិនទាន់ឈានដល់គោលដៅ ដែលនាងបានកំណត់នៅឡើយ។ នាងបានប្រាប់ប៉ុស្តិ៍ទូរទស្សន៍ VTM ថា “បន្ទាប់ពីនេះ ខ្ញុំនឹងចាប់ផ្តើមធ្វើការឆ្ពោះទៅរកគោលដៅរបស់ខ្ញុំ គឺការបង្កើតមនុស្សអស្ចារ្យ”។

យោងតាមកាសែត Newsweek និង The Brussels Times Simons បានបញ្ជាក់យ៉ាងច្បាស់ថា នាងចាប់អារម្មណ៍លើការសិក្សាអំពីអមតភាពរបស់មនុស្សតាំងពីនាងមានអាយុ ១១ឆ្នាំមកម្ល៉េះ។

យុវតី Laurent មាន IQ 145 ដែលត្រូវបានចាត់ថ្នាក់ជា “អ្នកមានទេពកោសល្យខ្ពស់” យោងទៅតាមមាត្រដ្ឋាន Wechsler និង Stanford-Binet។

ភ្លាមៗបន្ទាប់ពីការពារបណ្ឌិត នាងបានត្រឡប់ទៅទីក្រុង Munich ជាមួយឪពុករបស់នាង។ នាងបានចុះឈ្មោះចូលរៀនក្នុងកម្មវិធីបណ្ឌិតលើកទីពីរនៅទីនោះរួចហើយ លើកនេះផ្នែកវិទ្យាសាស្ត្រវេជ្ជសាស្ត្រ ដែលមានជំនាញខាងបញ្ញាសិប្បនិម្មិត (AI)៕