ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងប្រៃសណីយ៍ និងទូរគមនាគមន៍ (ក.ប.ទ.) បានប្រកាសពីការរៀបចំ “កម្មវិធីពានរង្វាន់ឌីជីថលកម្ពុជា ឆ្នាំ២០២៤” ក្រោមប្រធានបទ “គាំទ្រដល់ពលរដ្ឋកម្ពុជាក្នុងការប្រើប្រាស់បច្ចេកវិទ្យាឌីជីថល ដើម្បីអនាគតកាន់តែល្អប្រសើរ”។
កម្មវិធីពានរង្វាន់ឌីជីថលកម្ពុជា ឆ្នាំ២០២៤ ធ្វើឡើងក្នុងគោលបំណងជំរុញការធ្វើបរិវត្តិកម្មឌីជីថល ប្រកបដោយបរិយាបន្ន ដោយលើកកម្ពស់ការប្រើប្រាស់ បច្ចេកវិទ្យានិងនវានុវត្តន៍ ឌីជីថល នៅកម្ពុជា តាមរយៈការផ្តល់ពានរង្វាន់ដល់ ក្រសួង ស្ថាប័ន ក្រុមហ៊ុនឯកជន និងសហគ្រិន។
ឯកឧត្តមបណ្ឌិត សំ សិទ្ធិសេរី អគ្គនាយកនៃអគ្គនាយកដ្ឋាន បច្ចេកវិទ្យាគមនាគមន៍ និងព័ត៌មាន ក្រសួងប្រៃសណីយ៍ និងទូរគមនាគមន៍ មានប្រសាសន៍ថា កម្មវិធីបែងចែកជា ៥ប្រភេទពានរង្វាន់ រួមមាន ១. ស្ថាប័នឯកជនល្អបំផុតប្រចាំឆ្នាំ (Private Sector of the Year) 2,500$, ២. បរិយាបន្នឌីជីថលល្អបំផុតប្រចាំឆ្នាំ (Best Digital Inclusion of the Year) 2,500$, ៣. មាតិកាឌីជីថលល្អបំផុតប្រចាំឆ្នាំ (Best Digital Content of the Year) 2,500$, ៤. ពានរង្វាន់រដ្ឋមន្ត្រីសម្រាប់ធុរកិច្ចថ្មីឌីជីថលល្អបំផុតប្រចាំឆ្នាំ (Minister Startup of the Year) 15,000$, និង៥. ការស្រាវជ្រាវនិងនវានុវត្តន៍ឌីជីថលល្អបំផុតប្រចាំឆ្នាំ (Best Digital Research and Innovation of the Year) 7,500$។ ក្នុងនោះ ក៏មានពានរង្វាន់កិត្តិយសស្រ្តីឆ្នើមបច្ចេកវិទ្យាប្រចាំឆ្នាំ (Women in Tech of the Year) ផងដែរ។
បើតាម ក្រសួងប្រៃសណីយ៍និងទូរគមនាគមន៍ ស្ថាប័នជ័យលាភី នឹងទទួលបានប្រាក់រង្វាន់ជាមួយពានរង្វាន់ និងឱកាសទទួលបានការគាំទ្រនានាពី ក.ប.ទ. លើការពង្រីកបណ្តាញទំនាក់ទំនង និងកិត្យានុភាពទាំងក្នុងស្រុក និងនៅលើឆាកអន្តរជាតិ។
កម្មវិធីនេះ ចាប់ផ្តើមបើកទទួលពាក្យលើប្រព័ន្ធអនឡាញចាប់ពីថ្ងៃជូនដំណឹងនេះ រហូតដល់ថ្ងៃទី៧ ខែវិច្ឆិកា ឆ្នាំ២០២៤។
គួរជម្រាបជូនថា កម្មវិធីពានរង្វាន់ឌីជីថលកម្ពុជា ជាកម្មវិធីប្រកួតប្រជែងថ្នាក់ជាតិធំជាងគេនៅក្នុងព្រះរាជាណាចក្រកម្ពុជា ហើយត្រូវបានរៀបចំឡើងចាប់តាំងពីឆ្នាំ២០១៥ ដោយអតីតវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) ក្រោមការគាំទ្រពីក្រសួងប្រៃសណីយ៍ និងទូរគមនាគមន៍៕
