ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ជាឱកាសសម្រាប់សិស្សនិស្សិត យុវជន ដែលចង់ចូលបម្រើការងារជាមន្រ្តីរាជការ ពេលនេះ រដ្ឋាករទឹកស្វយ័តក្រុងភ្នំពេញ ប្រកាសប្រឡងជ្រើសរើសបេក្ខជន ឱ្យចូលបម្រើការងារក្នុងក្របខណ្ឌចំនួន ៤១ កន្លែង សម្រាប់ឆ្នាំ២០២៣។
លក្ខខណ្ឌនៃជ្រើសរើស រួមមាន បេក្ខជនត្រូវមានសញ្ញាតិខ្មែរ និងមានអាយុយ៉ាងតិច១៨ឆ្នាំ ដល់អាយុ៣៥ឆ្នាំ (គិតត្រឹមថ្ងៃប្រឡង) មានលំនៅដ្ឋានអចិន្ត្រៃយ៍នៅរាជធានី និងខេត្ត ជាប្រជាពលរដ្ឋស៊ីវិល និងពុំមានបំពេញការងារនៅកន្លែងដទៃ។ លើសពីនេះ មានអាកប្បកិរិយាល្អ, ស្មោះត្រង់, គោរពក្រមសីលធម៌ និងមានសមត្ថភាពវិជ្ជាជីវៈគ្រប់គ្រាន់ មានសុខភាពល្អ និងកាយសម្បទារឹងមាំ និងមិនប្រាសចាកសិទ្ធិខាងផ្លូវរដ្ឋប្បវេណី សិទ្ធិពលរដ្ឋ និងសិទ្ធិខាងនយោបាយ ។
ចំពោះមុខជំនាញដែលត្រូវជ្រើសរើសសម្រាប់ប្រឡង រួមមាន ទី១. ផ្នែកគ្រប់គ្រងប្រព័ន្ធព័ត៌មានវិទ្យា ចំនួន១រូប ត្រូវមានបរិញ្ញាបត្រវិទ្យាសាស្រ្តកុំព្យូទ័រ, ២-ផ្នែកដំណើរការគ្រឿងចក្រក្នុងរោងចក្រ ចំនួន ២០រូប ត្រូវមានសញ្ញាបត្រចាប់ពីមធ្យមសិក្សាទុតិយភូមិឡើងទៅ, ៣-ផ្នែកជំនាញពិសោធន៍ទឹក ចំនួន ៣រូប ត្រូវមានបរិញ្ញាបត្រវិស្វករគីមីនិងចំណីអាហារ, ៤-ផ្នែកបច្ចេកទេសអគ្គិសនី ចំនួន៧រូប ត្រូវមានបរិញ្ញាបត្រវិស្វករអេឡិចត្រូនិច និងស្វ័យប្រវត្តិ, ៥. ផ្នែកបច្ចេកទេសយន្តសាស្រ្ត (មេកានិក) ចំនួន៨រូប ត្រូវមានបរិញ្ញាបត្ររងវិស្វករអគ្គិសនី និងថាមពល និង ៦. ផ្នែករដ្ឋបាល ចំនួន ២រូប ត្រូវមានបរិញ្ញាបត្ររដ្ឋបាលសាធារណៈ។
សម្រាប់វិញ្ញាសាប្រឡង រួមមាន ទី១. ចំណេះដឹងទូទៅ រយៈពេល ២ម៉ោង, ទី២.ជំនាញបច្ចេកទេសដែលទាក់ទងនឹងជំនាញស្នើសុំប្រឡងចូល រយៈពេល ២ម៉ោង និង ទី៣. ភាសាអង់គ្លេសទូទៅ រយៈពេល១ម៉ោង៣០នាទី។
បេក្ខជនដែលចាប់អារម្មណ៍អាចចុះឈ្មោះប្រឡង ចាប់ពីថ្ងៃផ្សាយដំណឹងនេះតទៅ ផុតកំណត់ទទួលពាក្យនៅថ្ងៃទី១៦ ខែមិថុនា ឆ្នាំ២០២៣ ត្រឹមវេលាម៉ោង ៤ល្ងច។ បេក្ខជនអាចអាចដាក់ពាក្យសុំចុះឈ្មោះប្រឡងចូលបំពេញការងារនៅការិយាល័យធនធានមនុស្ស នាយកដ្ឋានរដ្ឋបាល និងធនធានមនុស្ស នៃរដ្ឋាករទឹកស្វយ័តក្រុងភ្នំពេញ ដែលមានអាសយដ្ឋានអគារលេខ៤៥ ផ្លូវលេខ១០៦ សង្កាត់ស្រះចក ខណ្ឌដូនពេញ រាជធានីភ្នំពេញ ៕
