ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ- ក្រសួងសុខាភិបាលបានប្រកាសប្រឡងជ្រើសរើសមន្ត្រីរាជការបម្រើការងារនៅមន្ទីរពេទ្យជាតិតេជោសន្តិភាពចំនួន២០០នាក់ សម្រាប់ឆ្នាំ២០២៣។
សម្រាប់លក្ខខណ្ឌនៃការជ្រើសរើសបេក្ខជន រួមមាន បេក្ខជនត្រូវមានសញ្ជាតិខ្មែរ មានអាយុយ៉ាងតិច ១៨ឆ្នាំ មានសញ្ញាបត្រ ឬវិញ្ញាបនបត្រមានតម្លៃស្មើស្របតាមជំនាញដែលត្រូវជ្រើសរើស និងមានការទទួលស្គាល់ដោយក្រសួងអប់រំ យុវជន និងកីឡា ឬក្រសួងសុខាភិបាល។
បេក្ខជនជាមន្ត្រីរាជការ ដែលបានតាំងស៊ប់ក្នុងក្របខណ្ឌរួចហើយ និងមានលិខិតអនុញ្ញាតពីប្រធានក្រសួង-ស្ថាប័ន/អង្គភាពសាម៉ី ទើបមានសិទ្ធិចូលរួមក្នុងការប្រឡងប្រជែងនេះ។ ក្នុងករណីរកឃើញថា បេក្ខជនជាមន្ត្រីរាជការដែលគ្មានការអនុញ្ញាតពីប្រធាន ក្រសួង-ស្ថាប័ន/អង្គភាពសាម៉ី បានមកដាក់ពាក្យសុំប្រឡង នឹងមិនត្រូវបានអនុញ្ញាតឱ្យចូលរួមប្រឡងប្រជែង ឬឱ្យចូលបម្រើការងារក្នុងក្របខណ្ឌថ្មីនេះទេ។
ចំពោះបេក្ខជនដែលបានប្រឡងជាប់ក្របខណ្ឌសុខាភិបាល ឆ្នាំ២០២២ ពុំមានសិទ្ធិដាក់ពាក្យសុំប្រឡងប្រជែងចូលក្របខណ្ឌសុខាភិបាលបម្រើការងារនៅមន្ទីរពេទ្យជាតិ តេជោសន្តិភាព ឡើយ។ បេក្ខជនដែលប្រឡងជាប់ ត្រូវមានព្រឹត្តិបត្រថ្កោលទោសបញ្ជាក់ថាគ្មានទោស (យកក្រោយពេលប្រឡងជាប់)។
ចំពោះមុខជំនាញ និងចំនួនជ្រើសរើស រួមមាន ទី១. វេជ្ជបណ្ឌិតឯកទេស និងវេជ្ជបណ្ឌិត ចំនួន ១០០នាក់ ទី២. បរិញ្ញាបត្រឱសថការី ចំនួន ១១នាក់ ទី៣. បវិញ្ញាបត្រគិលានុបដ្ឋាក ចំនួន ១០នាក់ ទី៤. បរិញ្ញាបត្រឆ្មប ចំនួន ១០នាក់ ទី៥. បរិញ្ញាបត្ររងគិលានុបដ្ឋាក (គិលានុបដ្ឋាកមធ្យម) ចំនួន ៣០នាក់ ទី៦. បរិញ្ញាបត្ររងឆ្មប (ឆ្មបមធ្យម) ចំនួន ៣០នាក់ និងទី៧. បរិញ្ញាបត្ររងបច្ចេកទេសមន្ទីរពិសោធន៍ ចំនួន ០៩នាក់។
ពាក្យស្នើសុំប្រឡងប្រជែងបេក្ខជនអាចទាញយកពីតំណភ្ជាប់នៅ Facebook ផ្លូវការរបស់នាយកដ្ឋានគ្រប់គ្រងបុគ្គលិក ឬមកទទួលពាក្យនៅនាយកដ្ឋានគ្រប់គ្រងបុគ្គលិក(ជាន់ផ្ទាល់ដី) នាទីស្តីការក្រសួងសុខាភិបាល រៀងរាល់ម៉ោងធ្វើការ។
វិញ្ញាសាប្រឡងជាប្រភេទសំណួរមានចម្លើយជ្រើសរើសច្រើន (MCQ) លើមុខវិជ្ជាជំនាញវិជ្ជាជីវៈ និងចំណេះដឹងទូទៅ ដែលមានរយៈពេល ៦០នាទី។
បេក្ខជនដែលមានបំណងចង់ប្រឡងប្រជែងចូលបម្រើការងារនៅមន្ទីរពេទ្យជាតិ តេជោសន្តិភាព អាចដាក់ពាក្យសុំចុះឈ្មោះប្រឡងរៀងរាល់ម៉ោងធ្វើការ នៅនាយកដ្ឋានគ្រប់គ្រងបុគ្គលិក នាទីស្តីការក្រសួងសុខាភិបាល ចាប់ពីថ្ងៃជូនដំណឹងនេះតទៅរហូតផុតកំណត់នៅថ្ងៃទី៣១ ខែមីនា ឆ្នាំ២០២៣ វេលាម៉ោង ១៧:០០នាទី៕
