ភ្នំពេញ – ក្រសួងអប់រំ យុវជន និងកីឡា ប្រកាសជ្រើសរើសសិស្សចូលរួមព្រឹត្តិការណ៍ប្រកួតសិស្សឆ្នើមទូទាំងប្រទេសលើកទី២ ការសិក្សាដោយការបង្កើតគម្រោង “បំណងប្រាថ្នា” ដែលជាការប្រកួតស្នាដៃបង្កើតគម្រោងតាមរយៈការផលិតជាវត្ថុគំរូ (Prototype) សម្រាប់សិស្សានុសិស្សថ្នាក់ទី៧ ដល់ទី១២ មកពីគ្រឹះស្ថានសិក្សាសាធារណៈ និងឯកជនទូទាំងប្រទេស។

សូម​បញ្ជាក់ថា ព្រឹត្តិការណ៍ “បំណងប្រាថ្នា” គឺការចូលរួមក្នុងការលើកកម្ពស់ការអប់រំវិទ្យាសាស្ត្រ និងបច្ចេកវិទ្យា (STEM) និងប្រមូលផ្តុំសិស្សដែលមានសក្តានុពលក្នុងការស្រាវជ្រាវ គំនិតច្នៃប្រឌិត និងនវានុវត្តន៍ ដោយផ្សាភ្ជាប់ជាមួយបរិបទនៃការអប់រំឌីជីថល។ ការបង្កើតគម្រោងក្នុងព្រឹត្តិការណ៍ “បំណងប្រាថ្នា គឺផ្តោតលើវត្ថុគំរូវិទ្យាសាស្ត្រដែលអាចកែសម្រួល ឬដោះស្រាយនូវបញ្ហានានាដែលកំពុងជួបប្រទះក្នុងជីវភាពរស់នៅប្រចាំថ្ងៃ។

សិស្សថ្នាក់ទី៧ ដល់ទី១២ មកពីគ្រឹះស្ថានសិក្សាសាធារណៈ និងឯកជនទូទាំងប្រទេស អាចចូលរួមនៅក្នុងការប្រកួតតាមជំហានចំនួន ០៥ រួមមាន៖

ជំហានទី១. ការចុះឈ្មោះនៅលើវេទិកាឌីជីថល៖ សិស្សត្រូវបំពេញព័ត៌មានផ្ទាល់ខ្លួន និងត្រូវសម្រេចចិត្តជ្រើសរើសប្រភេទនៃការស្រាវជ្រាវផ្នែកវិទ្យាសាស្ត្រ និងបច្ចេកវិទ្យាដែលជាចំណាប់អារម្មណ៍ (Field of Interest) និងប្រធានបទសម្រាប់គម្រោង (Topic of Interest) ក្នុងការផលិតជាវត្ថុគំរូ (Prototype) តាមរយៈគេហទំព័រ www.cambodiaaspiration.com ។

ជំហានទី២. ការស្វែងរកដៃគូ ការបង្កើតក្រុម និងការសរសេរឯកសារទស្សនាទាន៖ បន្ទាប់ពីសិស្សម្នាក់ៗបានចុះឈ្មោះ និងមានប្រធានបទរៀងៗខ្លួនហើយ សិស្សត្រូវចាប់ដៃគូបង្កើតក្រុមជាមួយសិស្សដែលមកពីថ្នាក់ ឬសាលារៀនជាមួយគ្នា ឬដទៃទៅតាមភាពស្រដៀងគ្នានៃប្រធានបទ ឬចំណាប់អារម្មណ៍ចំពោះប្រភេទនៃការស្រាវជ្រាវ។ នៅពេលដែលក្រុមត្រូវបានបង្កើត សិស្សត្រូវឯកភាពរួមគ្នាលើប្រធានបទមួយ និងត្រូវត្រិះរិះពិចារណា ប្រមូលផ្តុំកំណត់ “បញ្ហាជាក់លាក់” មួយ ដែលកើតមាននៅក្នុងសង្គម ឬជីវភាពប្រចាំថ្ងៃ ផ្សាភ្ជាប់ជាមួយផែនការដំណោះស្រាយ និងវិធីសាស្ត្រក្នុងការផលិតវត្ថុតំរូ ឱ្យទៅជាឯកសារទស្សនាទាន (Concept Note)។

ជំហានទី៣. ការពិគ្រោះយោបល់ និងការកែលម្អ៖ ក្រុមសិស្សនីមួយៗ អាចធ្វើការដោយឯករាជ្យ ឬទទួលការប្រឹក្សាពី “អ្នកពិគ្រោះយោបល់” ដែលមានជំនាញ ឬចំណាប់អារម្មណ៍លើប្រធានបទដូចគ្នាជាមួយក្រុមសិស្សដើម្បីកែលម្អឯកសារទស្សនាទាន ឱ្យទៅជាឯកសារតម្រោងវិទ្យាសាស្ត្រ និងបច្ចេកវិទ្យា (STEM Proposal)។

ជំហានទី៤. ការធ្វើបទបង្ហាញ និងការពារគម្រោងនៅចំពោះមុខវេទិកាសាធារណៈ៖ ក្រុមសិស្សនឹងត្រូវធ្វើបទបង្ហាញអំពីឯកសារគម្រោងរបស់ខ្លួនក្នុងកាលបរិច្ឆេទកំណត់មួយនៅក្នុងវេទិកាសាធារណៈ និងគណៈកម្មការនព្រឹត្តិការណ៍ដើម្បីការពារនូវគម្រោងរបស់ខ្លួនឈានទៅវគ្គបន្ទាប់។

ជំហានទី៥. ការផលិតវត្ថុគំរូ៖ គម្រោង ដែលត្រូវបានវាយតម្លៃថាមាន “គុណតម្លៃ”ខ្ពស់ នឹងត្រូវទទួលបានថវិកាក្នុងចំនួនកំណត់មួយដើម្បីគាំទ្រសម្រាប់ការអនុវត្ត និងផលិតចេញជាវត្ថុគំរូ ដោយគណៈកម្មការនៃព្រឹត្តិការណ៍។

សិស្សានុសិស្ស ដែលចូលរួមប្រកួតនៅក្នុងព្រឹត្តិការណ៍នេះ នឹងទទួលបានការលើកទឹកចិត្ដពីក្រសួងអប់រំ យុវជន និងកីឡា នូវវិញ្ញាបនបត្របញ្ជាក់ការចូលរួមដោយមាន មេដាយ ថវិកា និងរង្វាន់មួយចំនួន។ សិស្សានុសិស្ស ក៏នឹងទទួលបានអាទិភាពក្នុងការចូលរួមទស្សនកិច្ចសិក្សាទៅកាន់គ្រឹះស្ថានឧត្តមសិក្សា ឬសហគ្រាសឧស្សាហកម្ម ដើម្បីទទួលបានការបណ្តុះបណ្ដាលណាមួយ និងថវិកាឧបត្ថម្ភបន្ថែមដើម្បីជាជំនួយក្នុងការផលិតវត្ថុគំរូទៅតាមគម្រោង និងបំណងប្រាថ្នារបស់ខ្លួន។

សិស្សានុសិស្សដែលមានចំណាប់អារម្មណ៍អាចចុះចូលរួមតាមតំណភ្ជាប់ www.cambodiaaspiration.com  ចាប់ពីថ្ងៃផ្សាយដំណឹងនេះ ឬមកជួបផ្ទាល់គណៈកម្មការរៀបចំព្រឹត្តិការណ៍ដើម្បីសាកសួរព័ត៌មានលម្អិត ផុតកំណត់ចុះឈ្មោះនៅសប្ដាហ៍ទី៤ ខែកក្កដា ២០២៣ និងបិទបញ្ចប់ការទទួលឯកសារទស្សនាទាន (Concept Note) នៅសប្ដាហ៍ទី៣ ខែសីហា ២០២៣។

គួរជម្រាបជូនថា ស្ថាប័នជាតិ និងអន្តរជាតិ វិស័យឯកជន និងសប្បុរសជនដែលមានចំណាប់អារម្មណ៍គាំទ្រដល់ព្រឹត្តិការណ៍ “បំណងប្រាថ្នា” សូមទាក់ទងមកអីម៉ែល [email protected] ៕